Aýa raıy
Astana -1 °S
Almaty 1 °S
valıýta baǵamy
USD 389.75
EUR 434.26
RUB 6.12
CNY 55.05

Qazaqstandaǵy jańa kadrlyq taǵaıyndaýlar

2019 jyldyń 17 aqpan 2019 12:19

ASTANA. QazAqparat - Osy apta ishinde elimizde birqatar kadrlyq taǵaıyndaýlar boldy, dep habarlaıdy QazAqparat tilshisi.

Aptanyń basynda Shyǵys Qazaqstan oblysynyń qarjy basqarmasyna jańa basshy keldi. Atalǵan basqarmanyń basshylyǵyna óńir ákimi Danıal Ahmetovtyń ókimimen Qaırat Shaımardanuly Erembesov taǵaıyndaldy.

Qaırat Shaımardanuly 1975 jyly týǵan. Shyǵys Qazaqstan tehnıkalyq ýnıversıtetinde «Ekonomıka jáne kólik menedjmenti» mamandyǵy boıynsha bilim alǵan.

2001 jyldan bastap Qazaqstan Respýblıkasynyń Qarjy mınıstrligi Qarjylyq baqylaý komıtetiniń Shyǵys Qazaqstan oblysy boıynsha basqarmasynda jumys istedi. Sodan beri, ár jyldary memlekettik qyzmette birneshe laýazymdy qyzmet atqarǵan Q. Erembesov 2015 jyldyń qyrkúıeginen beri Semeı qalasy ákiminiń orynbasary mindetin atqarǵan bolatyn.

***

Dál osy kúni Qazaqstan halqy Aqmola assambleıasy hatshylyǵynyń meńgerýshisi taǵaıyndaldy. Aqmola oblysynyń ákimi Málik Myrzalınniń ókimimen Marzııat ıÝsýpovna Tohaeva Qazaqstan halqy Aqmola assambleıasy hatshylyǵynyń meńgerýshisi bolyp saılandy.

Marzııat Tohaeva 1960 jyly Stepnıak qalasynda týǵan. Kókshetaý ýnıversıtetin támamdaǵan. Memlekettik qyzmette 20 jyldan astam ýaqyt eńbek ótili bar.

Ár jyldary Kókshetaý qalalyq turǵyndardy áleýmettik qoldaý bólimi, Kókshetaý qalasy ákimi apparaty jáne Aqmola oblystyq qarjy basqarmasynda jaýapty qyzmetterde boldy.

2005-2015 jyldary Qazaqstan halqy Aqmola assambleıasy hatshylyǵynda, oblys ákimi apparatynyń ishki saıası jaǵdaılardy taldaý bóliminde qyzmet atqardy.

2015-2018 jyldary Aqmola oblysynyń muraǵattar jáne qujattamalar basqarmasynyń basshysy boldy.

***
Sondaı-aq, bul kúni buǵan deıin elimizdiń QR Іshki ister mınıstri bolǵan Qalmuhanbet Qasymov jańa qyzmetke taǵaıyndaldy.

Elbasy Nursultan Nazarbaevtyń Jarlyǵymen Qasymov Qalmuhanbet Nurmuhanbetuly mınıstr qyzmetinen bosatylyp QR Prezıdentiniń kómekshisi - Qaýipsizdik Keńesiniń hatshysy bolyp taǵaıyndaldy.

Qasymov Qalmuhanbet Nurmuhanbetuly 1957 jyly Almaty oblysy Іle aýdanynyń Dmıtrıevka aýlynda dúnıege kelgen.

Bilimi joǵary, 1979 jyly S.Kırov atyndaǵy Qazaq memlekettik ýnıversıtetiniń zań fakýltetin bitirgen, mamandyǵy - zańger. Polıtsııa general-polkovnıgi.

Eske sala ketsek, Q. Qasymov 2011 jyldyń sáýir aıynan bastap QR Іshki ister mınıstri boldy. Úılengen, úsh balasy bar.

***


Osy kúnniń taǵy bir taǵaıyndaýy Memleket basshysynyń Jarlyǵymen Isataı Baqtııaruly Sartaev basqa jumysqa aýysýyna baılanysty Qazaqstan Respýblıkasy «Syrbar» Syrtqy barlaý qyzmetiniń dırektory qyzmetinen bosatyldy. Bul týraly Aqordanyń baspasóz qyzmetinen málim etken bolatyn. Sondaı-aq Elbasynyń Ókimimen Isataı Baqtııaruly Sartaev - Qazaqstan Respýblıkasy «Syrbar» Syrtqy barlaý qyzmeti dırektorynyń orynbasary qyzmetine taǵaıyndaldy.

