Aýa raıy
Astana -2 °S
Almaty 6 °S
valıýta baǵamy
USD 389.98
EUR 434.01
RUB 6.10
CNY 55.04

Elimizde jańadan 190 mektep salynady - Kúlásh Shámshıdınova

2019 jyldyń 13 naýryz 2019 19:37

ORAL. QazAqparat - Elimizde aldaǵy úsh jylda jańadan 190 mektep salynady. QR Bilim jáne ǵylym mınıstri Kúlásh Shámshıdınova BQO turǵyndarymen kezdesý kezinde osylaı dedi, dep habarlaıdy QazAqparat tilshisi.

Onyń aıtýynsha, respýblıkalyq bıýdjettiń úsh jylǵa qaralyp, bekitiletini belgili.

Osy kezeńde iske qosylatyn ǵımarattar eń aldymen apatty jaǵdaıdaǵy mektepter máselesin sheshýdi kózdeıdi. Ekinshiden, úsh aýysymda oqytatyn mektepter. Úshinshiden, oqýshy oryny jetispeıtin bilim oshaqtarynyń jaǵdaıyn jaqsartady. Mysaly, Batys Qazaqstan oblysynda úsh mektep salynyp jatsa, sonyń ekeýi apatty jaǵdaıdaǵy ǵımaratty aýystyrýǵa arnalǵan. Bireýi úsh aýysymda oqytatyn mektepterge túsetin júkti jeńildetedi.

«Elimiz táýelsizdik alǵannan beri Qazaqstanda 1672 mektep salynǵan eken. Qazirgi kezde 2 mln astam oqýshy bolsa, sonyń 668 myń oryny osy jyldary iske qosylǵan mektepter úlesinde. Aldaǵy ýaqytta da osylaı úsh jyl saıyn mektepter qurylysy qarastyrylyp otyrylady», dedi mınıstr.

Kúlásh Noǵataıqyzynyń sózine qaraǵanda, bilim sapasy, árıne, muǵalimderdiń kásibı sheberligine baılanysty. Jańartylǵan bilim mazmunyna oraı 2017 jyldan beri 144 myń muǵalim biliktilik kýrstarynan ótken. Endi 85 myń synyp jetekshisi men psıhologtar oqytylatyn bolady.

«Halyqty jıi tolǵandyryp júrgen máseleniń biri úsh tildilik ekeni belgili. Joǵary synyptarda hımııa, bıologııa, fızıka, ınformatıka pánderin aǵylshyn tilinde oqytýdy kezeń-kezeńmen, mektep pen muǵalimder daıyn bolǵan kezde engizetin bolamyz. Ár mektep ata-analarmen aqyldasa otyryp, sheshedi. Qazirgi kezde respýblıka boıynsha úsh tilde oqytýdy bastaǵan 150-den astam mektep bar. Biz ol mektepterde jaǵdaı qalaı, qandaı másele týyndap jatyr, bárin zerdelep qarap otyrmyz. Aldymen pedagogıkalyq JOO-larda aǵylshyn tilinde dáris beretin muǵalimderdi daıarlaýǵa kúsh salynatyn bolady. Eń bastysy, bilim sapasy joǵary bolýy qajet. Balalarymyz qazirgi zaman talaptaryna sáıkes alǵan bilimderin óz ómirinde paıdalana bilýi tıis», dedi mınıstr.

Joǵary qaraı