Aýa raıy
Astana 10 °S
Almaty 20 °S
valıýta baǵamy
USD 389.59
EUR 429.06
RUB 6.05
CNY 55.07

Beıbit Atamqulov qyrǵyzstandyq áriptesimen yntymaqtastyqty nyǵaıtý máselelerin talqylady

2019 jyldyń 21 mamyr 2019 01:12

BІShKEK. QazAqparat - Qazaqstan Respýblıkasy Syrtqy ister mınıstri Beıbit Atamqulov qyrǵyzstandyq áriptesi Chıngız Aıdarbekovpen eki memleket qarym-qatynasyndaǵy keń aýqymdy máselelerdi talqylady, dep habarlaıdy QazAqparat QR SІM-ge silteme jasap.

Buǵan deıin habarlaǵanymyzdaı, QR Syrtqy ister mınıstriniń Qyrǵyz Respýblıkasyna resmı sapary «Qordaı» baqylaý-ótkizý pýnktiniń jumysymen tanysýdan bastaldy.

Shekarada Qazaqstan SІM basshysyn Qyrǵyz Respýblıkasynyń Syrtqy ister mınıstri Chıngız Aıdarbekov qarsy aldy. Olar eki memleket shekara qyzmetteriniń basshylary Darhan Dilmanov jáne Ýlarbek Sharsheevpen birge shekaralyq ótkelderde azamattar men kólik quraldaryn ótkizýge qatysty aǵymdaǵy jaǵdaıdy talqylady.





Mınıstrlerdiń kelissózderi Qyrǵyzstan astanasy Bishkekte jalǵasyp, olardyń barysynda eki memleket qatynastarynyń keń aýqymdy máseleleri qaraldy.

«Kelissózderdiń kún tártibi óte mazmundy boldy jáne taraptarǵa saıası, saýda-ekonomıkalyq jáne mádenı-gýmanıtarlyq yntymaqtastyqtyń barlyq ózekti máselelerin, sondaı-aq transshekaralyq ózenderdi birlesip paıdalaný, sý-energetıkalyq yntymaqtastyq, Eýrazııalyq ekonomıkalyq odaq sheńberinde fıtosanıtarlyq jáne veterınarlyq baqylaý shekteýlerin alyp tastaý máselelerin egjeı-tegjeıli talqylaýǵa múmkindik berdi. Halyqaralyq kún tártibindegi kóptegen máseleler boıynsha ustanymdardyń jaqyndyǵy atap ótildi jáne BUU, Shanhaı yntymaqtastyq uıymy (ShYU), Ujymdyq qaýipsizdik týraly shart uıymy, TMD, Islam yntymaqtastyq uıymy jáne basqa da qurylymdar sheńberindegi ózara tıimdi yntymaqtastyqtyń mańyzdylyǵy atap ótildi», - delingen QR SІM aqparatynda.

Qazaqstan Qyrǵyzstandy aımaqtaǵy jaqsy kórshi jáne mańyzdy seriktes retinde ǵana emes, baýyrlas memleket retinde qarastyrady. «Qazaqstannyń Tuńǵysh Prezıdenti - Elbasy Nursultan Nazarbaev tarıhy, dini, mádenıeti mentalıteti bir Qazaqstan men Qyrǵyzstanǵa Qudaıdyń ózi birge bolýǵa, bir-birine kómektesýge jáne óńirdiń qaýipsizdigin birge qamtamasyz etýge tapsyrǵan bolatyn», - dedi B. Atamqulov.

Bizdiń elderimiz arasynda qandaı da bir saıası kelispeýshilikter joq. Memleket basshysy Qasym-Jomart Toqaev Qyrǵyzstanmen tatý kórshilik jáne senimdi qarym-qatynastardy nyǵaıtý saıasatyn jalǵastyrýǵa nıetti, dep qosty Qazaqstan SІM basshysy.

Qyrǵyzstan Syrtqy ister mınıstri Ch. Aıdarbekov Qazaqstan SІM basshysynyń Qyrǵyzstanǵa alǵashqy resmı sapary eki el arasyndaǵy dostyq jáne odaqtastyq qarym-qatynastardyń aıǵaǵy bolyp tabylatynyn atap ótti. «Búgingi tańda memleketaralyq baılanystar barlyq deńgeıde de qarqyndy damyp kelýde. Bizdiń memleket basshylary jylyna birneshe ret kezdesedi. Mınıstrlikter men vedomstvolar kórshiles memleketter arasynda týyndaıtyn máselelerdi sheshedi. Biz ekijaqty sıpattaǵy máselelerdi sheshýdiń birlesken joldaryn izdeýge daıynbyz», - dedi qyrǵyz mınıstri.





Qyrǵyzstannyń EAEO-ǵa kirýimen saýda-ekonomıkalyq jáne ınvestıtsııalyq yntymaqtastyqty keńeıtý úshin úlken múmkindikter ashylýda. Taraptar ózara saýdadaǵy oń dınamıkany qanaǵattanýshylyqpen atap ótti. Qazaqstan men Qyrǵyzstan arasyndaǵy ekijaqty saýda aınalymynyń kólemi 2018 jyly 13,1% ósip, 865,3 mln AQSh dollaryn qurady. Eki memleket kóshbasshylarymen taýar aınalymy kólemin 2020 jylǵa qaraı 1 mlrd AQSh dollarǵa deıin ulǵaıtý jóninde mindet qoıylǵan.

