Aýa raıy
Astana 17 °S
Almaty 16 °S
valıýta baǵamy
USD 386.82
EUR 428.67
RUB 5.86
CNY 54.95

Bolgarııadaǵy týrnırde 5 qazaqstandyq boksshy «altyn» úshin talasady

2019 jyldyń 19 aqpan 2019 10:15 1965

ASTANA. QazAqparat - Bolgarııa astanasy Sofııada ótip jatqan «Strandja» halyqaralyq týrnırinde bes qazaqstandyq boksshy fınalǵa shyqty, dep habarlaıdy QazAqparat tilshisi.

Qazaqstannan jartylaı fınalǵa bes boksshy shyqsa, solardyń bári túgeldeı qarsylastaryn jeńdi.

Qazaqstannyń bes dúrkin chempıony Temirtas Júsipov (49 kg) brazılııalyq Leandro Hose Blankty aıqyn basymdylyqpen utty. 60 kg salmaqta Zákir Safıýllın ózbekstandyq Shýnkor Abdýrasýlovty tize búktirdi.

Bolashaǵynan úlken úmit kúttiretin jas boksshy Sanatáli Tóltaev (64 kg) tartysty básekede brazılııalyq Vanderson Olıveırany qapy aldyrdy. «Qazaqtardyń óz salmaǵy» atanyp ketken 69 kelide Abylaıhan Júsipov ýkraınalyq Evgenıı Barabanovty 5:0 esebimen jerge qaratty. 91 kg salmaqta Vasılıı Levıt taǵy bir brazılııalyq Abner Jýnıordan aılasyn asyrdy.

Osylaısha qazaqstandyq bes boksshy altyn júlde úshin talasady.  Fınalda Qazaqstannan bes, Reseı men Ózbekstannan tórt boksshydan rıngke shyǵady. Bul jóninen Qazaqstan quramasy alda tur.

Sonymen, búgin fınalda Temirtas Júsipov pen úndistandyq Amıt (49 kg), Zákir Safıýllın men reseılik Artýr Sýbhankýlov (60 kg), Sanatáli Tóltaev pen reseılik Alekseı Mazýr (64 kg), Abylaıhan Júsipov pen ózbekstandyq Bobo-Ýsmon Botýrov (69 kg) jáne Vasılıı Levıt pen taǵy bir reseılik Sadam Magomedov (91 kg) bas júldeni sarapqa salady.

Eske sala keteıik, budan buryn alty qazaqstandyq boksshynyń shırek, keıin beseýiniń jartylaı fınalǵa shyqqanyn jazǵan bolatynbyz.

 

Foto: kfb.kz

 

 

Avtor Eljan Eraly
Basty sózder: Sport,
Joǵary qaraı