Aýa raıy
Astana 13 °S
Almaty 17 °S
valıýta baǵamy
USD 386.34
EUR 427.25
RUB 5.88
CNY 54.57

Dımash Qudaıbergen Djekı Channyń festıvalinde aıtqan ániniń vıdeosyn jarııalady

2019 jyldyń 22 shilde 2019 10:45 766

BEIJІŃ. QazAqparat – Qytaıdyń Datuń qalasynda ótken Djekı Channyń Besinshi halyqaralyq ekshn fılmder aptalyǵynyń shymyldyǵyn qazaqstandyq tanymal ánshi Dımash Qudaıbergen ashty, dep habarlaıdy QazAqparat tilshisi.

Ánshi Instagram-daǵy paraqshasyna festıvaldiń ashylý saltanatynda aıtqan ániniń vıdeosyn jarııalap, «Djekı Chan aǵamyzdyń keshinen» dep jazdy.


Vıdeodan Dımashtyń ónerine uıyǵan jurttyń birge ándetkeni kórinedi.

Eske sala keteıik, Dımash pen Djekı Chan burynnan jaqsy tanys. Qazaq ánshisi Qytaıda ótken I am Singer jobasynda mıllıondaǵan qaýymnyń júregin jaýlaǵan bolatyn. Sonda áıgili aktermen kezdesip, ıyǵyna qazaqtyń shapanyn jaýyp, qońyr úndi dombyrasyn da syıǵa tartqan edi.

Sol joly Dımash Instagram paraqshasyna: «Búgin meniń ómirimde tarıxı este qalatyn erekshe kún! Ataqty akter Djekı Chan myrza meni teledıdardan kórip, kezdesýge shaqyrdy! Kezdesýde akter maǵan óziniń eksklıýzıvti kúrteshesin jáne arnaıy fırmalyq án tyńdaý qurylǵysyn syıǵa tartty! Al men akterge qazaqtyń shapanyn jaýyp, dombyra syıladym! Dombyramen bir kúı shertip berýimdi ótingen Djekı Chanǵa Nurǵısanyń Álqısasynan shashý shashtym! Óz kezeginde akter maǵan sońǵy »Kung Fu Yoga« kınokartınasyndaǵy bı qımyldaryn úıretti. Bala kezimnen beri kele jatqan súıikti akterim maǵan óz aqyl- keńesterin berip, shyǵarmashylyǵymdy baqylaıtynyn aıtty. Sóz sońynda, barsha Qazaqstan xalqyn jańa jyl merekesimen quttyqtap, ádemi lebiz-tilegin bildirdi! Kelesi kezdesýdi asyǵa kútemiz! Armandar oryndalady!», - dep jazǵan bolatyn.

Aıta ketken jón, buǵan deıin Dımash Qudaıbergen Besinshi halyqaralyq ekshn-fılmder aptalyǵyna qatysý úshin Qytaıǵa kelgenin habarlaǵan edik. Ol 27 shildege deıin jalǵasady.


Áleýmettik jelilerden alynǵan foto


Avtor Nurlan Tuıaqov
Basty sózder: Mádenıet,
Joǵary qaraı