Aýa raıy
Astana -2 °S
Almaty 7 °S
valıýta baǵamy
USD 389.98
EUR 434.01
RUB 6.10
CNY 55.04

14 jasar qostanaılyq Rýbık tekshesin aıaqpen jınaýdan ulttyq rekord ornatty

2018 jyldyń 23 qyrkúıek 2018 09:00

QOSTANAI. QazAqparat - Rýbık tekshesin aıaqpen jınaý boıynsha Qazaqstannyń ulttyq rekordyn ornatqan Erasyl Bolysbek Qostanaıda turady, dep habarlaıdy QazAqparat.

Álemde satylym jaǵynan aldyńǵy orynda turǵan oıynshyq - Rýbık tekshesi. Búginge deıin onyń 400 mln-nan astamy satylǵan degen derek bar.

Tipti, 1987 jyly atalǵan «basqatyrǵyshtyń» 14 mln danasy satylǵan.

Sonymen, bul oıyndy kim oılap tapty? Vengrııalyq sáýletshi Erne Rýbık Býdapesht tehnologııa jáne ekonomıka ýnıversıtetiniń qurylys-arhıtektýralyq fakýltetin bitirip, 5 jyl boıy ǵımarattardy jobalaýmen aınalysqan. Odan keıin ol qoldanbaly óner akademııasyna oqytýshy bolyp jumys isteıdi. Sabaq berý barysynda úsh ólshemdi keńistikti úıretý óte qıyn ekenine kózi jetip, ony ońaı túsindirýdiń jolyn izdeýmen bolady.

Rýbık alǵashynda óz maqsatyna qalaı jetýdi kóp oılandy. Bir kúni ol Dýnaıdyń jaǵasynda otyryp, tolqyndardyń jumyr tastardy ary beri qozǵaltyp, olardan kólemdi geometrııalyq fıgýralar jasaıtyndyǵyna nazar aýdarady. Bul oǵan oı salyp, úıine asyǵa jetip, bir jobany oılastyra bastaıdy. Karton men aǵash iske aspaǵan soń plastmassaǵa toqtalady. Kishi kólemdegi teksheler 3 os boıynsha aınalýy úshin Erne Rýbık ishki tsılındr mehanızmin oılap tabady. Ártúrli nusqalardy qarastyrǵan Rýbık óz jobasynyń syrtqy beınesi úshin alty tústi qarapaıym gammany tańdaıdy.

Stýdentterge bul ıdeıa óte qatty unap, Rýbık óte bir qyzyqty oıyn jasap shyǵarǵanyn túsinedi.

Rýbık tekshesin 1974 jyldan bastap keń taraıdy. Alǵash ret álem chempıonaty 1982 jyly Býdapeshtte ótedi. Sport oıyndarynyń qataryna enip, oǵan spıdkýbıng ataýy beriledi. Sodan beri bul sport kóptegen elde qarqyndy damydy. Al Qazaqstan spıdkýbıng chempıonatyna 2009 jyldan beri qatysyp keledi. Sol jyldarda jalǵyz ǵana úmitkerimiz álemdik syndarǵa barsa, 2016 jyly olardyń sany 16-ǵa deıin ósti. Byltyrǵy ótken álem chempıonatyna 112 qazaqstandyq qatysyp, birnesheýi júldege ilikti. Solardyń biri - qostanaılyq Erasyl Bolysbek.

Erasyl búginde Syrbaı Máýlenov atyndaǵy Qostanaı mektep-gımnazııasynda oqıdy. Ol Rýbık tekshesin mektepke barmaı turyp qolǵa ustady.

«13 jasymda Astanada ótken QR chempıonatyna qatystym. Ondaǵy jetistigimmen maqtana almasam da, Semeıde ótken «Semey Open 2018» halyqaralyq saıysynda Qazaqstannyń ulttyq rekordyn ornattym. 3h3h3 júıedegi teksheni 1:19,80 mınýtta aıaqpen jınadym», - deıdi ol.



null

Erasyl Bolysbektiń aıtýynsha, kez kelgen teksheni jınastyrýshyǵa eń kemi 20 júris qajet.

«Negizi, bul ádisti Ogaıo shtatyndaǵy Kent ýnıversıtetiniń professory Morlı Devıdson shyǵarǵan. Ol kompıýterdiń kómegi arqyly barlyq júristi muqııat qarap, tıimdi joldaryn jazyp otyrǵan. Men tekshe qurastyrýǵa kúnine 3-4 saǵat ýaqytymdy arnaımyn. Oǵan ketken ýaqytqa ókinbeımin. Keı kezderi áldebir nársege qobaljysam qolyma Rýbık tekshesin alamyn. Sebebi, ol adamnyń jaısyz kóńilin sergitedi. Sondyqtan qazir dostarymdy da osy sport túrimen aınalysýǵa shaqyryp júrmin», - deıdi spıdkýbıng sheberi.

Teksheni shyr aınaldyrǵanda ne qyzyq bar deýińiz múmkin. Biraq mamandardyń keńesine sensek, ony jaı ǵana aınaldyra berý azdyq etedi. Kerisinshe, Rýbık tekshesi - jyldam oılaý men qoldyń eptiligin qajet etetin sporttyq oıynnyń bir túri.



null

«Rýbık tekshesin qurastyrý boıynsha «Spıdkýbıng», «Bir qol» jáne «Reskrambl» júıeleri bar. Olar túrli ádistermen jınalady. Spıdkýbıng sportynyń sabaqta, ásirese, matematıkalyq esepterdi sheshý kezinde paıdasy zor. Sonymen qatar, oıdy lezde jınaqtap, durys sheshim shyǵara bilýge de kómektesedi. Patrık Ponsý esimdi 15 jasar rekordshy teksheni nebári 4,69 sekýndta jınaıdy. Meniń de armanym - álemdik rekordshylardyń dárejesine kóterilý. Ol úshin áli kóptegen ádisti úırený qajet», - deıdi Erasyl.

Erasyl Bolysbek osy ýaqytqa deıin 4 halyqaralyq jarysqa qatysty. Aktobe Cube Days 2018, Ural Winter 2018, Kazakhstan Open 2017 jarystarynda jaqsy nátıjelerge jetti. Bastysy, onyń jetistikteri búkilálemdik Rýbık tekshsesin qurastyrýshylardyń tizimine alyndy.



null

Joǵary qaraı