Aýa raıy
Astana 11 °S
Almaty 15 °S
valıýta baǵamy
USD 389.98
EUR 434.01
RUB 6.10
CNY 55.04

Bul da bir jańa asý - Ámirjan Álpeıisov

2019 jyldyń 26 naýryz 2019 15:55

NUR-SULTAN. QazAqparat - Nur-Sultan qalasy Qoǵamdyq kelisim keńesiniń tóraǵasy Ámirjan Álpeıisov Astana qalasy ataýynyń Nur-Sultan bolyp ózgerýine baılanysty pikir bildirdi, dep habarlaıdy QazAqparat tilshisi.

«Ótkenge ózimizdiń kózqarasymyzdy bildirgen ýaqytta tarıhtaǵy tarıhı tulǵaǵa úlken mán beremiz. Halqymyz «myń ólip, myń tirilgen qazaq» dep aıtady. Osy myń ólip, myń tirilgen qazaqtyń tarıhyndaǵy táýelsizdik úshin kúresiniń sanyn 362 nemese 365 dep jatamyz. Biraq, qalaı desek te másele - bizdiń táýelsizdik úshin kúreskenimizde. Endi sol táýelsizdik alǵannan keıin egemendigimizdiń qabyrǵasyn salyp qana qoımaı, tuǵyryn kótergen tarıhı tulǵa - Nursultan Ábishuly», - deıdi Ámirjan Álpeıisov.

Nur-Sultan qalasy Qoǵamdyq kelisim keńesiniń tóraǵasy Elbasyn astananyń Saryarqaǵa kóshýinen bastap biletinin aıtady.

«Sol tusta «Otan» partııasyn quryp, sol kezdegi Astana qalasynyń «Otan» partııasynyń alǵashqy atqarýshy dırektory men bolǵan edim. On shaqty jyl sonda istep, Assambleıada birshama eńbek ettik. Endi men tarıhshy jáne qoǵam qaıratkeri esebinde aıtarym, Nursultan Ábishulynyń tarıhı tulǵalyǵyn aıtyp jatýdyń ózi artyq. Óıtkeni, 28 jyldyń ishindegi bizdiń elimizdiń ekonomıka men saıasatta, halyqaralyq qatynastarda jetken jetistigi - erekshe ekeni daýsyz», - deıdi ol.

Ámirjan Álpeıisov Astana qalasy elorda bolǵannan keıin Astana emes, birden Nur-Sultan bolsyn dep kezinde Aqseleý Seıdimbek usynys jasaǵanyn aıtady.

«Odan beri de birshama ýaqyt ótti. Degenmen, tarıhı sáttilik endi kelgen sekildi. Sebebi, Prezıdent óziniń laýazymyn toqtatqannan keıin sol másele qaıtadan kún tártibine qoıylyp, iske asyp jatyr. Qazir men ýnıversıtette sabaq beremin. Stýdenttermen, jastarmen kezdeskende olardyń barlyǵy da osy Elbasynyń eńbegin baǵalap, tarıhı tulǵa ekenin, Nur-Sultan qalasynyń bizdiń ekonomıkamyzǵa, elordanyń ǵana damýyna emes, Qazaqstannyń álemdegi damýyna erekshe úles qosqanyn aıtyp otyr. Bul bir jańa asý, bolashaqqa degen baǵytymyz. Sol sebepti, meniń oıymsha, jaı ǵana durys sheshim emes, bul bizdiń bolashaǵymyz úshin qajettilik», - deıdi Qoǵamdyq kelisim keńesiniń tóraǵasy.

Ámirjan Álpeıisov kez kelgen nárseniń tuǵyry, negizi bolatynyn atap ótti.

«Sol negizge qarap, úı salynady. Sol negizge qarap, baǵyt anyqtalady. Vashıngton sekildi qalalarmen jaı ǵana salystyrǵym kelmeıdi. Óıtkeni, Qazaqstannyń Uly dalasy, ulttyq ereksheligi men salt-dástúri - az ýaqyttyń ishinde Astana qalasynda kórinip tapty. Bul bizdiń eldigimizdi, erekshe ult ekenimizdi aıǵaqtaıdy», - dep túıdi Ámirjan Álpeıisov.

Eske sala ketsek, osydan birneshe kún buryn Memleket basshysy Qazaqstan Respýblıkasynyń astanasy - Astana qalasyn Qazaqstan Respýblıkasynyń astanasy - Nur-Sultan qalasy dep qaıta ataý týraly jarlyqqa qol qoıǵan bolatyn.

Joǵary qaraı