Aýa raıy
Astana 22 °S
Almaty 26 °S
valıýta baǵamy
USD 386.04
EUR 427.77
RUB 5.88
CNY 54.45

Aqtóbede órtten soń kópbalaly otbasy dalada qaldy

2019 jyldyń 22 aqpan 2019 11:31 1513

AQTÓBE. QazAqparat - Aqtóbe qalasyndaǵy Sút zaýyty aýdanynda úı órtenip ketti. Qazir 6 balaly otbasy týystarynyń úıin jaǵalap júr, dep habarlaıdy QazAqparat tilshisi.

Aqtóbe qalasynda Baıtóbetovter otbasy dalada qaldy. Órt keshe jergilikti ýaqytpen saǵat 15:00-de tirkeldi.

null 

«Bir úıde 8 jan turamyz. Meniń 6 balam bar. Balamyzdyń úlkeni 5-synypta oqıdy, kishkentaıym - 3 aılyq. Keshegi órtten soń týystarymyzdy jaǵalap, pana izdep kettik. Sebebi, sol kezde úıde úsh balam ǵana boldy. Іnim syrtta, garaj mańynda júrip, úsh bala dalaǵa jalań aıaq, jalań bas júgirip shyqqanda ǵana kórgen. Іshke kirip, qujattaryn almaq boldy. Biraq kóbi janyp, eki balanyń ǵana týý týraly kýáligi qaldy», - deıdi úı ıesi Murat Baıtóbetov.

Órt bolǵan kezde úıde 10, 5, 2 jastaǵy balalar ǵana bolǵan. Oınap otyrǵan balalar oıynshyq alatyn kezde ózge bólmeniń janyp jatqanyn kórgen. Úı ishin qara tútin basqan kezde qoryqqan balalar kıimsiz dalaǵa qashyp shyqqan. Úı ıeleri órttiń neden shyqqanyn bilmeıdi.

«Órt keshe saǵat 15:00-de boldy. Aldymen úıindegi zattary órtenip, keıin órt tóbege ulasty. Órt sóndirý qyzmetinen 8 adam 2 avtokólik bardy. Sonymen qatar, apattar medıtsına ortalyǵynan 3 adam, bir avtokólik jiberildi. Órt 15:38-de aýyzdyqtalyp, 16:17-de tolyq sóndirildi», - dep habarlady oblystyq TJD baspasóz qyzmeti.

 

 

 

 

Joǵary qaraı