Aýa raıy
Astana 14 °S
Almaty 24 °S
valıýta baǵamy
USD 384.87
EUR 432.52
RUB 6.11
CNY 55.95

Elimizde turmystyq qatty qaldyqtar boıynsha qandaı problemalar bar

2019 jyldyń 19 maýsym 2019 14:17 1578

NUR-SULTAN. QazAqparat - Parlament Májilisiniń jalpy otyrysynda ár qalada men iri aýdan ortalyǵynda qaldyqtardy qaıta óńdeý jónindegi ınfraqurylym bolýy kerektigi aıtyldy. Osy oraıda QR Premer-Mınıstriniń orynbasary Jeńis Qasymbektiń atyna depýtattyq saýal joldandy, dep habarlaıdy QazAqparat tilshisi.

«Aǵymdaǵy jylǵy mamyrda Qaraǵandy oblysynyń halqymen bolǵan kezdesýlerde elimizde turmystyq qatty qaldyqtardy ornalastyrýǵa jáne kádege jaratýǵa baılanysty qalyptasqan jaǵdaı týraly másele kóterildi. Alynǵan aqparatqa júrgizilgen taldaý turmystyq qaldyqtardy basqarý problemasy Qazaqstanda óte ózekti ekenin jáne Úkimettiń jedel túrde aralasýyn talap etetinin kórsetip otyr. Qazirgi ýaqytta Qazaqstanda 3520 úıindi men TQQ polıgony paıdalanylady. Olardyń kóbi ekologııalyq jáne sanıtarlyq talaptar men normalarǵa sáıkes kelmeıdi. Onyń ústine, jumys istep turǵan polıgondardyń basym bóligi tolyp ketken», - dedi depýtat Arman Qojahmetov.

Onyń sózine qaraǵanda, jınalǵan turmystyq qatty qaldyqtardyń jıyntyq kólemi 100 mıllıon tonnadan asyp tústi. Jyl saıyn osy TQQ kólemi 5-6 mıllıonǵa ósip otyrady. 2025 jylǵa qaraı qaldyqtardy qoımalaýdyń jyldyq mólsheri 8 mıllıon tonnaǵa deıin ulǵaıady dep kútilýde. Bul rette qoqys polıgondarǵa aldyn ala zararsyzdandyrýsyz shyǵarylady.

«Energetıka mınıstrliginiń derekteri boıynsha, qazirgi tańda elimizde qaldyqtardy suryptaıtyn jáne qaıta óńdeıtin 130 kásiporyn bar. Olar 20-ǵa jýyq ónim túrin shyǵarady. Suryptaý keshenderi 18 eldi mekende ornalasqan. Alaıda, atalǵan kásiporyndardyń tizimin qaraıtyn bolsaq, osy kásiporyndardyń bári derlik oblys ortalyqtary men iri qalalarda ornalasqanyn kórýge bolady. Ádette, bul dara kásipkerler nemese qýaty kishigirim shaǵyn kásiporyndar, olar aǵymdaǵy jınaqtalǵan kólemderdi de ıgere almaıdy. Ózge qalalar men aýyldyq aýmaqtar qoqysty qaıta óńdeý jónindegi servıspen qamtylmaǵan», - dedi A. Qojahmetov.

Depýtattyń atap ótýinshe, úlken aýmaqqa ıe bola otyryp, Qazaqstannyń ár qalada jáne iri aýdan ortalyǵynda qaldyqtardy qaıta óńdeý jónindegi ınfraqurylymy bolýy tıis.

Osy oraıda ol jumys istep turǵan TQQ jáne ónerkásiptik qaldyqtar polıgondaryn túgendeýge, olardyń zańnamanyń sanıtarlyq, ekologııalyq normalaryna sáıkestigin tekserýdi usyndy.

Onyń aıtýynsha, jumys istep turǵan polıgondardy sanıtarlyq jáne ekologııalyq talaptarǵa sáıkes keltirý jónindegi qajetti jumystardy, sondaı-aq qaldyqtardy suryptaýǵa, qaıta óńdeý men kómýge arnalǵan qajetti jabdyqtardy satyp alýdy qarjylandyrý kózderin aıqyndaýǵa baǵyttalǵan sharalardy ótkizý  kerek.

Bul turǵyda A Qojahmetov turmystyq qatty qaldyqtardy qaıta óńdeý jáne kádege jaratý salasyna jeke ınvestıtsııalardyń tartylýyn yntalandyrýdy arttyrý qajettigin atap ótti.

 

 

Joǵary qaraı