Aýa raıy
Astana 6 °S
Almaty 13 °S
valıýta baǵamy
USD 389.59
EUR 429.06
RUB 6.05
CNY 55.07

Qordaıda qaraqshylyq jasaǵandar sottaldy

2019 jyldyń 24 qańtar 2019 09:30

TARAZ. QazAqparat - Jambyl oblysynyń qylmystyq ister jónindegi mamandandyrylǵan aýdanaralyq soty eldi shýlatqan «qordaılyq qaraqshylar» isi boıynsha sot talqylaýyn aıaqtady, dep habarlaıdy QazAqparat tilshisi sottyń baspasóz qyzmetine silteme jasap.

2018 jyldyń jeltoqsanynda «qordaılyq qaraqshylardyń» soty bastalǵan bolatyn. Eske sala keteıik, shilde aıynyń sońynda Qordaı aýdanynyń Qordaı aýylynda birqatar qaraqshylyq shabýyldar jasalǵan edi. Dálirek aıtqanda, betperde kıgen belgisiz adamdar jergilikti turǵyndardyń úıine basa-kóktep kirgen. Artynan ıelerin soqqyǵa jyǵyp, aqsha men qundy zattardy talap etken. 68 jastaǵy zeınetker Vladımır Boıko alǵan jaraqattardyń saldarynan aýrýhanada kóz jumyp, onyń zaıyby Lılııa Boıko aýyr jaraqat alǵan. Oblystyq krımınaldyq polıtsııa men Qordaı aýdandyq ishki ister bóliminiń qyzmetkerleri úlken jumys atqaryp, barlyq kúdiktilerdi ustaǵan.

Sot protsesin Jambyl oblysynyń qylmystyq ister jónindegi mamandandyrylǵan aýdanaralyq sotynyń sýdıasy Azamat Tilepov júrgizdi.

Sottalýshylar (40 jastaǵy Sh. Omarov, 34 jastaǵy D. Kýtsevoı jáne 27 jastaǵy M. Sábıtov) «Kúsh qoldana otyryp tonaý, qaraqshylyq jasaý» babymen aıyptaldy. Budan tys, Sh. Omarov kámeletke tolmaǵan qyzdy kórineý zorlady degen aıyp ta taǵylǵan.

Úsh kúdiktiniń ekeýi Qordaı aýdanynyń týmasy, alaıda olar Almatyda turatyn bolyp shyqty. Anyqtalýynsha, olardyń barlyǵy buryn da qaraqshylyq, aqsha bopsalaý, urlyq, adam óltirý jáne zorlaý baptarymen sottalǵan.

Tergeý barysynda olar aıyptaryn tolyq moıyndady. Olarǵa taǵylǵan: aýyr saldarǵa ákep soqtyrǵan qaraqshylyq, adamdar tobynyń aldyn ala sóz baılasýymen jasalǵan, adam óltirý qaýpimen ushtasqan seksýaldyq sıpattaǵy zorlyq-zombylyq áreketteri boıynsha aıyptaýlar dáleldendi.

Jambyl oblysynyń qylmystyq ister jónindegi mamandandyrylǵan aýdanaralyq sotynyń sýdıasy Azamat Tilepov Sh. Omarovty 19 jyl, Kýtsevoıdy 17 jyl, M. Sábıtovti 14 jyl merzimge bas bostandyǵynan aıyrý jazasyna kesti.

Alǵashqy ekeýi qaýipsizdigi barynsha kúsheıtilgen mekemede, al úshinshisi qaýipsizdigi ortasha deńgeıdegi mekemede jazasyn óteıdi.

Basty sózder: Jambyl oblysy, Qylmyspen kúres,
Joǵary qaraı