Aýa raıy
Astana 19 °S
Almaty 30 °S
valıýta baǵamy
USD 386.05
EUR 428.25
RUB 5.84
CNY 54.65

Ekinshi dúnıejúzilik soǵysta erlik kórsetken qazaqstandyq jaýyngerdiń týystary tabyldy

2019 jyldyń 14 shilde 2019 11:42 292

ORAL. QazAqparat – Ekinshi dúnıejúzilik soǵysta erlik kórsetken qazaqstandyq jaýynger Ivan Getalonyń týystary tabyldy, dep habarlaıdy QazAqparat tilshisi.

BQO-nyń Tasqala aýdany Mereı aýylynda turatyn M.Mámetova atyndaǵy izdestirý jasaǵynyń jetekshisi Sergeı Lapshınniń aıtýynsha, 1944 jyly 21 qyrkúıekte serjant I.Getalo «Erligi úshin» medalimen marapattalǵan.

3-Belarýs maıdany 192-atqyshtar dıvızııasy 298-artıllerııa polkynda baılanysshy bolǵan 1923 jylǵy I.Getalo Garmany derevnıasy mańynda qatty urys kezinde batyldyq kórsetken. Alty ret úzilgen telefon symyn jalǵap, atys núkteleri men baqylaý pýnkti arasyndaǵy úzdiksiz baılanysty qamtamasyz etken.

Osy erligi úshin Ivan Afrıkanovıchke «Erligi úshin» medali tabys etilgen. Maıdanger Soltústik Qazaqstan oblysyndaǵy eline aman-esen oralyp, osydan jeti jyl buryn dúnıeden ozdy.

Áıtse de medal ázirge belgisiz sebeptermen uzaq ýaqyt boıy Máskeý qalasynyń turǵynynda saqtalyp kelgen. 2018 jyly Kırov oblysy Svecha aýylyndaǵy Nıkolsk shirkeýiniń nastoıateli, «Vzvod» izdestirý jasaǵynyń komandıri Vladımır Neganov qazaqstandyq áriptesi S.Lapshınge habarlasyp, máskeýlik tanysynyń medaldi maıdangerdiń týystaryna qaıtarý jónindegi ótinishin jetkizgen.

Vladımır ákeı Qorǵanys mınıstrligi arqyly medaldiń I.Getaloǵa (1923 jyly dúnıege kelgen, Soltústik Qazaqstan oblysy Oktıabr aýdany Dmıtrıevka aýylynan, anasy Ýstınıa Fedorovna Getalo) tıesili ekendigin anyqtaǵan. Osyǵan oraı V.Neganov S.Lapshınnen maıdangerdiń týystaryn tabýdy suraǵan.

S.Lapshın Dmıtrıevka aýyldyq ákimdigine habarlasqanymen, «Mundaı kisiler turmaıdy» degen jaýap alǵan. Sodan keıin Esil aýdany Korneevkaǵa (Petropavl qalasynan 120 shaqyrym jerde) habarlasqanda, izdeý óz nátıjesin berdi. Maıdangerdiń qyzy Valentına Ivanovna (qazir Ýsatenko) sonda turady eken.

«Jýyrda Vladımır ákeı halyqaralyq «Jaıyq-Ýral 2019» týrıstik-ekologııalyq ekspedıtsııasyna qatysý úshin Oralǵa kelip, BQO qorǵanys isteri jónindegi departamentte atalǵan medaldi maǵan tapsyrdy. Qazir medaldi Valentına Ivanovnaǵa tabys etý úshin saparǵa daıyndalýdamyn», dedi QazAqparat tilshisine Sergeı Lapshın.

S.Lapshın basshylyq etetin Keńes Odaǵynyń Batyry Mánshúk Mámetova atyndaǵy izdestirý jasaǵy 2007 jyly qurylǵannan beri «Vzvodpen» birge Reseı jerinde qoıan-qoltyq jumys jasap keledi. Maqsattary ortaq – belgisiz bolyp jatqan jaýyngerler múrdelerin zerttep, aty-jónderin anyqtaý.

M.Mámetova atyndaǵy jasaq sońǵy jyldary BQO-nyń Jánibek, Saıqyn aýyldary mańynda izdestirý jumystaryn júrgizýde. Buǵan sebep – Stalıngrad maıdanyna tıip turǵan Jánibek, Bókeı ordasy aýdandary soǵys jaǵdaıynda dep jarııalanǵany belgili. Soǵys órtine sharpylǵan qos aýdanda áli de anyqtalmaǵan jaıttar, qaza tapqan jaýyngerler jerlengen jerler barshylyq.



Avtor Eljan Eraly
Basty sózder: Batys Qazaqstan oblysy, Oqıǵa,
Joǵary qaraı