Aýa raıy
Astana 0 °S
Almaty 18 °S
valıýta baǵamy
USD 389.81
EUR 430.27
RUB 6.06
CNY 54.91

Fýtbol: Qazaqstan Ulttar lıgasynyń sońǵy matchynda Grýzııaǵa ese jiberdi

2018 jyldyń 20 qarasha 2018 01:37

ASTANA. QazAqparat - Fýtboldan Ulttar lıgasy D dıvızıony birinshi tobynyń sońǵy oıynynda Qazaqstan Grýzııamen kezdesti, dep habarlaıdy QazAqparat tilshisi.

Tórtinshi týrdan keıin-aq Grýzııa top jeńimpazy bolyp úlgergendikten, bul match eshteńeni sheshpeıtin edi. Sondyqtan Qazaqstan quramasynyń bas bapkeri Stanımır Stoılov birqatar fýtbolshylarǵa óz ónerlerin kórsetýine múmkindik berdi.

Tbılısı qalasynda ótken kezdesýde «Tobyldyń» qaqpashysy, 30 jasar Dmıtrıı Nepogodov alǵash ret el namysyn qorǵasa, taǵy bir qostanaılyq, jartylaı qorǵaýshy Maksım Fedın de birden alańǵa shyqty.

Birinshi taımda alań ıeleri kóbirek shabýyldaǵanymen, naǵyz gol soǵatyn múmkindik qazaqstandyqtarda boldy. Serikjan Mujyqov dál pas berip, Roman Mýrtazaev grýzııalyq qaqpashy Georgıı Lorııamen betpe-bet shyqqanymen, aılasyn asyra almady.

Ekinshi taımda grýzııalyqtar degenine jetti. Sol qanattan qustaı ushqan belgııalyq «Gent» klýbynyń jartylaı qorǵaýshysy, 19 jasar Georgı Chakvetadzeni Abzal Beısebekov ustaı almady. Chakvetadzeniń bergen pasynan keıin Georgıı Merebashbılı baspen soqqanda, dop Ǵafýrjan Súıimbaevtyń arqasyna tıip, qaqpaǵa endi de ketti. Al 83-mınýtta G.Chakvetadzeniń ózi orta tustan qaqpa buryshyn dál kózdeı bildi - 2:0.

G.Chakvetadze 6 qyrkúıek kúni Astanada ótken birinshi kezdesýde de mergendik tanytyp, Ulttar lıgasyndaǵy alǵashqy goldy soqqan edi. Bul joly da ol úzdik oıynshy ekendigin tanyta bilip, jeńis golynyń avtory atandy.

S.Stoılov match taǵdyry sheshilgennen keıin ǵana, 89-mınýtta alańǵa qaraǵandylyq «Shahterdiń» 20 jasar shabýylshysy Oralhan Ómirtaevty shyǵardy. Bir-aq mınýttan keıin Oralhan aıyp alańynda keýdesimen dopty qabyldap alyp, dál soqqy jasaı aldy. Bul onyń Qazaqstan ulttyq quramasy úshin alǵashqy goly edi.

Osylaısha Grýzııa quramasy 2:1 esebimen jeńiske jetti.

Birinshi topta 16 upaımen Grýzııa quramasy kósh basyna kóterilse, qazaqstandyqtar alty upaımen ekinshi orynǵa ıe boldy. Andorra men Latvııa quramalary 0:0 esebimen teńtarqasty. Bul ekeýiniń upaılary (4) teń bolǵanymen, latvııalyqtar úshinshi, andorralyqtar tórtinshi orynǵa turaqtady.

Grýzııa quramasy kelesi Ulttar lıgasynda S dıvızıonynda oınaıdy. Sóıtip olar 2020 jyly ótetin Eýropa chempıonatyna beriletin joldama úshin kúresti jalǵastyrady.
Eske salaıyq, bizdiń qurama D lıgasynyń birinshi tobynda Grýzııa, Latvııa jáne Andorra quramalarymen básekege tústi. QR ulttyq quramasy alǵashqy týrda óz alańynda Grýzııadan 0:2 esebimen jeńilse, odan keıin aldymen Andorra, sosyn Latvııamen 1:1 esebimen teń nátıje tirkeldi. Al tórtinshi týrda elordada Andorrany 4:0 esebimen jeńgenimen, besinshi týrda óz alańynda Latvııamen taǵy da 1:1 esebimen teń tústi.

Avtor Eljan Eraly
Basty sózder: Grýzııa, Sport,
Joǵary qaraı