Aýa raıy
Astana 15 °S
Almaty 10 °S
valıýta baǵamy
USD 386.82
EUR 428.67
RUB 5.86
CNY 54.95

«Astana Balet» áıelder merekesine tartý jasamaqshy

2019 jyldyń 19 aqpan 2019 05:21 1714

ASTANA. QazAqparat - Halyqaralyq áıelder kúnine oraı, «Astana Balet» teatry elorda turǵyndary men qonaqtaryna arnap tartý jasamaqshy. Tórt aktili balettiń biri «Balanchın murageri» atalyp ketken kemeńger-horeograftyń týyndysy ári álemdik balet jaýhary.

Qazirgi zamannyń ańyzǵa aınalǵan adamy, amerıkalyq horeograf Ýılıam Forsaıttyń «In the Middle, Somewhat Elevated» («Ortadan sál joǵary») atty týyndysy teatr sahnasynda alǵash 2017 jyldyń 4 qarashasynda kórsetilgen-tuǵyn. Aıta keteıik, bul baletti qazaq sahnasyna alyp shyqqan, horeograftyń úzeńgiles dosy, 12 jyldan astam ýaqyt onymen qatar eńbek etken, horeograftyń mýzasy bolǵan Agnes Noltenıýs.

Aıta keteıik, ǵasyrlar toǵysynda oryn alǵan balet ónerindegi revolıýtsııa osy horeograftyń esimimen baılanystyrylady. Onyń horeografııasy gravıtatsııa ataýlynyń ózine kúmánmen qaraýǵa májbúr etti. Al, adam múmkindiginiń shegindegi dúnıeleri talǵampaz kórermenniń ǵana emes, synshylar qaýymynyń da tańdaıyn qaqtyrdy. Ekstremaldi tehnıka men úzdiksiz qımyl kez-kelgen kórermen kóńilin baýrap áketeri daýsyz.

Osy kúni, sonymen qatar, Brazılııadan shaqyrylǵan horeograf Rıkardo Amaranteniń de týyndylary kórsetilmek. Sonyń ishinde, «A Fuego Lento» jáne «Love Fear Loss» spektaklderi bar. Olar Flandrııa Koroldik baletine arnap jasalyp, «Astana Balet» sahnasyna aýystyryldy.

«A Fuego Lento» nemese («Baıaý jalyn») - mahabbat men qushtarlyq sezimi alǵash boıyńyzdy bılegen kúıdi sıpattaıdy. Sát saıyn kúsheıetin ishki qýat pen emotsııalyq kóńil-kúı - osynyń bári ishińizde jalyndaı alaýlaıdy. Bul balettiń ár sahnasy sezimtal tango yrǵaǵyna kómkerilgen qusharlyqqa toly.

Áıgili horeograftyń «Love Fear Loss» baleti «Mahabbat. Úreı. Aıyrylý.» dep aýdarylady. Bul balet frantsýz ánshisi Edıt Pıaftyń kúrdeli taǵdyry men baıansyz mahabbatyna arnalǵan.

Rıkardo Amaranteniń tyń ári óte qyzyqty týyndysy «Silent Voices» neoklassıkalyq baleti «Sybyr», «Uıań dybystar» degen maǵynany bildiredi. Bul balet tuńǵysh ret «Astana Balet» sahnasynda kórermen nazaryna tartý etilmek. Horeograftyń aıtýynsha, bul qoıylymda avstrııalyq kompozıtor Frants Shýberttiń ishekti aspaptar kvartetine arnalǵan №14 re mınor «Ajal jáne arý» atty týyndysy qoldanylǵan. Ol mýzykadaǵy romantızmniń negizin qalaýshylardyń biri.

Plastıkalyq tildiń kúshimen horeograf adam balasynyń ishki daýystary - kózge ilinbes suhbattasyń, adam balasynyń ishki kúıin dál sıpattaıtyn kúdik pen úreı, úmit men kúmán aralas kúı syndy sezimder. Oryndaýshylardyń dene qımyly men jaryq júıesiniń kúshimen horeograf emotsıalyq mazmuny tereń, sonymen qatar, tolysqan bı dramatýrgııasyn sahnaǵa alyp shyqpaq. Rıkardo Amaranteniń barlyq qoıylymdary kórermen tarapynan zor qoshemetpen qabyldanatynyn aıta ketken jón.

 

 

Basty sózder: Nur-Sultan, Mádenıet,
Joǵary qaraı