Aýa raıy
Astana 8 °S
Almaty 9 °S
valıýta baǵamy
USD 389.98
EUR 434.01
RUB 6.10
CNY 55.04

Batys Qazaqstanda aqyn Sháńgereı Bókeevtiń mýzeıi ashyldy

2019 jyldyń 20 mamyr 2019 22:16

ORAL. QazAqparat - Tarıhı Bókeı ordasy aýdanyndaǵy Han ordasy aýylynda qazaq ádebıetiniń kórnekti ókili, aqyn Sháńgereı Bókeevtiń mýzeıi ashyldy, dep habarlaıdy QazAqparat tilshisi.

Jańa mýzeı Han ordasy tarıhı-mádenı, arhıtektýralyq-etnografııalyq mýzeı-qoryǵynyń quramynda otaý tikti.

Onyń ashylý saltanatyna BQO-ǵa jumys saparymen kelgen Senat depýtattary Birǵanym Áıtimova, Baqytjan Jumaǵulov, Sergeı Ershov, Murat Baqtııaruly qatysty.

«Elimizdiń tarıhynda osy óńirde han bolyp, qaramaǵyndaǵy halqyn órkenıetke jetelegen Jáńgirdiń orny aıryqsha. Onyń turǵan jerin, aıshyqty izi qalǵan saraıyn, tuńǵysh qarý-jaraq mýzeıi men meshitin, basqa da ǵımarattaryn kózben kórý - kez kelgen qazaq úshin qýanysh. Endi soǵan Jáńgir hannyń nemeresi Sháńgereı Bókeevtiń ádebı-memorıaldyq mýzeıi qosylyp otyr. Aqyn týraly derekter, túrli jazbalary men fotosýretteri arqyly kıeli murany keıingi urpaqqa dáripteýge tolyq bolady», dedi óz sózinde Birǵanym Saryqyz.

Sháńgereı Seıitkereıuly (1847-1920) - klassıkalyq óleńder jazǵan aqyn ǵana emes, qazaq dalasynda baspasóz isin damytýǵa erekshe eńbek sińirgen metsenat deýge bolady. Ol 1911 jyly ózi bastamashy bolyp, Baqytjan Qarataev, Ǵumar Qarash, Eleýsin Buırın, Ǵabdolǵazız Musaǵalıevtiń qoldaýymen «Qazaqstan» gazetin ashty. Patshalyq dáýirdiń qylyshynan qan tamyp turǵan mezgildi «Qazaqstan» ataýyn resmı túrda alǵash engizdi.

Sháńgereı Bókeev ataqonysy Kólborsyda ómir keship, aǵartýshylyqpen, ańshylyq-saıatshylyqpen aınalysty. Óziniń sáýletti úıine qosa mektep, medrese salyp, meshit turǵyzdy. Ustaz ustap, bala oqytty. Aınalasyna kúıshi-ánshilerdi jınap, olardy qýattap, qoldap otyrdy. Orys klassıkteriniń shyǵarmalaryn aýdarǵan aqyn sonymen qatar kásibı fotograf bolǵan. Onyń óshpeıtin sol sýretteri mýzeı kórmesinen oryn aldy.

Joǵary qaraı