Aýa raıy
Astana 14 °S
Almaty 22 °S
valıýta baǵamy
USD 389.52
EUR 429.21
RUB 6.07
CNY 54.94

Túrkistan oblysynda Polıtsııa departamentiniń keńsesi ashyldy

2019 jyldyń 23 aqpan 2019 01:55

TÚRKІSTAN. QazAqparat - Túrkistan qalasynda Polıtsııa departamentiniń janynan azamattardy qabyldaýǵa arnalǵan halyqtyq keńse (front-ofıs) ashyldy.

Jańa ǵımarattyń ashylýyna oblys ákimi Janseıit Túımebaev, Polıtsııa departamentiniń bastyǵy Qaırat Dálbekov jáne máslıhat depýtattary, quqyq qorǵaý organdarynyń jetekshileri men BAQ ókilderi qatysty, dep habarlaıdy Túrkistan oblysy ákimdiginiń baspasóz qyzmeti.

Halyqtyń keńse jeke quram jáne tergeý, ákimshilik polıtsııa qurylymymen qamtylǵan. Sondaı-aq, polıtsııa departamenti basshylyǵynyń jeke jáne zańdy tulǵalardyń ókilderin qabyldaý kestesi, jeke jáne zańdy tulǵalardyń ótinishteriniń úlgileri ilingen.

Aptanyń dúısenbisi men juma kúnderi tańǵy saǵat 9:00-den 18:00-ge deıin jumys isteıtin keńsede halyq 5-10 mınýttyń aralyǵynda búkil polıtsııa qyzmetine qatysty suraqtaryna jaýap ala alady.

Kompıýterler ortalyq bazaǵa tirkelgendikten kólikterge qatysty aıyppuldardy da kórý múmkindigi bar. Azamattar keńsede aryz-shaǵymdary qaldyryp, istiń júrgizilý barysyn baqylaı alady. Eń bastysy, turǵyndarǵa kóp kezek kútpeı-aq óz máselelerin sheshýge múmkindik bar. Azamattar tarapynan qoıylǵan suraqtarǵa Jergilikti polıtsııa qyzmetiniń qyzmetkerleri, Ákimshilik polıtsııa basqaramasynyń qyzmetkerleri, anyqtaýshylar, tergeýshiler jáne qujattamamen qamtamasyz etý bóliminiń mamandary jaýap beretin bolady.

Atalǵan nysanda azamattardy qabyldaýǵa barlyq jaǵdaı jasalyp, jedel basqarý ortalyǵymen beınebaqylaý júıesi tartylǵan.

Polıtsııa departamenti qyzmetkerleriniń aıtýynsha, front-ofıstiń ashylýy azamattardan kelip túsetin ótinishterdiń qaralý merzimin qysqartyp, polıtsııa jumysynyń ashyqtyǵyn jáne suraqtardyń jedel sheshilýin qamtamasyz etedi. Sondaı-aq sybaılas jemqorlyqtyń tómendeýine ózindik septigin tıgizedi.

Jańadan ashylǵan ǵımarat jumysymen tanysqan oblys ákimi Janseıit Túımebaev halyqqa qyzmet kórsetýdiń sapasyn taǵy da jetildirý kerektigin atap ótip, keńse jumysyna sáttilik tiledi. Munan soń, óńir basshysy Túrkistan oblystyq polıtsııa departamentiniń Túrkistandaǵy jańa ǵımaratymen tanysty.

Basty sózder: Qoǵam, Túrkistan oblysy,
Joǵary qaraı