Aýa raıy
Astana -1 °S
Almaty 1 °S
valıýta baǵamy
USD 389.75
EUR 434.26
RUB 6.12
CNY 55.05

Elordanyń negizgi nysandary «Nur-Sultan» ataýyna kóshirilmeıdi

2019 jyldyń 21 naýryz 2019 17:38

ASTANA. QazAqparat - Elordanyń negizgi nysandary óz ataýyn saqtap qalady, dep habarlaıdy QazAqparat tilshisi.

Bul týraly QR Aqparat jáne qoǵamdyq damý mınıstri Dáýren Abaev "Ashyq dıalog" baǵdarlamasynda aıtty.

Mınıstr Prezıdent Qasym-Jomart Toqaevtyń alǵashqy sózinde elorda ataýyn ózgertýge naqty negizdeme keltirgenin atap ótti.

"Astananyń ataýyn ózgertý ózgeler oılaǵandaı radıkaldy túrde júrgizilmeıdi. Eń aldymen ákimdik memlekettik bıýdjetke salmaq túsirmeıtin joldy tańdaıdy. Eshkim bannerler men jazbalardy bir kúnde ózgert dep otyrǵan joq. Bulaı bolmaıdy. Qalanyń negizgi nysandary - "Astana Opera", "Astana Arena", sporttyq klýbar, "Astana" telearnasy - óz ataýyn ózgertpeıdi. "Astana" halyqaralyq brendin saqtap qalamyz", - dedi Dáýren Abaev "Ashyq dıalog" baǵdarlamasynda.

Onyń aıtýynsha, Astana qarjy ortalyǵy, "Eır-Astana" áýe kompanııasy, "Astana" velokomandasy, "Astana Arlans" ataýlary da ózgerissiz qalady. Osylaısha, álemge tanymal "Astana" brendin saqtap, zor áleýeti bar jańa Nur-Sultan brendin damytý kerek.

"Astana" sózi biz úshin yńǵaıly. Sebebi onyń maǵynasy da astanany bildiredi.

Memlekettik tilde elorda turǵyndaryn astanalyqtar dep ataı beremiz. Orys tilinde de osylaı ataýdy usynamyz. Sosyn elordanyń eski ataýy bar resmı qujattar zańdyq kúshin joǵaltpaıdy. HQO-ǵa baryp, ózgertýdiń qajeti joq. Qujattyń qoldaný merzimi bitken soń, jańa qujat jańa qala ataýymen beriledi", - dedi mınıstr.

Joǵary qaraı