Aýa raıy
Astana 9 °S
Almaty 15 °S
valıýta baǵamy
USD 389.52
EUR 429.21
RUB 6.07
CNY 54.94

Elordada Katamnez ortalyǵy ashyldy

2019 jyldyń 24 sáýir 2019 21:53

NUR-SULTAN. QazAqparat - Búgin qaladaǵy №2 kóp beıindi aýrýhana janynan Katamnez ortalyǵy ashyldy, dep habarlaıda Elorda Info tilshisi.

Týabitti aqaýmen nemese ýaqytynan erte ómirge keletin sábılerdi kútip-baǵýǵa arnalǵan kabınetter bul mekemede tórt jyldan beri jumys istep kelgen. Endi osy salada belgili bir jobalarmen aınalysyp, halyqqa neǵurlym kóbirek kómek kórsetý úshin olardy jeke ortalyq retinde qaıta qurý qajettigi týǵan.

«2008 jyldan beri júktiliktiń 22-aptasynda, ıaǵnı, alty aılyǵynda ómirge kelgen salmaǵy keminde 500 gramdyq shaqalaqtardyń bári Qazaqstan Respýblıkasynyń azamaty bolyp esepteledi. Ókinishke qaraı, sondaı nárestelerdiń ári qaraı jetilip, adam bolyp ketýi - óte qıyn. Olardy kútip-baǵý úshin úlken eńbek pen shydam kerek. Sony eskerip, tórt jyl buryn osy aýrýhanada katamnez kabınetterin ashqan edik. Onda bizdiń dárigerler men medbıkeler sábılerdi bir jasqa tolǵanynsha turaqty túrde qadaǵalap, náresteler arasyndaǵy ólim-jitim men múgedektik kórsetkishterin tómendetýge baryn salǵan. Endi osy tájirıbe negizinde jeke Katamnez ortalyǵyn quryp, onda nárestelerdi kútip-baǵyp qana qoımaı, analardy úıretý boıynsha da jumystar atqarmaqshymyz», - deıdi Katamnez ortalyǵynyń dırektory, dáriger-neanotolog Baljan Tátibekova.

Onyń aıtýynsha, ortalyq ázirge aqyly túrde qyzmet kórsetedi.

«Qyzmet kórsetý baǵasy qoljetimdi - jylyna 250 myń teńge. Bul baǵa keıde dári-dármekpen de ketip qalyp jatady. Al bizdiń ortalyqta sábılerge dári-dármek jazyp bermeıdi, onyń ornyna basqasha ádistermen emdeý sharalary qolǵa alynady. Aldaǵy ýaqytta kvota boıynsha aqysyz emdelý múmkindikterin de qarastyramyz», - deıdi ol.

Aıta keteıik, katamnez kabınetteri ashylǵaly beri tórt jyldyń ishinde munda 3 jarym myńǵa jýyq náreste em alyp, úılerine shyqqan. Onyń 40 paıyzy merziminen buryn ómirge kelgen balalar eken.

Basty sózder: Medıtsına, Nur-Sultan,
Joǵary qaraı