Aýa raıy
Astana -7 °S
Almaty -2 °S
valıýta baǵamy
USD 388.81
EUR 429.01
RUB 6.08
CNY 55.49

Nursultan Nazarbaev: Úkimet pen «Nur Otan» fraktsııasy azamattardyń problemalaryn birlesip sheshýi kerek

2019 jyldyń 18 qazan 2019 16:14

NUR-SULTAN. QazAqparat – QR Tuńǵysh Prezıdenti – Elbasy Nursultan Nazarbaev Úkimet, «Nur Otan» partııasy jáne Parlament Májilisindegi partııa fraktsııasynyń múshelerimen jınalys ótkizdi, dep habarlaıdy QazAqparat.

Keńeste «Qazaqstan – 2021: Birlik. Turaqtylyq. Jasampazdyq» saılaýaldy baǵdarlamasynyń oryndalý barysy men «100 naqty qadam» ult jospary» baǵdarlamasy qaraldy.

Otyrys barysynda Premer-mınıstr A.Mamınniń, Parlament Májilisiniń tóraǵasy N.Nyǵmatýlınniń, Premer-mınıstrdiń birinshi orynbasary jáne Qarjy mınıstri A.Smaıylovtyń, Premer-mınıstrdiń orynbasarlary B.Saparbaevtyń jáne R.Sklıardyń baıandamalary tyńdaldy.

Usynylǵan aqparatty tyńdaǵan Nursultan Nazarbaev eldiń damýy men halyqtyń ál-aýqatyn arttyrýdaǵy partııanyń aıryqsha ról atqaratynyn atap ótti.

– Búgingi tańda partııamyzdyń aldynda qoǵamdy jumyldyrý, partııa atynan saılanǵan Prezıdent Qasym-Jomart Kemeluly Toqaevtyń mańaıyna elıtany toptastyrý mindeti tur. Partııa eldiń jetekshi saıası kúshi retinde memleketimizdiń damýynyń strategııalyq baǵytynyń sabaqtastyǵyn qamtamasyz etýge tıis. Sondyqtan Úkimet pen Fraktsııa júıeli jumys júrgizip, el-júrttyń naqty máselelerin birlese sheshýi kerek, – dedi partııa tóraǵasy.

Elbasy saılaýaldy baǵdarlamanyń jáne Ult josparynyń oryndalý nátıjelerine toqtala kele, partııanyń qalǵan mindettemelerin oryndaýǵa qatysty yqtımal qaterlerdi atap kórsetti.

– Biz jaqsy nátıjelerge qol jetkizdik. Úsh jarym jyldyń ishinde 430 myńnan astam jumys orny paıda bolyp, 2,7 myń shaqyrym jol salyndy. Eýrazııa qurlyqaralyq dálizi iske qosyldy. Eldiń ishki jalpy ónimindegi shaǵyn jáne orta bıznestiń úlesi 28 paıyzǵa jetti. Bir jyl ishinde biz «Doing Business» reıtıngisinde 8 pozıtsııaǵa ilgerilep, 28-shi orynǵa kóterildik, – dedi Qazaqstannyń Tuńǵysh Prezıdenti.

Nursultan Nazarbaev jeńiske jetken partııanyń saılaýaldy baǵdarlamasy Úkimettiń bes jyldyq qyzmetiniń negizin quraýy kerek ekenin atap ótti. Al partııanyń Májilistegi fraktsııasynyń músheleri yqtımal qaterlerdiń der kezinde aldyn alyp, baǵdarlamanyń oryndalýyn únemi qadaǵalap otyrýy qajet.

– Bizdiń mindetimiz – uzaq merzimdi kóshbasshylyqty saqtaý. Májilis saılaýyna partııanyń jańa saılaýaldy baǵdarlamasyn daıyndaý jumystaryn búginnen bastaý kerek. Strategııalyq baǵytty negizge alyp, ártúrli áleýmettik toptardyń naqty múddelerin kózdep, el-jurttyń naqty suranystaryn ótegen jón», – dedi partııa tóraǵasy.

Sonymen birge, Elbasy óńirlerdi damytý baǵdarlamalarynyń júzege asyrylý barysyna toqtaldy.

