Aýa raıy
Astana 3 °S
Almaty 15 °S
valıýta baǵamy
USD 386.70
EUR 427.15
RUB 6.06
CNY 54.57

Elimizde hımııa ónerkásibi ónimderiniń kólemi artty

2019 jyldyń 22 tamyz 2019 23:52

NUR-SULTAN. QazAqparat - 2010 jyldan bastap 2018 jylǵa deıin Qazaqstanda hımııa ónerkásibi ónimderin óndirý kólemi 3,2 esege ulǵaıdy, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

Mınıstrliktiń habarlaýynsha, kórsetkishterdiń osynshama deńgeıde ulǵaıýy hımııa kásiporyndaryn qalpyna keltirý jáne jańǵyrtý, sondaı-aq Indýstrııalandyrý kartasy sheńberinde jańa ınvestıtsııalyq jobalardy engizý esebinen júzege asqan. 2010-2018 jyldar aralyǵynda bul baǵytta 54 joba iske asyrylyp, 4 myńnan astam jumys orny ashylǵan.

«Otandyq hımııa ónerkásibin damytýǵa eleýli úles qosqan - Indýstrııalandyrý kartasy. Onyń aıasynda júzege asyrylǵan mańyzdy jobalardy erekshe atap ótýge bolady. Pavlodar oblysyndaǵy «Kaýstık» AQ, Jambyl oblysyndaǵy «Qazfosfat» JShS-nyń «Natrıı geksametafosfatyn jáne basqa tuzdardy óndirý» zaýyty, Mańǵystaý oblysyndaǵy «QazAzot» JShS ammıak, azot qyshqyly jáne ammıak selıtrasy óndirisin jańǵyrtý jobasy, Jambyl oblysyndaǵy «Talas Investment Company» JShS natrıı tsıanıdin óndirý zaýyty óndiristi damytýǵa aıtarlyqtaı serpin berdi», - delingen habarlamada.

Bul jobalar elimizde buryn óndirilmegen hımııa ónimderiniń assortımentin keńeıtýge múmkindik bergen. Osylaısha, Qazaqstanda qazirgi tańda kaýstıkalyq soda, natrıı gıpohlorıdi, sondaı-aq qosylǵan quny joǵary ónimderden jýý quraldary, lak-boıaý materıaldarynyń, jarylǵysh zattardyń jańa túrleri, agrohımııa quraldary óndirilip jatyr.

«Hımııa ónerkásibiniń eń eksporttalatyn taýarlarynyń qataryna: sary fosfor, hrom oksıdteri men hlorıdteri, gerbıtsıdter, hrom trıoksıdi, ammonıı nıtraty, natrıı dıhromaty, mıneraldy tyńaıtqyshtar kirdi. Búgingi tańda Qazaqstan aýmaǵynda jumys isteıdi: hımııa salasyndaǵy 693 kásiporyn, onyń ishinde 10 iri, 13 orta, 670 usaq kásiporyndar jumys istep tur. Al hımııa salasyndaǵy jumyspen qamtylǵandar sany – 16 myń adamdy qurady», - dep habarlaıdy mınıstrlikten.

Joǵary qaraı