Aýa raıy
Astana -2 °S
Almaty 6 °S
valıýta baǵamy
USD 389.98
EUR 434.01
RUB 6.10
CNY 55.04

Jańaqorǵanda 300-deı ýaq mal qyrylyp qaldy - Qyzylorda oblysy

2019 jyldyń 22 aqpan 2019 00:53

JAŃAQORǴAN. QazAqparat - Qyzylorda oblysy Jańaqorǵan aýdanynda aýa raıynyń qolaısyzdyǵynan 300-den astam ýaq mal qyrylyp qaldy, dep habarlaıdy QazAqparat tilshisi.

Jańaqorǵan aýdany ákimdiginiń habarlaýynsha, osyǵan oraı aýdan ákimdiginen arnaıy komıssııa quryldy. Joldyń qolaısyzdyǵynan alǵashynda komıssııa músheleriniń oqıǵa ornyna jetýine múmkindik bolmady. Osyǵan qaraı «Ońtústik óńirlik aeromobıldi jedel qutqarý jasaǵynan» arnaıy tehnıkalar kómekke suratyp alyndy. Arnaıy tehnıkalar kelgennen keıin aýdan ákiminiń ókimimen qurylǵan jumysshy top, sharýa qojalyǵy músheleri, «Ońtústik óńirlik aeromobıldi jedel qutqarý jasaǵy» mamandary oqıǵa bolǵan jerge jetti.

«Jergilikti malshylar qystaýdan jaılaýǵa merziminen erte kóship barǵan. Bul ýaqyt aqpan aıynyń alǵashqy kúnderi edi. Ol ýaqytta aýa raıy jyly bolatyn. Keıinnen aýa raıy kúrt ózgergen», - dep jazylǵan Jańaqorǵan aýdanynyń ákimdigi taratqan habarlamada.




Onda sondaı-aq malshylar qonys etken aımaqta qar qalyń jaýǵandyǵy aıtylǵan. Sonyń saldarynan mal shyǵyny boldy. Atap aıtqanda, «Baqytjan» sharýa qojalyǵynyń ıesi Baqytjan Nálibaev qar astynda qalǵan 250 ýaq malynyń nebári 70-in ǵana taba aldy. Al jeke kásipker Qalmash Sádýova qar astynda qalǵan 57 ýaq maldyń 7-in ǵana tapty. Tabylǵan ýaq maldardyń syrǵasy qulaǵymen birge kesip alyndy. Olar fotosýretke túsirilip jınaqtaldy. Qalǵanyn ýaq maldy qar erimeı tabý múmkin bolmady.




Maldardyń basy qar erigennen keıin komıssııa quramymen qaıta sanalyp esepteledi. Búgingi kúni bul baǵytta eki top jumys jasaýda. Oqıǵa ornyna 2 tirkeme jońyshqa press shóbi jetkizildi.

Budan buryn Qyzylorda oblysynda kóktaıǵaqtyń saldarynan jolda qalǵan 267 adam qutqarylǵan edi.

Joǵary qaraı