Aýa raıy
Astana -2 °S
Almaty 3 °S
valıýta baǵamy
USD 389.98
EUR 434.01
RUB 6.10
CNY 55.04

Fýtbol: Qazaqstan quramasy Shotlandııany iri eseppen jeńdi

2019 jyldyń 21 naýryz 2019 23:01

ASTANA. QazAqparat - Fýtboldan Qazaqstan quramasy 2020 jylǵy Eýropa chempıonaty irikteý kezeńin jeńispen bastady. Olar búgin óz alańynda Shotlandııadan 3:0 esebimen basym tústi, dep habarlaıdy QazAqparat tilshisi.

Esterińizge sala ketelik, búgin 2020 jylǵy Eýropa chempıonaty irikteý kezeńindegi I tobyndaǵy alǵashqy týr oıyndary bastaldy. Alǵashqy týrda bizdiń jigitter Shotlandııany quramasyn qabyldady. Aıta keterligi, Shotlandııa bizdiń quramanyń jalpy búginge deıin kezdesken alpys altynshy, Eýropadaǵy otyz jetinshi qarsylasy bolyp otyr.

Jankúıerler Shotlandııa quramasy jaıynda jaqsy biledi. Burynǵy jyldarda olar álemdik dodalarda jıi boı kórsetip jatatyn. Alaıda sońǵy kezeńde atalmysh qurama álem jáne qurlyq chempıonaty fınaldyq kezeńine shyǵa almaı keledi. Aıtalyq, olar álem chempıonatynda 2002 jyldan beri baq synaýdan shet qalyp júrse, Eýropa úzdikteriniń qatarynda 2000 jyldan bastap boı kórsetken joq. Degenmen irikteý kezeńderinde óz tobynda joldamaǵa qol sozymda qalyp qoıyp júrdi.

Alǵashqy mınýttan bizdiń qurama sapynda Dmıtrıı Nepogodov, Ǵafýrjan Súıimbaev, Temirlan Erlanov, Sergeı Malyı, Evgenıı Postnıkov, ıAn Vorogovskıı, Islambek Qýat, Aleksandr Merkel, ıÝrıı Pertsýh, Baktıer Zaınýtdınov jáne Roman Mýrtazaev shyqty. Al Shotlandııa quramynda Skott Beın, Lıam Palmer, Grem Shınnı, Skott Makkena, Devıd Beıts, Kallým Makgregor, Djon Makgınn, Djeıms Forrest, Stıýart Armstrong, Olıver Berk, Olıver Makbernı boldy.

Oıyn basynda Shotlandııa quramasy shabýylǵa kóbirek shyǵýǵa kóńil bóldi. Degenmen bizdiń jigitter de qarymta shabýyl uıymdastyrýǵa nazar aýdardy. Osylaısha olar alǵashqy mınýttarda qarsylastar qaqpasynan sańylaý taýyp ketti. I tobyndaǵy alǵashqy goldy bizdiń jigitter soqty. Oıynnyń 6-mınýtynda Gollandııanyń «Herakles» komandasynda oınaıtyn Aleksandr Merkel áriptesi ıÝrıı Pertsýhqa ádemi pas shyǵaryp berdi. Mundaı múmkindikti ıÝrıı qur jibersin be? Esep ashyldy. Arada tórt mınýt ótkende bizdiń jigitter esepti ústemeleı tústi. Bul joly qurama kapıtany Islambek Qýat jeke sheberliginiń arqasynda ıAn Vorogovskııge gol soǵatyn múmkindik jasady. Qarsylastar qaqpasyna taǵy bir gol soǵyldy. Esep 2:0. Qazaqstan quramasy basymdyǵyn arttyra tústi. Budan keıin Islambek Qýattyń alystan tepken dobyn shotland qaqpashysy Skott Beın syrtqa áreń shyǵardy. Birinshi kezeńde qos quramada da budan basqa esepti ózgertetin sátter bolǵan edi. Degenmen tablodaǵy esep ózgere qoıǵan joq.

Ekinshi kezeńde qarsylas qurama ózderiniń beker kelmegenin ańǵartyp, bizdiń qaqpaǵa shabýylǵa shyǵýǵa kóńil bóldi. Degenmen oılaǵanyn júzege asyra alǵan joq. Esesine bizdiń jigitter taǵy bir gol soǵyp ketti. Ǵafýrjan Súıimbaevtyń sol qanattan áýelete bergen dobyn búginde Reseıdiń «Rostov» komandasynda oınap júrgen Baktıer Zaınýtdınov baspen qaqpanyń oń jaǵyna baǵyttady. Oǵan Skott Beın tosqaýyl qoıa alǵan joq. Esep 3:0. Qazaqstan quramasy osylaısha óz jankúıerlerine Ulystyń Úly kúni - Naýryz merekesine tolaıym tartý jasady.

Bizdiń qurama endi 24 naýryzda Reseı quramasyn qabyldaıdy. Dál osy kúni atalmysh topta Kıpr men Belgııa, San-Marıno men Shotlandııa quramalary kezdesedi.

Qazaqstan sońǵy ret óz alańynda 2018 jyldyń 16 qazanynda Andorra quramasyn 4:0 eesbimen jeńgen edi. Bul Ulttar lıgasynyń irikteý kezeńi bolatyn.

Búgin I tobynda taǵy eki oıyn bolady. Atap aıtqanda, Kıpr men San Marıno, Belgııa men Reseı quramalary kezdesedi. Oıyndar elorda ýaqytymen 00.45-te bastalady.

Avtor Ádiljan Úmbet
Basty sózder: Nur-Sultan, Sport,
Joǵary qaraı