Osy mindetti iske asyrý maqsatynda qazaqstandyq kompanııalar mashına jasaý, metallýrgııa, azyq-túlik salasy, qurylys materıaldary jáne hımııa ónimderi sııaqty salalarda eksport nomenklatýrasyn keńeıtýge daıyn. Sondaı-aq sharýashylyq júrgizýshi sýbektiler arasyndaǵy ózara saýda men tikeleı baılanystardy damytý maqsatynda Qazaqstan-qyrǵyz iskerlik keńesiniń múmkindikterin barynsha iske qosýǵa ýaǵdalastyqqa qol jetkizildi.

Ózekti máselelerdi keshendi sheshý boıynsha 50 is-sharadan turatyn eki jaqty ekonomıkalyq yntymaqtastyq máseleleri boıynsha Jol kartasyn sapaly júzege asyrýǵa erekshe nazar aýdarý usynyldy.

Investıtsııalyq salada tıimdi yntymaqtastyq júzege asyrylýda. Qazaqstan Qyrǵyzstannyń mańyzdy ınvestıtsııalyq seriktesteriniń biri bolyp tabylady. Jalpy 2005 jyldan bastap Qyrǵyzstanǵa 700 mln. AQSh dollardan astam ınvestıtsııa quıyldy. Qazaqstan tarapy «Kazakh Invest» jáne «Kazakh Export» kompanııalardyń quraldaryn belsendi iske qosý ınvestıtsııalyq-eksporttyq yntymaqtastyqty keńeıtý úshin úlken perspektıvalar ashatynyn atap ótti.

Elimiz Qyrǵyzstanǵa qazaqstandyq KazSat spýtnıkteri arqyly spýtnıktik baılanys qyzmetterin paıdalaný jáne keń aýqymdy is-qımyl aýmaǵynyń ǵaryshtyq monıtorıngi múmkindigin qarastyrýdy usyndy.

Kelissózder barysynda sondaı-aq Qyrǵyzstannan jekelegen azyq-túlik taýarlaryn ákelýge ýaqytsha karantındik fıtosanıtarlyq jáne veterınarlyq shekteý sharalaryn alyp tastaý máseleleri qozǵaldy. Qazaqstan men Qyrǵyzstannyń quzyretti organdary osy baǵytta tyǵyz birlesken jumys júrgizip otyrǵandyǵy týraly atap ótildi.

Qazaqstannyń syrtqy saıası vedomstvosynyń basshysy 2019 jyly 29 mamyrda Nur-Sultan qalasynda Eýrazııalyq ekonomıkalyq odaqtyń mereıtoılyq sammıti ótetindigin habarlady. Qyrǵyz tarapy el Prezıdenti Sooronbaı Jeenbekovtiń osy sammıtke qatysýyn rastady.

Sonymen qatar taraptar halyqaralyq qurylymdar men birlestikter, atap aıtqanda ShYU, Ortalyq Azııadaǵy ıAdrolyq qarýdan azat aımaq, esirtkiniń zańsyz aınalymyna qarsy is-qımyl salasyndaǵy Ortalyq Azııa óńirlik aqparattyq úılestirý ortalyǵy jáne Azyq-túlik qaýipsizdigi jónindegi Islam uıymy sheńberindegi ózara is-qımyl máseleleri talqylandy.

Kelissózder qorytyndysy boıynsha Shekaralyq ókilderdiń qyzmet etý ýchaskeleri týraly úkimetaralyq hattamaǵa, sondaı-aq 2019-2020 jyldarǵa arnalǵan Qazaqstan Respýblıkasy jáne Qyrǵyz Respýblıkasy Syrtqy ister mınıstrlikteri arasyndaǵy yntymaqtastyq baǵdarlamasyna qol qoıyldy.

Sapar aıasynda Qazaqstan delegatsııasynyń basshysy Shyńǵys Aıtmatov atyndaǵy murajaı-úıinde bolyp, qyrǵyz jazýshysy eskertkishine gúl shoqtaryn qoıdy.

Qazaqstan men Qyrǵyzstan kóp ǵasyrlyq tarıhy bar tyǵyz gýmanıtarlyq baılanystardy biriktiredi. Bul baǵytta bizdiń elderimiz úlken jumys atqarýda. 2018 jyly uly jazýshynyń 90 jyldyǵy keńinen atap ótildi. Nur-Sultanda Sh. Aıtmatov atyndaǵy kóshe ashyldy, sondaı-aq onyń mereıtoıy qurmetine halyqaralyq forým ótkizilgen. Qazirgi ýaqytta Qazaqstan elordasynda Sh. Aıtmatov qurmetine eskertkish ornatý jumystary júrgizilýde.

Joǵary qaraı