Aýa raıy
Astana -2 °S
Almaty 4 °S
valıýta baǵamy
USD 389.98
EUR 434.01
RUB 6.10
CNY 55.04

Aıdos Erbosynuly - WBA International tıtýlynyń ıegeri

2019 jyldyń 25 naýryz 2019 01:25

NUR-SULTAN. QazAqparat - Almaty Arena sport kesheninde ótip jatqan boks keshinde Aıdos Erbosynuly WBA International chempıony atandy. Osylaısha ol WBO Global, WBC Asia jáne WBA International belbeýlerin ıelendi, dep habarlaıdy QazAqparat tilshisi.

Úsh belbeý sarapqa salynǵan jekpe-jekte Aıdosqa «Talqandaýshy» (Demolisher) degen atpen tanylǵan namıbııalyq boksshy Lýkas Ndafolýma (15-1, 6 KO) qarsylas bolǵan edi. Alǵashqy raýnd qarsylastardyń ańdysa soqqy jumsaýymen bastalǵanymen, sońyna taman Aıdos shabýyldy kúsheıtip, soqqylaryn daryta aldy. Ekinshi raýnd alma-kezek soqqy almasýmen jalǵasty. Úshinshi raýndta boksshylar teń dárejede óner kórsetti. Shabýylda qorǵanyp, qorǵana júrip judyryqtasty da. Alaıda, ókinishke qaraı raýnd sońynda Aıdostyń sol jaq qabaǵy jarylyp, qan saýlady. Abyroı bolǵanda, úzilis kezinde Aıdostyń bapkerleri qandy toqtatty.

Osydan keıin qazaq boksshysy ashyq aıqasqa kóship, qorǵanysty umytty. Sonyń saldarynan qarsylasynyń birneshe soqqysyn jedi. Besinshi raýndta tizgindi qaıta qolǵa alǵan Aıdos qarsylasynyń baýyrynan, búıirinen dóp soqqylaryn daryta aldy. Munan keıingi raýndtar da barynsha tartysty ótti. Boksshylar ashyq aıqasqa da shyǵyp, bir-birine dál soqqylar jumsaı aldy. Degenmen 10 raýndtyń qorytyndysynda tóreshiler sheshimimen Aıdos jeńiske jetti.

Jeńimpazdy marapattaý saltanatynda sharshy alańǵa kóterilgen Almaty qalasynyń ákimi Baýyrjan Baıbek: «Qazaqtyń batyrlary máńgi bolsyn! Elimiz aman, jurtymyz tynysh, osyndaı jeńisterimiz kóp bolsyn. Qazaqstannyń kók baıraǵy jelbireı bersin»,- degen tilegin jetkizdi.

Al Aıdos Erbosynuly búgingi jeńisin ulystyń uly kúni - Naýryz meıramyna arnaıtynyn atap ótti.

«Sizderdiń naǵyz jankúıer bolǵandaryńyzdy rıngte sezindim. Ol maǵan kúsh-qýat berdi. Jekpe-jek qıyndaý boldy. Óıtkeni qarsylasym - 16 jekpe-jektiń bireýinde ǵana jeńilgen tájirıbeli sportshy», - dedi WBA International chempıony.

Eske sala keteıik, Máskeýdiń «Krylıa Sovetov» sport kesheninde ótkizgen sońǵy jekpe-jeginde Aıdos belgııalyq Ilıas Achergýıdi (12-4-1, 6 KO) jeńip, WBO Global belbeýin ıelengen bolatyn.

Avtor Marlan Jıembaı
Basty sózder: Boks, Sport,
Joǵary qaraı