Aýa raıy
Astana -3 °S
Almaty 0 °S
valıýta baǵamy
USD 389.75
EUR 434.26
RUB 6.12
CNY 55.05

Elbasy jáne halyq: Bıylǵy Naýryz nesimen erekshelendi

2019 jyldyń 21 naýryz 2019 23:18

ASTANA. QazAqparat - Bıylǵy Naýryz merekesi halyqtyń esinde uzaqqa saqtalatyny sózsiz. Óıtkeni osy jańa jylymyz tosyn oqıǵalarǵa toly boldy jáne 19 naýryzdan beri osy ózgeristerge barshamyz kýá boldyq...

Naýryz merekesi erekshe toılandy

Bıyl elordadaǵy EKSPO aýmaǵynda uıymdastyrylǵan Naýryz meıramyna birneshe kúnnen beri qyzý daıyndyq júrdi. Alańda 17 kıiz úı tigilip, altybaqandar qurylǵan. Qazaqtyń ulttyq salt-dástúrlerin, teatrlandyrylǵan kórinisterdi, aıtysty, qazaq estradasynyń juldyzdary qoıǵan kontsertti tamashalaýǵa qyzyǵýshylyq tanytqan qala turǵydary tańerteńnen keshen aýmaǵyna qaraı aǵyla bastady.






Qonaqtardy qazaq batyrlarynyń saýyt-saımanyn asynǵan boıshań jigitter qarsy alyp turdy, qalyń jurt olarmen jappaı sýretke túsip jatty. Sonymen qatar adamdar ár jerde qurylǵan saıys alańdaryna jınalyp, kórinisti tamashalaýǵa kirisip ketti.











Qyzý qandy jigitter qazaqsha kúres, gir tasyn kóterý, qol kúresi boıynsha kúshterin synaǵan bolsa, balalar jaǵy arqan tartysty qyzyqtap máz-maıram bolyp jatty. Etnoaýylǵa jıylǵan halyq taratylǵan naýryz kóje men ystyq baýyrsaqtan jáne ózge de ulttyq taǵamdardan dám tatyp, kóterińki kóńil-kúıde júrdi.




Saǵat 12:00-ge qaraı etnoaýylǵa kireberis jerde Parlament depýtattary jáne Úkimet músheleri jınala bastady. Saǵattaryna qaıta-qaıta qaraǵan túrlerinen olardyń mártebeli meımandardy kútip turǵany baıqaldy. Olardyń arasynda merekelik sharaǵa kelgen QR Úkimet basshysy Asqar Mamın, QR Parlamenti Májilisiniń tóraǵasy Nurlan Nyǵmatýlın, QR Memlekettik hatshysy Baqytjan Saǵyntaev, Prezıdent Ákimshiliginiń basshylyǵy, sondaı-aq Astana qalasynyń ákimi Baqyt Sultanov boldy.

Muny sezgen jurshylyq ta sol aýmaqqa qaraı shoǵyrlandy. Al tilshiler qaýymy dıktofony men mıkrofondaryn daıyndaı bastady. Birer sátten keıin sol jerge toqtaǵan kólikten Elbasy Nursultan Nazarbaev pen QR Prezıdenti qyzmetine kirisken Qasym-Jomart Toqaev tústi. Elbasy qalyń jurshylyqtyń arasyna ádemi qońyr shapanyn kıip, kóterińki kóńil-kúımen keldi. Jınalǵan kópshilik qatar kele jatqan Tuńǵysh Prezıdent pen Memleket basshysyn qaýmalap qorshap, jappaı sýretke, selfıge túsip, quttyqtaýlaryn jaýdyra bastady. N. Nazarbaev ádetinshe toıshyl qýymdy Naýryzben quttyqtap, janyndaǵy adamdarmen ázildesýge de úlgerip jatty. Elbasynyń prezıdenttik ókilettikti toqtatý týraly sheshiminen habardar halyq Nursultan Ábishulyna qımastyqpen qarap turǵanyn da ańǵardyq.



Qobaljyǵan adamdar kóz jasyna erik berip jatty... Elbasy men QR Prezıdentine jaqyn turǵan jamaǵat olardyń amandyǵyn tilep, eldegi beıbitshilik pen tynyshtyqqa alǵystaryn aıtyp, tilektestik bildirdi.

