Aýa raıy
Astana 15 °S
Almaty 10 °S
valıýta baǵamy
USD 386.82
EUR 428.67
RUB 5.86
CNY 54.95

Fýtbol: Oralhan Ómirtaev Qazaqstan quramasyna jeńis syılady

2019 jyldyń 21 aqpan 2019 21:56 1442

ASTANA. QazAqparat - Fýtboldan Qazaqstan quramasy búgin Túrkııadaǵy oqý-jattyǵý jıyny barysynda Moldovamen kezdesti, dep habarlaıdy QazAqparat tilshisi.

Biz budan buryn eki quramanyń búginge deıin oıyndary barysy jaıynda tarazylaǵan edik. Qos qurama osyǵan deıin tórt márte kezdesti. Onyń bireýi bizdiń quramanyń jeńisimen aıaqtalsa, birinde teń nátıje tirkeldi. Qalǵan 2 oıynda jeńis Moldovanyń enshisinde ketti.

Búgingi match FIFA-nyń joldastyq kezdesý ótkizý kestesine kirmeıdi. Sol sebepti bul oıynnyń nátıjesi FIFA-nyń reıtıngine eshqandaı áser etpeıdi. Sondyqtan qos qurama bapkerleri atalmysh kezdesýde negizinen óz eliniń birinshiliginde oınap júrgen fýtbolshylarǵa senim artty.

Mıhal Bılek alǵashqy kezeńde bizdiń qurama sapynda jasyl alańǵa Dmıtro Nepogodov, Temirlan Erlanov, Sergeı Malyı, Saǵadat Tursynbaı, Dmıtrıı Mıroshnıchenko, Dmıtrıı Shomko, ıÝrıı Pertsýh, Azat Nurǵalıev, Maksım Fedın, Roman Mýrtazaev, Baýyrjan Turysbek syndy jigitter shyǵardy.

Birinshi kezeńde qos qurama kózge túserlik oıynymen erekshelene qoıǵan joq. Kezdesý negizinen jasyl alań ortasynda órbidi desek te bolady. Qos qurama oıynshylary bir-biriniń qatelikke boı aldyratyn sátterin kútti. Osyndaı sátterdiń birinde bizdiń qurama shabýylshysy Baýyrjan Turysbek gol soǵatyn múmkindikti qur jiberip aldy. Sol sátte Moldova fýtbolshylarynyń bir-birin túsinbeı qalǵan sáti bolǵan edi. Birinshi kezeń 0:0 esebimen teń aıaqtaldy.

Ekinshi kezeńde Mıhal Bılek birden úsh oıynshyny almastyrdy. Qaqpaǵa Igor Shatskıı tursa, qorǵaýshy Marat Bystrov pen shabýylshy Oralhan Ómirtaev jasyl alańǵa shyqty. Oralhan kóp ótpeı-aq mergendigimen kózge tústi. Oıynnyń 59-mınýtynda ol jasyl alańnyń orta bóliginen qarsylastar qaqpasyn kózdedi. Áýeleı barǵan dopqa Moldova qaqpashysy qarsy tura alǵan joq. Osylaısha Oralhan ulttyq qurama sapyndaǵy ekinshi golyn soǵyp otyr.

 Esterińizge sala ketelik, ol bizdiń quramanyń Ulttar lıgasyndaǵy syrt alańda Grýzııamen kezdesýinde qanjyǵasyn maılady. Osylaısha jas fýtbolshy ulttyq quramanyń qatarynan eki oıynynda mergendik tanytty. Atalmysh goldan keıin bizdiń jigitter birshama ýaqyt shıraq oıynymen kózge tústi. Osyndaı sátterdiń birinde Baýyrjan Turysbekke sáttilik jetispedi desek te bolady. Atalmysh kezdesýde Qazaqstan quramasy 1:0 esebimen basym tústi.

 Bul oıyn fýtboldan 2020 jylǵy Eýropa birinshiliginiń irikteý kezeńi aldyndaǵy ulttyq quramanyń daıyndyǵy bolyp tabylady. Esterińizge sala ketelik, bizdiń qurama I tobynda Belgııa, Reseı, Shotlandııa, Kıpr, San-Marınomen synǵa túsedi. Qazaqstan fýtbolshylary irikteý kezeńindegi alǵashqy oıynynda 21 naýryzda Shotlandııa quramasyn qabyldaıdy. Odan keıin 24 naýryzda Astanada Reseı quramasymen sheberlik baıqasady.

 

 

Avtor Ádiljan Úmbet
Basty sózder: Sport, Túrkııa,
Joǵary qaraı