Aýa raıy
Astana 12 °S
Almaty 20 °S
valıýta baǵamy
USD 386.70
EUR 427.15
RUB 6.06
CNY 54.57

Qazaqtyń salt-dástúri týraly kórsetilim Polshada arnaıy júldege ıe boldy

2019 jyldyń 19 shilde 2019 00:01

NUR-SULTAN. QazAqparat – Polshada 1967 jyldan beri ótip kele jatqan halyqaralyq «Faces of Traditions» ulttyq salt-dástúrler baıqaýyna Qazaqstan bıyl alǵash ret qatysyp, arnaıy júldege ıe boldy. Osy tusta baıqaýǵa qatysýǵa ótinim berip, elimizdiń atynan barǵan komandany uıymdastyrýshy Aqbota Qalıevamen QazAqparat tilshisi suhbattasqan bolatyn.

«Atalǵan baıqaý Polshanyń batys aımaǵyndaǵy Zelena-Gýra qalasynda jarty ǵasyrdan astam ýaqyt turaqty túrde ótip keledi. «Faces of Traditions» baıqaýynda árbir qatysýshy memleket óziniń ulttyq salt-dástúri men qundylyqtaryn qoıylym, óner jáne ulttyq taǵamdar men oıyn arqyly kórsetedi. Qazaqstan óz kezeginde bul baıqaýǵa alǵash ret qatysty. Jalpy baıqaýǵa álemniń 70-ke jýyq elinen ótinim kelip túsken. Ádilqazylar alqasy sonyń ishinen tek 6 eldi (Lıtva, Slovakııa, Ýkraına, Polsha, Rýmynııa jáne Qazaqstan) aqtyq synǵa tańdap aldy. Onyń ishinde Qazaqstan da bar. Baıqaýǵa ótinim berip alyp, biraz ýaqyt demeýshi izdedik. Nátıjesinde Almaty oblystyq týrızm basqarmasy qoldaý bildirdi», - dedi «Sarbaz rýhy» tarıhı-patrıottyń klýbynyń ókili, baıqaýǵa Qazaqstan komandasynyń qatysýyna uıytqy bolǵan Aqbota Qalıeva.





Onyń aıtýynsha, ásirese eýropalyqtar Uly Dalanyń mahabbat hıkaıasy qoıylymyn erekshe yqylaspen qabyl alǵan. Onda Aısulý men Medettiń sezimderi jaıly baıandalady. Jáne hıkaıa «Balqash» eposynyń negizinde jazylǵan.





«Baıqaýdyń alǵashqy kúni ulttyq taǵamdar sheberligi uıymdastyryldy, onda biz baýyrsaq, jent jáne irimshikti usyndyq. Qazaqtyń et taǵamy nege bolmady deseńiz, sebebi bizge shekteýli ýaqyt berdi, sondyqtan ony daıyndaýǵa múmkindik bolmady. Odan soń ulttyq oıyndarǵa kezek keldi, onda biz arqan tartý, asyq atý jáne qazaq kúresin kórsettik. Odan bólek, ózimizdiń besikke salý men tusaýkeser dástúrimizdi ortaǵa saldyq. Baıqaýdaǵy basty qoıylym ol Aısulý men Medettiń seziminiń negizinde quralǵan Uly Dalanyń mahabbat hıkaıasy týraly qoıylym boldy. Bir aptaǵa sozylǵan baıqaý nátıjesinde Qazaqstan komandasy arnaıy júlde ıelendi. Komanda quramynda barlyǵy 15 adam boldy», - dedi ol.




A. Qalıevanyń sózine sensek «Sarbaz rýhy» tarıhı-patrıottyń klýby buǵan deıin de Qazaqstannyń atynan birneshe halyqaralyq baıqaý, festıvalge qatysyp, ulttyq qundylyqtarymyzdy dáriptep júr.





Avtor Álı Ibraev
Basty sózder: Eýropa, Mádenıet, Óner,
Joǵary qaraı