Aýa raıy
Astana 8 °S
Almaty 14 °S
valıýta baǵamy
USD 389.98
EUR 434.01
RUB 6.10
CNY 55.04

Atyraýda qazaqsha án aıtatyn fılıppındik shyǵarmashylyq keshin ótkizýdi armandaıdy

2019 jyldyń 19 aqpan 2019 13:34

ATYRAÝ. QazAqparat - Atyraýda fılıppın azamaty qazaqsha án salyp júr, dep habarlaıdy QazAqparat tilshisi.

Oblystaǵy Nazarbaev Zııatkerlik mektebiniń matematıka páni muǵalimi Foman de Lakrýz birneshe jyldan beri qazaq tilin úırenip júr.


null

Qazaqstanǵa osydan 5 jyl buryn jumysqa ornalasýǵa kelgen Foman áýeli Qaraǵandy qalasyndaǵy Nazarbaev Zııatkerlik mektebinde oqýshylarǵa dáris oqyǵan. Alaıda, túrli jaǵdaılarǵa baılanysty, eldiń munaıly ólkege qonystanady.

Foman de Lakrýz az ýaqyttyń ishinde qazaq tilin meńgergen. Kúndelikti jumysta memlekettik tildi qoldanatyn ol otandyq estrada ánshilerin súıip tyńdaıdy. Onyń repertýarynda Ǵadilbek Jańaıdyń «Hanshaıymy», Qurmash Mahanovtyń «Adam bop jaralǵan soń» syndy týyndylary bar. Ereksheligi de sol, fılıppındik meıman ánderdi jatqa jáne jandy daýysta oryndaǵandy jany súıedi.

Al jýyrda aımaqtaǵy zııatkerlik mekteptiń uıymdastyrýymen besinshi ret ótken «NISh Faktor» mýzykalyq baıqaýynda matematıka pániniń halyqaralyq muǵalimi Ashamataı men Armannyń «Jaralamaǵyn» ánin oryndap kópshilikti súısindirdi. Onyń qazaq tilinde oryndaǵan áni jelide tez tarap, birneshe saǵatta myńdaǵan adam kórgen.

«Bul ándi men birden unattym. Mýzykalyq arnalarda jıi júretin áýendi jattap alǵym keldi. Maǵan bar bolǵany bir apta jetkilikti boldy. Osylaısha men óz repertýaryma taǵy bir jańa qazaqsha ándi qostym», - deıdi Fılıppın elinen kelgen matematıka pániniń muǵalimi Foman de Lakrýz.


null

Shetelden kelgen ónerli ustaz qazaq tilinen bólek, óziniń ana tilinde, sondaı-aq orys, aǵylshyn jáne frantsýz tilderinde de án aıtady. Talaı márte qazaqtyń toıynda kóptiń kóńilin kótergen ol, ultymyzda ónerge degen qurmet erekshe deıdi.

«Men áriptesterimmen birge toıda, ujymdyq dýmanda án aıtqandy jaqsy kóremin. Eger birneshe án aıtsam eń áýeli qazaq tilindegi ánderden bastaımyn. Sodan soń orys, aǵylshyn tilderinde oryndaımyn. Bul meniń qazaq eline, ánsúıer qaýymǵa, óz áriptesterime kórsetken qurmetim. Jalpy qazaqtar óte darhan, baýyrmal halyq. Toı jıyndarynda talaı án aıtqanymda maǵan syılyqqa aqsha beretin. Men muny bastapqyda túsinbeıtinmin. Ónerdi satpaımyn. Onyń ústine keıde oryndalǵan án kóńilimnen shyqpaı jatyrsa ol úshin jurttan aqy alý maǵan yńǵaısyz»,- deıdi Foman.

Áńgime barysynda sheteldik ustaz óziniń saıahattaǵan memleketterinde de qazaq tilinde án shyrqap, bizdiń ana tilimizdi ózgelerge tanystyryp júrgenin aıtady. Osylaısha qazaq tilin tek óz elimizde emes, ózgelerge de ásem ánmen sýsyndatyp júrgen ustazdyń armany jeke shyǵarmashylyq keshin ótkizý. Al ol úshin árıne qomaqty qarajat jáne avtorlyq áýenderdiń bolǵany da durys deıdi suhbat keıipkeri.




null

Avtor Abaı Abylaıuly
Basty sózder: Mádenıet, Atyraý oblysy, Til,
Joǵary qaraı