Qadirli meımandar etnoaýyldyń orta kezine qaraı jetkende, olardy óziniń dástúrli ánimen Halyq ártisi Roza Rymbaeva qarsy aldy.




Aıtpaqshy, búgingi Naýryz toıynda elordada nekelerin qıǵan 9 juptyń erekshe joly boldy desek qatelespeımiz. Shańyraq kótergen elordalyq jastarǵa Nursultan Nazarbaev aq batasyn berdi. Elbasy jas otbasylardy este qalarlyq osy mańyzdy kúnderimen quttyqtap, olarǵa baqytty uzaq ómir tiledi. Sondaı-aq eldegi tynyshtyqtyń saqtalýyn, árbir otbasynyń ósip, órkendeýin, jastardyń patrıottyq rýhta tarbıelenýin tilek etti.









Elbasynyń seriktesteri men qyzmettesteri ne deıdi...

Osynaý merekelik kúnde alańǵa mınıstrlerdiń de, depýtattardyń da birqatary keldi. Olar tilshiler qaýymyna elorda ataýyn ózgertý bastamasyna qatysty kókeıindegi oıyn aıtyp, túsindirip jatty.

QR Eńbek jəne halyqty əleýmettik qorǵaý mınıstri Berdibek Saparbaev Elbasynyń eńbegin laıyqty baǵalaý kerektigin, qıyn kezeńde, ıaǵnı 90-shy jyldary jańa astanany qurý týraly sheshim qabyldaý, mundaı zor jaýapkershilik alý ərkimniń qolynan kele bermeıtinin atap ótti.

«Ol úshin úlken júrektilik pen tabandylyq, senimdilik bolý kerek. Sonyń dáleli retinde jańa elodamyzdyń jasy qazir 20 jyldan asty. Sondyqtan bul durys sheshim, óıtkeni ol bolashaq úshin kerek. Jastar óz Otanyn, ultyn, memleketin súıip ósýi kerek jəne elge eńbek etken adamdardy da esh ýaqytta umytpaýymyz qajet. «Tarıhsyz bolashaq bolmaıdy» dep aıtamyz ǵoı, osy oraıda 20 naýryz kúni mańyzdy sheshim qabyldandy dep oılaımyn», - dedi Berdibek Saparbaev.




Sonymen qatar búgin EKSPO aýmaǵynda Parlament Májilisiniń depýtaty Qýanysh Sultanovty da kezdestirdik. Esterińizde bolsa, ol buǵan deıin elordaǵa Elbasynyń esimin berý bastamasyn birneshe ret kótergen edi.

«Bul turǵyda Nursultan Nazarbaevtyń eńbegi men erligine oraı qalaǵa Elbasynyń esimin berýdi bastapqydan quptaǵan edim. Sol úshin talaı jaısyz sózderdi estigen bolatynmyn. Negizi, osy máselede ádil sheshim qabyldanyp, keshe Parlament tıisti qujatty bekitti. Elorda Elbasynyń esimimen atalǵanyna men qýanyshtymyn», - dedi Q. Sultanov.






Parlament Májilisiniń taǵy bir depýtaty Bekbolat Tileýhan da 20 naýryz kúni Qazaqstanda tarıhı ádil sheshim jasalǵanyn jáne osylaı bolýy kerektigin jetkizdi.

«Óıtkeni, Táýelsiz Qazaqstannyń joly Nursultan Ábishulynyń esimimen tyǵyz baılanysty. Tıisti qabyldanǵan sheshimge toqtalsaq, mundaı jaǵdaı álemdik tájirıbede bar», - dedi depýtat elordadaǵy Naýryz merekesin toılaý sharasynda.






Osy oraıda B. Tileýhan AQSh-tyń negizin salǵan Djordj Vashıngton esimine kezinde laıyqty baǵa berilgenin atap ótti.

«Sondyqtan Nazarbaevtyń esimin ulyqtaý - ol Táýelsizdiktiń qadirin bilý degen sóz. Bul turǵyda men osyndaı pikirdi ustanyp turmyn», - dedi depýtat.

Joǵary qaraı