Aýa raıy
Astana 5 °S
Almaty 8 °S
valıýta baǵamy
USD 389.81
EUR 430.27
RUB 6.06
CNY 54.91

Eńbek tájirıbesi joq jastar jóninde arnaıy baǵdarlama qabyldanady - QR Prezıdenti

2019 jyldyń 21 mamyr 2019 18:46

NUR-SULTAN. QazAqparat - Memleket basshysy Qasym-Jomart Toqaev «Volonterlik - jastardyń áleýmettik lıfti» atty Qazaqstan-Reseı jastarynyń yntymaqtastyq forýmyna qatysty, dep habarlaıdy Aqordanyń baspasóz qyzmeti.

Forým aldynda Qazaqstan Prezıdenti Qazaqstan men Reseı jastarynyń STARTUP-jobalarynyń kórmesin aralady. Sondaı-aq, Qostanaı oblysy Jastarǵa qyzmet kórsetý ortalyǵynyń jumysymen tanysty.

Jıynǵa qatysýshylarǵa arnalǵan sózinde Qasym-Jomart Toqaev atalǵan forýmnyń bilim men tájirıbe almasýǵa, pikirlester taýyp, ortaq maqsattar men josparlar jasaýǵa múmkindik beretinin atap ótti.

- Qazaqstan - jas ári jastardyń memleketi! Jastarymyz - damýdyń qozǵaýshy kúshi. Barlyq memlekettik organdardyń mindeti - jastardyń ózin ózi jaqsy tanytýyna jaǵdaı jasaý jáne olardyń oń bastamalaryna qoldaý kórsetý, - dedi Memleket basshysy.

Qasym-Jomart Toqaev óz baıandamasynda elimizde eriktilerdiń qozǵalysyna aıryqsha kóńil bólinetinin aıtty.

- 2016 jyly eriktilerdiń mártebesin, quqyǵy men mindetterin jáne memlekettik qoldaý sharalaryn bekitetin «Volonterlik qyzmet týraly» zań qabyldadyq. 2017 jyly «EKSPO» halyqaralyq mamandandyrylǵan kórmesi jastardy jappaı volonterlik qozǵalysqa tartý isin bastap berdi. Bıyl Qazaqstandaǵy volonterlikti damytýdyń jańa kezeńi bolady, - dedi Memleket basshysy.



null

Qasym-Jomart Toqaev Jastar jyly aıasynda ótkiziletin negizgi is-sharalarǵa toqtaldy.

- Jastardyń bıznes-bastamalaryn damytýǵa arnalǵan «Jas kásipker» baǵdarlamasy ekonomıkanyń negizgi sektorlaryndaǵy startaptarǵa qoldaý kórsetýge múmkindik beredi. Qyzmeti men bilimi joq jumysqa ornalaspaǵan jastardyń máselesi sheshilýde. Jumyspen qamtý, eń aldymen, eńbek tájirıbesi joq jastar jóninde arnaıy baǵdarlama qabyldanýda. Bilikti jas mamandardy qoldaý kúsheıe túsedi, - dedi Memleket basshysy.

Qazaqstan Prezıdenti eriktiler qozǵalysynyń kóshbasshylaryn elimizdegi aýqymdy áleýmettik mindetterdi sheshý úshin belsendi atsalysýǵa shaqyrdy.

Sonymen qatar, Qasym-Jomart Toqaev Qazaqstan men Reseı jastarynyń ekijaqty baılanystardy nyǵaıtýǵa qosqan úlesine joǵary baǵa berdi.

- Eki el jastarynyń tikeleı baılanystary - Qazaqstan men Reseı arasyndaǵy strategııalyq seriktestiktiń, dostyqtyń jáne tatý kórshiliktiń baǵdaryn nyǵaıtýdyń mańyzdy sharty. Elderimizdi ortaq tarıh pen eń uzyn shekara ǵana emes, sonymen qatar, yntymaqtastyqtyń zor áleýeti de biriktiredi. Bul saıasatty jalǵastyra beremiz, - dedi Memleket basshysy.

Qasym-Jomart Toqaev eki eldiń eriktiler qozǵalysy arasyndaǵy seriktestikti yntalandyrýǵa baǵyttalǵan birqatar usynys aıtty.

- Birinshiden, «Jyl volonteri» halyqaralyq syılyǵyn uıymdastyrýdy usynamyn. Syılyq úzdik volonterlik jobaǵa beriledi jáne kreatıvti ıdeıalar men jobalar jasap júrgenderge jaqsy qoldaý bolady. Ekinshiden, Qazaqstan men Reseıdiń volonterlik uıymdary kóshbasshylarynyń qatysýymen turaqty jumys isteıtin Volonterlik keńes qurý múmkindigin talqylaýdy usynamyn. Bul ózara yntymaqtastyqty nyǵaıtý úshin bizdiń áleýetimizdi kúsheıte túsedi, - dedi Qazaqstan Prezıdenti.

Sonymen qatar, forým barysynda Memleket basshysy jastar uıymdary kóshbasshylarynyń 2020 jyldy Volonterler jyly dep jarııalap, tarıhı-mádenı oryndarǵa birlesken arheologııalyq jáne izdeý jumystaryn júrgizý jónindegi bastamasyn qoldady.




null

Joǵary qaraı