Aýa raıy
Astana 5 °S
Almaty 6 °S
valıýta baǵamy
USD 389.98
EUR 434.01
RUB 6.10
CNY 55.04

Jýrnalıst ólimi: Aqtóbede lıft jumysyna jaýapty memqyzmetker jazalandy

2019 jyldyń 23 qańtar 2019 23:49

AQTÓBE. QazAqparat - Aqtóbede lıft jumysyn tekserip, der kezinde ákimshilik jaýapkershilikke tartýy tıis mekeme qyzmetkeri tártiptik jazaǵa tartyldy, dep habarlaıdy QazAqparat tilshisi.

QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti Ádep keńesinde lıftke jaýapty sheneýnikterdi jaýapqa tartty. Oblystyq prokýratýranyń basqarmadaǵy aǵa prokýrory Órken Eanovtyń aıtýynsha, Aqtóbe qalasynda 776 lıft bar. Onyń 370-i tirkelgen bolsa, ózgesi esh tirkeýge alynbaı jumys istegen. Barlyǵy 123 lıfttiń qoldaný merzimi ótip ketti.

«Ótken jyldyń sáýir aıynda Aqtóbe qalasyndaǵy turǵyn úılerdiń birinde qaıǵyly oqıǵa tirkeldi. Osy keleńsiz jaǵdaıdan keıin Qylmystyq kodekstiń 306-baby 3 tarmaǵy boıynsha is qozǵalyp, sotta qaralyp jatyr. Oqıǵadan keıin prokýratýra jergilikti atqarýshy organǵa lıftti tekserý, qaıǵyly oqıǵanyń aldyn alýǵa, shara qoldanýǵa tapsyrma bergen bolatyn. Tekserý kezinde komıssııa 462 lıfttiń tek 342-i jyl saıyn tehnıkalyq ruqsat alǵanyn bildi. Barlyǵy 412 lıftte tehnıkalyq tólqujat bar, al 50-de joq. Sol sebepten Aqtóbe oblystyq energetıka jáne turǵyn úı-kommýnaldyq sharýashylyq basqarmasy Indýstrıaldy damý jáne ónerkásiptik qaýipsizdik komıtetiniń oblystyq departamentine shara qoldaný úshin materıaldardy jiberdi. Departament bul bizdiń quzyrymyzǵa kirmeıdi dep hatty keri qaıtarǵan. Sol kezde prokýratýra aralasyp, jaýapty adamdar ákimshilik jaýapkershilikke tartyldy», - dedi prokýror Órken Eanov.

Prokýratýra aralasqan soń Aqtóbe qalasyndaǵy 50 lıft óz jumysyn toqtatyp, 128 lıfttegi tehnıkalyq aqaýdy jóndeýge uıǵarym berildi. 2018 jyldyń 12-19 maýsymynda 23 adam ákimshilik jaýapkershilikke tartyldy. Ádep keńesinde Indýstrıaldy damý jáne ónerkásiptik qaýipsizdik komıtetiniń oblystyq departament basshysynyń orynbasary Baýyrjan Bekeev óz kinásin moıyndap, mundaı is buryn múlde qaralmaǵan soń ne isterin bilmegenin jetkizdi. Ári memlekettik mekemede aqyldasar zańger tappaǵan.

«Buǵan deıin biz dál osyndaı jaǵdaımen betpe bet kelgen joqpyz. Sondyqtan bilmeı qaldyq. Biraq eki aıda shara qoldanylyp, jaýapty adamdar ákimshilik jaýapkershilikke tartyldy», - dedi Baýyrjan Bekeev.

Ádep keńesi Indýstrıaldy damý jáne ónerkásiptik qaýipsizdik komıtetiniń oblystyq departament basshysynyń orynbasary Baýyrjan Bekeevti qyzmetine tolyq saı emes degen usynys jasady.

Eske salsaq, jýrnalıst Aızat Ábdisamat lıftke qysylyp qalyp, oqıǵa ornynda kóz jumdy. Qylmystyq is boıynsha lıftke jaýapty «Janabek servıs» JShS-niń dırektory men mehanık jaýapqa tartylyp, shartty túrde bas bostandyǵynan aıyryldy.

Avtor Altynaı Saǵyndyqova
Basty sózder: Oqıǵa, Aqtóbe oblysy,
Joǵary qaraı