Aýa raıy
Astana 24 °S
Almaty 24 °S
valıýta baǵamy
USD 384.39
EUR 431.71
RUB 6.11
CNY 55.88

Erlan Turǵymbaev: Mıtıng kezinde kóbine polıtsııa qyzmetkerleri jaraqat aldy

2019 jyldyń 18 maýsym 2019 10:49 732

NUR-SULTAN. QazAqparat - Іshki ister mınıstri Erlan Turǵymbaev 9-13 maýsym kúnderi iri qalalarda tirkelgen halyqtyń mıtıngterine qatysty pikirin bildirdi, dep habarlaıdy QazAqparat tilshisi.

«9 maýsymnan 13 maýsymǵa deıin QR qalalarynda sanktsııalanbaǵan mınıngter boldy. Bas prokýratýra men Іshki ister mınıstrliginiń birneshe ret eskertýine qaramastan, sanktsııalanbaǵan mıtıngke shyqqan azamattar mıtıngter men demonstratsııalar týraly zańdy buzdy. Ol zańda mıtıngti uıymdastyryp, oǵan shyǵý úshin azamattardyń jergilikti atqarýshy organdarǵa ótinim jazýy kerektigi, ruqsat berilgen jaǵdaıda atalǵan mıtıngterdi ótkizý kerektigi naqty jazylǵan», - dedi Erlan Turǵymbaev Úkimet otyrysynan keıin tilshilerdiń suraǵyna jaýap bere otyryp.

Mınıstrdiń aıtýynsha, baqtar men mádenı sharalar ótetin oryndarda jaǵdaı kúrdelenip, josparlanǵan sharalar ótpeı qalǵan.

«Jol qozǵalysy shektelip, Respýblıka dańǵylynda tórt saǵat boıy qozǵalys toqtady. Bul jaǵdaı azamattardyń mazasyn ketirdi. Sol sebepti, quqyq qorǵaý organdary, onyń ishinde polıtsııa qyzmetkerleri atalǵan shıelenisti retteý, quqyqtyń qorǵalýyn saqtaý boıynsha sharalardy qabyldady. Polıtsııa kúshteri, artynsha ulttyq gvardııa jumyldyryldy», - dedi ol.

Onyń aıtýynsha, mıtıng kezinde tártip saqshylary jaraqat alǵan.

«Bárin de ózderińiz kórdińizder. Vıdeo men fotoda polıtsııaǵa qalaı shabýyl jasalyp jatqanyn, qalqandardy teýip jatqanyn, tartyp, soǵyp jatqanyn kórdińizder. Negizinen kóbi jeńil jaraqattar. Bas mı jaraqaty, jilinshiktiń synýy jaǵdaılary kezdesti. Sebebi, dene jaraqattary taıaqtan, armatýra men tastan kelip jatty. Keıbir azamattar osylardy paıdalanyp, jaǵdaıdy ýshyqtyrǵysy keldi», - dedi ol.

Mınıstrdiń aıtýyna qaraǵanda, polıtsııaǵa arnaıy quraldardy - gaz qarýyn, dýbınka men ózge de zattardy paıdalanbaý týraly pármen berilgen. 

«Qazaqstandyq polıtsııa olardy qoldanbady. Tek shıelenisti retteý úshin fızıkalyq kúsh paıdalanyldy. 4 myńǵa tarta adam ustalyp, 3 saǵattyń ishinde 3 myńy bosatyldy. 677 adam sot arqyly arqyly ákimshilik qamaýǵa alyndy. 305-ne aıyppul salyndy», - dedi mınıstr.

Sonymen birge, mınıstr qansha polıtseıdiń jaraqat alǵanyn aıtty.

«300-ge tarta polıtseı dene jaraqatyn aldy. 6 polıtseı aýrýhanada jatyr. Olardyń úsheýi 9-11 maýsymda túsken. Bul sandy buryn aıtpaǵan edik. Birinshi ret aıtyp otyrmyn», - dedi mınıstr.

 

 

 

 

Avtor Aıan Bekenuly
Basty sózder: QR Úkimeti, QR ІІM,
Joǵary qaraı