***
13 aqpan kúni «Nur Otan» partııasynyń múshesi Nurjan Baýyrjanuly Áltaev Parlament Májilisiniń depýtaty boldy. Óz kezeginde jańadan saılanǵan depýtat jalpy otyrys barysynda ant berdi.

«Qazaqstan halqyna adal qyzmet etýge, Qazaqstan Respýblıkasynyń tutastyǵy men Táýelsizdigin nyǵaıtýǵa, onyń Konstıtýtsııasy men zańdaryna qatań baǵynýǵa, ózime júktelgen mártebeli mindetterdi adal atqarýǵa ant etemin», - dedi N. Áltaev.

Nurjan Baýyrjanuly osyǵan deıin QR Eńbek jáne halyqty áleýmettik qorǵaý vıtse-mınıstri qyzmetin atqardy.

***
Dál osy kúni Pavlodar oblysynyń eki vedomstvosynda basshylar aýysty. Atap aıtqanda, Pavlodar oblysy Jolaýshylar kóligi jáne avtomobıl joldary basqarmasyna Rústem Raısov, al óńirlik Statıstıka departamentine Jeńis Shaqatov basshy boldy.

Pavlodar oblysynyń ákimi Bolat Baqaýov buryn qurylys basqarmasyn basqarǵan R. Raısovtyń aldyna naqty mindetter qoıdy.
Jeńis Shaqatov salyq organdarynda, Pavlodar jáne Ekibastuz qalalary ákimderiniń orynbasary bolǵan. Osynyń aldynda oblystyq Qarjy basqarmasy basshysynyń orynbasary qyzmetin atqardy.

***

Odan bólek, oblys basshysy jýyrda ǵana Qorǵanys isteri jónindegi oblystyq departamenttiń bastyǵy laýazymyna taǵaıyndalǵan Sergeı Kýznetsovty da tanystyrdy. Buǵan deıin ol Qostanaı oblysynda dál osyndaı laýazymdy atqarǵan.

***
Kadrlyq taǵaıyndaý ońtústik aımaqta da oryn aldy. Túrkistan oblysynyń Ordabasy aýdanyna jańa ákim taǵaıyndaldy. Oblys ákimi Janseıit Túımebaevtyń ókimimen bul qyzmetti Joldybaı Qaırat Joldybaıuly atqaratyn boldy.

Qaırat Joldybaıuly 1981 jyly Shardara qalasynda ómirge kelgen.

2003 jyly S. Seıfýllın atyndaǵy Qazaq agrarlyq ýnıversıtetin ekonomıst-menedjer mamandyǵy boıynsha bitirgen. Memlekettik jáne jergilikti basqarý magıstri. Qazaqstan Respýblıkasy Prezıdenti janyndaǵy Memlekettik basqarý akademııasyndaǵy oqýy kezinde AQSh-taǵy Djordjııa ýnıversıtetinde (University of Georgia) bilim alǵan.

Eńbek jolyn 2003 jyly Bilim jáne ǵylym mınıstrliginiń Bıýdjettik josparlaý departamentinde jetekshi maman bolyp bastaǵan.
2005-2008 jyldary Qarjy mınıstrliginiń bas mamany, bólim bastyǵy laýazymdarynda, 2008 jyldan bastap 2016 jylǵa deıin QR Parlamenti Senatynyń apparatynda jumys istep keldi. 2016 jyldan bastap Shardara aýdany ákiminiń orynbasary qyzmetin atqardy.

***

14 aqpannan bastap Úkimet qaýlysymen Eldos Ramazanov QR Mádenıet jáne sport vıtse-mınıstri boldy.

E. Ramazanov 1971 jyly Qaraǵandy qalasynda dúnıege kelgen. M. Lomonosov atyndaǵy Máskeý memlekettik ýnıversıtetin, E. Bóketov atyndaǵy Qaraǵandy memlekettik ýnıversıtetin támamdaǵan.

Eńbek jolyn 1992 jyly bastaǵan. Ár jyldary kommertsııalyq sektorda, ulttyq kompanııalarda jumys istegen. Sońǵy qyzmeti ıaǵnı 2018 jylǵy qazan aıynan bastap - «Dzıýdo federatsııasy» RQB vıtse-prezıdenti.

