Aýa raıy
Astana 16 °S
Almaty 24 °S
valıýta baǵamy
USD 384.87
EUR 432.52
RUB 6.11
CNY 55.95

Búgin fýtboldan eýrokýbok oıyndarynyń jerebesi tartylady

2019 jyldyń 18 maýsym 2019 13:00 653

NUR-SULTAN. QazAqparat - Búgin fýtboldan ÝEFA Chempıondar lıgasy men Eýropa lıgasy oıyndarynyń jerebesi tartylady, dep habarlaıdy QazAqparat tilshisi.

Esterińizge sala ketelik, bıyl eýrokýbok oıyndarynda   elimizdiń atynan tórt komanda synǵa túsedi. Chempıondar lıgasynda Nur-Sultan qalasynyń «Astana» komandasy el namysyn qorǵaıdy. Al Eýropa lıgasynda Almatynyń «Qaırat», Shymkenttiń «Ordabasy» jáne Qostanaıdyń «Tobyl» komandalary jasyl alańǵa shyǵady.

«Astana» óz oıyndaryn birinshi irikteý kezeńinen bastaıdy. Elordalyq klýbqa qarsylas bolýy múmkin bes komanda belgili bolyp otyr. Olardyń qatarynda Lıtvanyń «Sýdýva», Rýmynııanyń ChFR Klýj, Vengrııanyń «Ferentsvarosh», Estonııanyń «Nemme Kalıý» jáne Armenııanyń «Ararat-Armenııa» komandalary bar.

Birinshi irikteý kezeńiniń alǵashqy oıyndary 9, 10 shilde kúnderi bolsa, qarymta kezdesý 16, 17 shildede ótkiziledi.

Aıta ketelik, «Astana» bizdiń elimizdiń atynan besinshi jyl qatarynan Chempıondar lıgasynyń irikteý kezeńinde synǵa túsip keledi. Máselen, 2015/2016 jylǵy kezeńde atalmysh týrnırdiń toptyq kezeńine deıin jetti. Odan keıingi úsh jylda  eki márte úshinshi irikteý kezeńinen asa almasa, bir márte pleı-off kezeńine deıin bardy. Nátıjesinde olarǵa sońǵy úsh jylda  Eýropa lıgasynyń irikteý kezeńine qatysýǵa múmkindik berildi. Odan súrinbeı etken elordalyqtar toptyq kezeńinde el namysyn qorǵady. Al 2016/2017 jylǵy kezeńde jarystyń 1/16 fınalyna deıin jetti.

«Qaırat» 2005/2006 jylǵy kezeńde Chempıondar lıgasy birinshi irikteý kezeńinen asa almasa, Eýropa lıgasyna bıyl segizinshi márte qatysady.

«Ordabasy» komandasy ÝEFA Eýropa lıgasynda tuńǵysh ret 2012/2013 jyldarda synǵa tússe, 2015 jyldan bastap atalmysh týrnırge qatarynan úsh márte qatysty. 2017 jyly el birinshiliginde úshinshi oryn alǵan edi. Degenmen byltyr atalmysh týrnırge qatysý múmkindiginen shet qalyp qoıdy. Ornyna Qostanaıdyń «Tobyl» komandasy qatysty.

Qostanaıdyń «Tobyly» Eýropa lıgasynda jetinshi márte baq synaıdy. Aıta keterligi, «Tobyl» 2011/2012 jylǵy kezeńde  Chempıondar lıgasynyń ekinshi irikteý kezeńinen árige asa alǵan joq.

Bıylǵy Eýropa lıgasy birinshi irikteý kezeńiniń oıyndary 11 jáne 18 shilde kúnderi ótkiziledi.

Esterińizge sala ketelik, jerebe tartý rásimi búgin Nur-Sultan ýaqytymen saǵat 18.30-da bastalady.

  

 

 

Avtor Ádiljan Úmbet
Basty sózder: Qoǵam, Sport,
Joǵary qaraı