Aýa raıy
Astana 5 °S
Almaty 12 °S
valıýta baǵamy
USD 389.81
EUR 430.27
RUB 6.06
CNY 54.91

Dzıýdo: Qazaqstan quramasy Azııa chempıonatynyń alǵashqy kúninde kósh bastady

2019 jyldyń 21 sáýir 2019 14:15

NUR-SULTAN. QazAqparat - Qazaqstandyq dzıýdoshylar Fýdjeırada (BAÁ) ótip jatqan Azııa chempıonatynyń alǵashqy kúniniń qorytyndysy boıynsha medaldar sany boıynsha kósh bastady, dep habarlaıdy QazAqparat tilshisi.

Qazaqstan dzıýdo federatsııasy málim etkendeı, el qorjynyna bir altyn, eki kúmis, qos qola medal tústi.

Medaldar kestesinde ekinshi oryndaǵy Japonııanyń enshisinde ázirge 1 altyn, 1 kúmis, 2 qola júlde bar. Úshinshi orynda - 1 altyn, 1 qolamen Koreı Halyq Demokratııalyq Respýblıkasy.

Qazaqstandyq dzıýdoshylarǵa, ásirese, 66 kg salmaq ońtaıly bolyp, qos qazaq balýany fınalǵa shyqty. Munda Erlan Serikjanov chempıon atansa, Eldos Jumaqanov ekinshi orynǵa kóterildi.

48 kg salmaqta kúresken Galbadrah Otgontsetseg kúmis júldege ıe boldy. Ol shırek fınalda túrkimenstandyq Azıza Nazarovany, sodan keıin ońtústikkoreıalyq Hýekıong Lıdi tize búktirdi.

Galbadrah tek fınalda ǵana qytaılyq Lı ıAnanǵa ese jiberdi.

Osy salmaqta tatamıge shyqqan taǵy bir qazaqstandyq Aqmaral Naýatbek besinshi oryndy qanaǵat tutty. Ol shırek fınalda taıpeılik Chen Hao Lındi qosymsha ýaqytta utqanymen, sodan keıin qytaılyq Lı ıAnannan jeńilip qaldy. Jubanysh beldesýinde japonııalyq qarsylasynan qosymsha ýaqytta utyldy.

Erler arasynda 60 kg salmaqta kúresken Ǵusman Qyrǵyzbaev júldegerler qatarynan kórindi. Ol jubanysh fınalynda ózbekstandyq Sharafoddın Lýtfıllaevtan basymdylyq tanytyp, qola júldeger atandy.

Sondaı-aq áıelder arasynda Sevara Nıshanbaeva (-57 kg) úshinshi orynǵa ıe boldy.

Aıta keteıik, atalmysh birinshilikke Qazaqstannan barlyǵy 18 dzıýdoshy barǵan edi.

Avtor Eljan Eraly
Basty sózder: Sport,
Joǵary qaraı