***


Sonymen qatar, osy kúni Ýılıam Mozer AQSh-tyń Qazaqstandaǵy Elshisi qyzmetine taǵaıyndaldy. Bul týraly elshiliktiń feısbýk paraqshasynda jarııalandy. Ýılıam Mozer ár jyldary AQSh Memlekettik hatshysy kómekshisiniń orynbasary, AQSh-tyń Ýkraınadaǵy Elshiliginiń keńesshisi qyzmetin atqarǵan. Sondaı-aq, Moldovadaǵy elshisi bolǵan.


Sondaı-aq, dál osy kúni Astana qalasy ákiminiń jańa orynbasary saılandy. Bul qyzmetke elorda ákiminiń ókimimen Arman Turlybek keldi.
Arman Alashuly Turlybek - Qaraǵandy oblysynyń týmasy, 1971 jyly 6 mamyrda dúnıege kelgen.

Bilimi ekonomıkalyq jáne tehnıkalyq. Almaty Energetıka jáne baılanys ınstıtýtyn, Qazaq memlekettik basqarý akademııasyn támamdaǵan.
1999 jyldan bastap Qaraǵandy oblysy ákimdiginiń júıesinde Energetıka, baılanys jáne kommýnaldyq sharýashylyq departamentiniń dırektory, Sátbaev qalasynyń ákimi bolyp jumys istedi.

2008 jyldan 2010 jylǵa deıin Qaraǵandy oblysy ákiminiń turǵyn úı-kommýnaldyq sharýashylyq, jolaýshylar kóligi jáne tarıftik saıasat máseleleri jónindegi orynbasary qyzmetin atqardy.

2010-2014 jyldar aralyǵynda Qazaqstan Respýblıkasy Indýstrııa jáne jańa tehnologııalar mınıstrligi Memlekettik energetıkalyq qadaǵalaý komıtetiniń tóraǵasy boldy.

2014-2016 jyldary QR Investıtsııalar jáne damý mınıstrliginde jaýapty qyzmetterdi atqardy. 2016 jyldan bastap Astana qalasy «Saryarqa» aýdanynyń ákimi boldy.

«10 jyl Astana», «Eren eńbegi úshin» medaldary jáne «Qazaqstan Respýblıkasynyń eńbek sińirgen energetıgi» qurmetti tósbelgisimen marapattalǵan. «TMD-nyń eńbek sińirgen energetıgi» qurmetti ataǵy bar.

Úılengen, úsh balasy bar.

***


Odan bólek, 14 aqpan kúni QR Premer-Mınıstriniń birinshi orynbasary Asqar Mamın Túrkistan oblysy ákiminiń jańa birinshi orynbasaryn tanystyrdy.

Túrkistan oblysyn damytý perspektıvalary jónindegi keńeste A. Mamın qurylys, turǵyn úı-kommýnaldyq sharýashylyq jáne ınfraqurylymdy damytý salalarynda mol tájirıbesi bar óńir ákiminiń jańa birinshi orynbasary Qosman Aıtmuhametovty tanystyrdy.
Ol Aqmola oblysynyń ákimi, Astana qalasy ákiminiń orynbasary, Qazaqstan Respýblıkasy óńirlik damý vıtse-mınıstri qyzmetterin atqarǵan.

15 aqpan kúni Nurlan Nurkenov Astana ákiminiń orynbasary bolyp taǵaıyndaldy. Elorda ákiminiń ókimimen taǵaıyndalǵan Nurlan Nurkenov ishki saıasat, jastar saıasaty men aqparat, mádenıet, densaýlyq saqtaý, bilim berý, áleýmettik qorǵaý, dene shynyqtyrý jáne sport salasyna qatysty máselelerge jaýapty bolady.

Nurkenov Nurlan Jańbyrshyuly - Tselınograd qalasynda 1976 jyldyń 3 qarashasynda dúnıege kelgen.

S. Seıfýllın atyndaǵy Aqmola agrarlyq ýnıversıtetin, QR Prezıdenti janyndaǵy Memlekettik basqarý akademııasy Memlekettik saıasattyń ulttyq mektebin, Qaztutyný odaǵynyń Qaraǵandy ekonomıkalyq ýnıversıtetin támamdaǵan.

Eńbek jolyn 1995 jyly «Shamshyraq» HJQ-da menedjer retinde bastaǵan bolatyn. 2017 jyldan bastap QR Prezıdenti Ákimshiliginiń memlekettik ınspektory boldy.

«Astananyń 10 jyldyǵy», «Eren eńbegi úshin» tósbelgilerimen marapattalǵan.

Úılengen, tórt balany tárbıeleýde.

Avtor Álı Ibraev
Basty sózder: Qoǵam, Taǵaıyndaý,
Joǵary qaraı