Aýa raıy
Astana 5 °S
Almaty 15 °S
valıýta baǵamy
USD 389.75
EUR 434.26
RUB 6.12
CNY 55.05

Asqar Mamın Tatarstanda Dmıtrıı Medvedevpen kezdesti

2019 jyldyń 22 tamyz 2019 21:34

QAZAN. QazAqparat – Qazaqstan Respýblıkasynyń Premer-Mınıstri Asqar Mamın jumys saparymen Reseı Federatsııasyna bardy, dep habarlaıdy QazAqparat Premer-Mınıstrdiń baspasóz qyzmetine silteme jasap.

Tatarstanda Asqar Mamın RF Úkimetiniń Tóraǵasy Dmıtrıı Medvedevpen kezdesti. Eki eldiń Premer-Mınıstrleri Qazaqstannyń Tuńǵysh Prezıdenti – Elbasy Nursultan Nazarbaev pen Reseı Prezıdenti Vladımır Pýtın negizin salyp, damytqan strategııalyq áriptestik pen odaqtastyqtyń joǵary deńgeıin atap ótti. Taraptar bıyl sáýir aıynda QR Prezıdenti Qasym-Jomart Toqaevtyń Reseıge resmı sapary aıasynda qol jetkizilgen kelisimderdi iske asyrý barysyn talqylady.





Úkimetaralyq kelicsózder saýda-ekonomıkalyq, ınvestıtsııalyq yntymaqtastyqty, ónerkásiptik kooperatsııany odan ári arttyrýǵa, energetıka, aýyl sharýashylyǵy, kólik salalaryndaǵy ózara is-qımyl máselelerine arnaldy. Kezdesýde sonymen qatar shekara mańy jáne ıntegratsııalyq yntymaqtastyqtyń ózekti máseleleri qaraldy.

Reseı — Qazaqstannyń basty saýda seriktesi. Ótken jyly eki jaqty saýda kólemi 13%-ǵa artyp, $18,5 mlrd-qa jetti. 2019 jylǵy jarty jyldyqtyń qorytyndysy boıynsha taýar aınalymy $8,8 mlrd qurady.

«Jetkiziletin taýarlar men qyzmetterdiń nomenklatýrasyn keńeıtý, bizdiń bıznes-qaýymdastyqtar arasynda tikeleı baılanys ornatý, sondaı-aq, úshinshi elder naryqtaryna taýarlardy ilgeriletý boıynsha birlesken jumystardy jalǵastyrý qajet», — dep Asqar Mamın, reseılik naryqqa 60-tan astam pozıtsııa boıynsha qazaqstandyq taýarlardy jetkizýdiń joǵary áleýetin atap ótti.

Qazaqstandyq-reseılik yntymaqtastyqtyń basty baǵyttarynyń biri — ónerkásiptik kooperatsııa.

Jumys sapary barysynda QR Premer-Mınıstri Tatarstannyń aldyńǵy qatarly ónerkásiptik kásiporyndaryn, atap aıtqanda, «KAMAZ» JAQ-ty aralady.

QR jáne RF-tiń ónerkásiptik kooperatsııa salasyndaǵy Birlesken is-qımyl baǵdarlamasy aıasynda «Agromashholdıng KZ» qazaqstandyq kompanııasy men «KAMAZ» birlesip birqatar jobalardy júzege asyrýda, onyń ishinde júk avtomobılderiniń beldikteriniń redýktorlaryn jáne arnaıy tehnıka óndiretin zaýyt qurylysy bar.








Buǵan qosa, Asqar Mamın «Tatneft» kompanııalar tobyna kiretin «Taneko» munaı óńdeý zaýytyna bardy. Tatarstan astanasynda QR Úkimetiniń basshysy Qazan tikushaq zaýytynda bolyp, «Hımgrad» tehnopolısin aralady.








Qazanda Asqar Mamın «Wildberries» jetekshi reseılik halyqaralyq ınternet dúkeniniń bas dırektory Tatıana Bakalchýkpen kezdesý ótkizdi, onda kompanııanyń Qazaqstanda saýda-logıstıkalyq ortalyqtardy salý jáne bıznesti keńeıtý jónindegi josparlary talqylandy.

Kelissózderdiń qorytyndysy boıynsha «Astana» halyqaralyq qarjy ortalyǵy men «Wildberries» kompanııasy arasynda Ózara túsinistik týraly memorandýmǵa qol qoıyldy, sondaı-aq, AHQO qatysýshysy retinde «Wildberries» tirkelý týraly sertıfıkat berildi.








Jumys sapary aıasynda Qazaqstan Premer-Mınıstri Asqar Mamın Reseı Úkimetiniń basshysy Dmıtrıı Medvedevpen birge «WORLDSKILLS KAZAN 2019» chempıonatynyń ashylý saltanatyna qatysty. Chempıonat qarsańynda Asqar Mamın WorldSkills standarttary boıynsha kásibı sheberlikten Qazaqstannyń ulttyq quramasymen kezdesip, olarǵa jarystarda sáttilik tiledi.

Joǵary qaraı