– Qazir bul strategııalyq baǵdarlamalar oıdaǵydaı deńgeıde júzege aspaı otyr. Olardyń oryndalýyn qadaǵalap otyrǵan tıisti baqylaý joq. Keıbir tarmaqtar múldem oryndalmaıdy. Josparlanǵan jumystarǵa únemi túzetýler engizilip keledi. Sondyqtan Ulttyq ekonomıka mınıstrligi «Nur Otan» partııasymen jáne onyń fraktsııamen birlesip, atalǵan baǵdarlamalardyń oryndalýy týraly tyńdaý uıymdastyrýy kerek. 2025 jylǵa deıin aýmaqtardy damytýdyń jańa baǵdarlamalaryn jasaý qajet, – dedi Nursultan Nazarbaev.

Osyǵan baılanysty Qazaqstannyń Tuńǵysh Prezıdenti 2020 jyldyń 1 naýryzyna deıin ár aýdan, qala jáne oblys úshin aýmaqtyq damý baǵdarlamalaryn ázirleýdi tapsyrdy.

Elbasy sonymen birge «Nur Otan» partııasynyń Parlament Májilisi men máslıhattardaǵy fraktsııasynyń jumysyna toqtalyp, «Nur Otan» partııasynyń reıtıngi barlyq deńgeıdegi depýtattardyń jumystarynyń nátıjesinde qalyptasatynyn aıtty.

Nursultan Nazarbaev depýtattardyń óńirlerge jumys saparlarynyń formatyn qaıta qaraýdy jáne partııanyń qoǵamdyq qabyldaý bólmelerinde birinshi basshylar men azamattardyń kezdesýin uıymdastyrý jumystaryn jandandyrýdy tapsyrdy.

– Taldaý nátıjesi bizdiń partııanyń depýtattary buqaralyq aqparat quraldaryn jetkilikti paıdalanbaıtyndyǵyn kórsetti. Sonymen qatar, «Nur Otan» fraktsııasy qoǵamdy tolǵandyratyn ózekti máseleler boıynsha bastama kótere bermeıdi. Sońǵy birneshe aı ishinde «Nur Otan» fraktsııasynyń músheleri birde-bir rezonanstyq is boıynsha óz ustanymdaryn bildirmegen, – dedi Qazaqstannyń Tuńǵysh Prezıdenti.

Sonymen qatar, Elbasy fraktsııa jumysynda bıýrokratııany jáne úılestirýdiń kúrdeli protsedýralaryn joıý qajettigin atap ótti.

Nursultan Nazarbaev partııa organdarynyń – Partııalyq baqylaý komıteti men Sybaılas jemqorlyqqa qarsy is-áreket jónindegi respýblıkalyq qoǵamdyq keńestiń jumysyn jandandyrýdy tapsyrdy.

– Osy organdarǵa kiretin depýtattar belsendirek áreket etýi qajet. Sizder tıisti máselelerdi syndarly túrde kóterip, jurtshylyqtyń qatysýymen naqty sheshimder usynǵandaryńyz jón, – dedi partııa tóraǵasy.

Sonymen birge, Qazaqstannyń Tuńǵysh Prezıdenti ózderine Konstıtýtsııa arqyly bekitilgen zańnamalyq bastamany fraktsııa depýtattarynyń is júzinde qoldana bermeıtinin atap ótti.

– Depýtattar – partııanyń dińgegi, belsendi elektorattyń negizi. Halyq sizderge partııa arqyly tıisti ókilettikter berdi. Sizder azamattarymyzdyń máselelerin sheshý jolynda jumys isteýlerińiz kerek, – dedi Elbasy.

Sóziniń sońynda Nursultan Nazarbaev partııanyń saıası kóshbasshylyǵyn saqtap qalýdyń mańyzdylyǵyn atap ótti.

– Bizdiń basty mindetimiz – turaqtylyq, Qazaqstannyń ósip-órkendeýi jáne qarapaıym azamattardyń ál-aýqatyn jaqsartý. Sondyqtan ýádelerimizdi oryndaý úshin bar kúsh-jigerimizdi jumsaýymyz qajet, – dedi Elbasy.

Joǵary qaraı