Aýa raıy
Astana -4 °S
Almaty 18 °S
valıýta baǵamy
USD 389.98
EUR 434.01
RUB 6.10
CNY 55.04

Aqyn Maqpal Jumabaı Londonda jeke kontsertin ótkizedi

2019 jyldyń 4 qyrkúıek 2019 18:26

NUR-SULTAN. QazAqparat – Qazaqstandyq aqyn ári mýzykant Maqpal Jumabaı Ulybrıtanııa astanasy Londonda jeke kontsertin ótkizbek. Aldaǵy 18 qyrkúıekke josparlanǵan shyǵarmashylyq keshi týraly QazAqparat tilshisine aqynnyń ózi aıtyp berdi.

«Bul jobaǵa daıyndalǵanyma týra bir jyl boldy. Jýyrda 15 adam Londonǵa attanǵaly otyrmyz. Zamanaýı qazaq óneri úshin táýekelge bel baıladyq. Birshama ýaqyt buryn bilimim men tájirıbemdi zamanaýı ónerimizdi damytý jolyna arnaıtynymdy, sol jolda naqty ister bastaǵanymdy jarııalaǵan edim. Bul London sapary – sol naqty isimniń, táýekelimniń biri. 18 qyrkúıek Londondaǵy Brýnel keńistiginde (mýzeıinde) AUA kontseptýaldy kontsertim ótedi. Kontsertti ındýstrıaldyq revolıýtsııanyń tulǵalary Mark jáne Izambard Brýnelder 1842 jyly salǵan osy tarıhı ǵımaratta ótkizgim keldi», - deıdi Maqpal Jumabaı.


Mýzykanttyń aıtýynsha, kontsertte aıtylatyn barlyq jyrlar kásibı deńgeıde aǵylshyn tiline aýdarylǵan.

«Kontsertpen qatar, Londonda «Maqpalsher» atty anımatsııalyq qysqa metrli fılmimizdi kórsetemiz. Keshte aıtylatyn barlyq jyrlardy kásibı aýdarmashy aǵylshyn tiline aýdardy. Aýdarma kórsetiledi ári qonaqtarǵa kitapsha retinde tartý etiledi. Kúni keshe ǵana uıymdastyrý jumystarynyń barlyq kezeńine núkte qoıdyq», - dedi ol.

Aqyn aǵylshyn elindegi óz shyǵarmashylyq keshin qazaq óneriniń shetelge shyǵýy, tanylýy dep sanaıdy.

«Árıne, Londonda kontsert berý álemdik jańashyldyq emes, degenmen men úshin, meniń shyǵarmashylyǵym úshin mańyzdy. Án keshimde barlyǵy 12 avtorlyq jyr oryndalady. Jyrlarym arqyly aǵylshyn tyńdarmandaryna qazaq halqynyń dúnıetanymy men adamnyń ishki sezimin jetkizgim keledi. Meniń shyǵarmalarymda ómir, adamı qundylyqtar men elene bermeıtin názik sezimder baıandalady. Bir jaǵynan biz úshin syn bolaıyn dep tur, sebebi bizdiki standartty emes, jańa mýzykalyq baǵyt. Taǵy bir aıtyp ótetin jaıt, kontsert - kommertsııalyq emes, mádenıetke, ónerge arnalǵan joba, sondyqtan ol tegin ótedi», - deıdi óner ıesi.

Mýzykant málim etkendeı, kontsert jandy daýysta ótedi jáne oǵan shamamen 120-150 kórermen keledi dep kútilýde.

Avtor Álı Ibraev
Basty sózder: Eýropa, Mádenıet, Óner,
Joǵary qaraı