Aýa raıy
Astana -5 °S
Almaty 17 °S
valıýta baǵamy
USD 389.98
EUR 434.01
RUB 6.10
CNY 55.04

Almatyda aǵaıyndylar naǵashysyna baýyryn kesip berdi

2019 jyldyń 26 naýryz 2019 13:37

ALMATY. QazAqparat - Qazaqstanda tuńǵysh ret eki adamnan bir adamǵa baýyrdyń bólikteri salyndy, dep habarlaıdy QazAqparat tilshisi.

Bólesi men jıeni óziniń naǵashy aǵasyna baýyrynyń bir bóligin bergen. Biregeı ota Dual Graft tehnologııasy boıynsha eki donordan bir mezette bir patsıentke aýystyryldy.

Mundaı ota Qazaqstanda, TMD terrıtorııasynda birinshi ret jasalyp otyr.

«Bul ota tehnıkalyq turǵydan óte kúrdeli. 15 saǵatqa sozyldy. Baqytymyzǵa oraı ota sátti ótti. Qazir eki donor patsıent úılerine jiberildi. Al baýyr salynǵan azamat qazir aýrýhanada jatyr. Jaǵdaıy birqalypty jaqsy»,- dedi A.Syzǵanov atyndaǵy UǴHO AQ basqarma tóraǵasy Bolatbek Baımahanov.

15 saǵatqa sozylǵan otany atalǵan ortalyq pen «Asan» káris hırýrgııa emhanasynyń dárigerleri birlesip jasady.

37 jastaǵy patsıent Nurken Seıitqulovqa «baýyr tsırrozy» dıagnozy qoıylǵan. 3 jyldan beri esepte turǵan. Sońǵy jyldary baýyrynyń aýrýy údep, transplantatsııaǵa muqtajdyq týǵan.

«Men ózimniń aýrýym jaıly 3 jyl buryn bildim. Tolyq tekserýden soń maǵan baýyr aýystyrý kerektigi aıtyldy. Úlken otbasynan shyqqanbyz. Anamnyń 9 sińlisi bar. Olardan 54 bóle taraǵan. Týystarymyzdyń kópshiligi donor bolýǵa kelisti. Biraq, olardyń ishinde myna eki balanyń ǵana baýyrlary sáıkes keldi. Birinshi - Allaǵa, ekinshi dárigerlerge alǵysymdy aıtamyn. Sonyń arqasynda men tolyqqandy ómir súretin boldym», - dedi 37 jastaǵy Nurken Seıitqulov.

Bólesi men jıeni baýyryn naǵashysyna oılanbastan bergenin aıtty.

«Otbasymyzdyń sheńberinde talqylandy, árıne. Donorlyqtan bas tartý týraly oı bolǵan joq. Eń bastysy aǵamyz qasymyzda. Deni saý», - dedi jıeni Údekeı Orazbek.

Dárigerlerdiń aıtýynsha, mundaı otalar kóp jaǵdaıda túrli asqynýlarǵa ákelýi múmkin.

Sebebi donorlarda baýyrdyń 70 paıyzy ǵana qalady. Olardyń aǵzasynda baýyr jetispeýshiligi bolýy múmkin.

«Baýyr termınaldy aýrýyna shaldyqqan adamdar úshin transplantatsııa - tyǵyryqtan shyǵatyn jalǵyz jol. Qazaqstanda baýyryń 90 paıyzy tiri donorlardan alynady. Qaıtys bolǵan adamnan donorlyq organ alý bizde mentalıtetimizge jat nárse. Álemde tiri eki donordan baýyr aýystyrý Ońtústik Koreıa, Japonııa, Túrkııa, Taıvan, Frantsııa elderinde jasalady. Bizdiń el osyndaı ota jasaǵan altynshy el»,- dedi basqarma tóraǵasy.

Qazaqstanda 2019 jylǵy derekke sensek, 282 baýyr aýystyrylǵan. Olardyń 47-si ǵana qaıtys bolǵan adamnan alyndy. A.Syzǵanov atyndaǵy Ulttyq ǵylymı hırýrgııa ortalyǵynda byltyr 22 baýyr tiri donordan alyndy.

Sońǵy eki jylda 20 balanyń baýyry aýystyryldy.

Al kútim paraǵynda 332 patsıent óz kezegin kútip otyr.

Avtor Gúlmıra Ǵosmanálı
Basty sózder: Medıtsına, Almaty,
Joǵary qaraı