Aýa raıy
Astana 23 °S
Almaty 30 °S
valıýta baǵamy
USD 384.52
EUR 431.32
RUB 6.10
CNY 55.89

Abzal Saparbekuly: Toqaev kezeńinde Túrkııa-Qazaqstan qarym-qatynasy tyń serpinmen damıdy

2019 jyldyń 14 maýsym 2019 11:59 1583

NUR-SULTAN. QazAqparat - Maýsymnyń 9-ynda ótken Qazaqstan Prezıdentiniń kezekten tys saılaýy álemdik aqparat quraldarynyń nazarynda boldy. Elimizdiń mańyzdy tarıhı oqıǵasyna qatysty  Qazaqstan Respýblıkasynyń Túrkııadaǵy Tótenshe jáne Ókiletti Elshisi Abzal Saparbekuly prezıdenttik saılaý, aldaǵy damý baǵyttary týraly  Anadoly agentigine (Anadolu Ajansı) suhbat berdi. 

Suhbat barysynda Elshi jańa saılanǵan Qazaqstan Prezıdenti Qasym-Jomart Toqaevtyń iskerligi men joǵary deńgeıdegi tájirıbesine toqtalyp, munyń Qazaqstan-Túrkııa qarym-qatynastarynyń damýyna oń yqpal etetindigin, aldaǵy kezeńde eki el arasyndaǵy qarym-qatynas tyń serpinmen damıtynyn atap ótedi.

«Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev Túrkııa-Qazaqstan qarym-qatynastarynyń negizin qalady. Túrkııa Prezıdenti Rejep Taıyp Erdoǵan men Qazaqstannyń Tuńǵysh Prezıdenti Nursultan Nazarbaev sońǵy 10 jyl boıy osy baılanystardy odan ári nyǵaıtty. Eki el arasynda Joǵary deńgeıdegi strategııalyq yntymaqtastyq keńesi, Úkimetaralyq ekonomıkalyq komıssııa men «Jańa sınergııa» birlesken ekonomıkalyq baǵdarlamasy bar. Munyń barlyǵy eki el arasyndaǵy strategııalyq qarym-qatynastardyń turaqty jáne berik mehanızmderi bar ekenin kórsetedi», - dedi Abzal Saparbekuly.

Elshi sonymen qatar N.Nazarbaev Túrkııaǵa árdaıym ystyq yqylas pen erekshe qurmetpen qaraıtyndyǵyna toqtaldy. «Elbasy Nursulan Nazarbaev, Túrkııaǵa, tek túrki áleminiń mańyzdy elderiniń biri ǵana emes, aýmaǵynda jáne halyqaralyq qoǵamdastyqta mańyzdy rólge ıe memlekettiń biri retinde qaraıdy. Túrkııanyń qýatty bolýy Qazaqstan jáne sondaı-aq túrki áleminiń de qýatty bolýy degendi bildiredi. Túrkııadaǵy saıasatkerler Q.Toqaevty memleket qaıratkeri, halyqaralyq deńgeıde tájirıbeli dıplomat jáne saıasatker retinde tanıdy. Sondyqtan da, aldaǵy qarym-qatynastarymyz baýyrlastyq pen strategııalyq áriptestik deńgeıin tolyqqandy kórsete biletin dárejede jalǵasyn tabady»,- dedi ol.

Suhbat barysynda 9 maýsymda ótken saılaý týraly da áńgime órbidi. Onda Abzal Saparbekuly bıylǵy saılaý dodasynyń erekshelikterine, uıymdastyrý deńgeıine toqtalyp, nátıjelerine de sholý jasaǵan.

«Saılaýǵa deıin barlyq úmitkerlerge buqaralyq aqparat quraldarynda birdeı múmkindik berildi, tikeleı efırde úmitkerler arasynda televızııalyq pikirtalas uıymdastyryldy. Eń mańyzdysy saılaý kompanııasynyń jumystaryna tosqaýyl bolarlyq eshqandaı shaǵym tirkelmedi jáne kandıdattar áleýmettik jelini belsendi túrde paıdalandy. Saılaý kúni, memlekettik arnalar jáne jeke arnalar tarapynan tikeleı efırler uıymdastyryldy. 2-3 saǵattyq ýaqyt arasynda bir ret Ortalyq saılaý komıssııasy tarapynan halyqtyń saılaýǵa qatysý deńgeıi habarlanyp otyrdy. Saılaý kúniniń sońynda saılaýshylardyń 77,4 paıyzy qatysqandyǵy týraly aqparattyń ózi saıası dodanyń ashyq túrde ótkendiginiń kórsetkishi bolyp tabylady. Jalpylama alǵanda,  Qazaqstandaǵy saılaýlar jazylmaǵan dástúrge saı merekelik kóńil-kúı turǵysynda ótedi. Bul úrdis Túrkııada qurylǵan saılaý ýchaskelerinde de jalǵasyn tapty», - dedi Elshi.

A. Saparbekuly, Qazaqstandaǵy saılaýdy, Túrkııadaǵy kún tártibine qosyp, halyqty jyldam ári naqty aqparatpen qamtamasyz etken Anadoly agenttigine alǵys bildirdi.

Budan bólek, A.Saparbekuly jańadan laýazymyna kirisken Prezıdent Qasym-Jomart Toqaev týraly sóz qozǵap, onyń eldegi qıyndyqtardy jaqsy biletindigine keńinen toqtaldy. Elshiniń aıtýynsha, Prezıdent aldaǵy ýaqytta qoǵamnyń barlyq segmentterimen birge ári solarmen keńese otyryp, halyq múddesinen týyndaıtyn máselelerge barynsha nazar aýdarmaq. 

«Saılaýdan keıin Qasym-Jomart Kemeluly aldaǵy kezeńde saıası partııalar men úkimettik emes uıymdar qatysatyn birlesken keńes qurylatyndyǵyn jáne bul Qazaqstannyń demokratııasyna jáne turaqty damýyna úles qosatyndyǵyn málimdedi. Q. Toqaev, saıası-ekonomıkalyq, memlekettik basqarý, eldiń ál-aýqatyn arttyrý jáne sybaılas jemqorlyq sııaqty máselelerde naqty qadamdar jasaý arqyly eldiń damýyna jańa serpin bergisi keledi. Ol shetelde bilim alǵan, talantty, qabiletti jastardy memlekettik jáne jeke sektorda jumys isteýine jaǵdaı jasaıdy. Turaqty Qazaqstan úshin biz osy ishki dınamıkany saqtaýymyz qajet. Bul dınamıka aldaǵy ýaqytta jalǵasyp halyqtyń úmiti aqtalady. Prezıdentimiz saılaýdan keıin Qazaqstannyń eń jarqyn jáne bilikti degen 300 jas býyndy memlekettiń eń mańyzdy organdaryna taǵaıyndaıtyndyǵyn jarııalady», - dedi A. Saparbekuly.

Suhbatta Qazaqstannyń jańa kezeńdegi syrtqy saıasaty týraly aıtylyp, qazirgi strategııalyq jáne baýyrlastyq qarym-qatynastar jalǵasatyny sóz boldy.

«Qazaqstan syrtqy saıasatyndaǵy kóp vektorly baǵytyn  jalǵastyrady. Óıtkeni, bul syrtqy saıasatty qalyptastyrǵandar arasynda Qasym-Jomart Toqaev ta bar. 10 jyl boıy Qazaqstan Respýblıkasynyń Syrtqy ister mınıstri qyzmetin atqardy. Qazaqstan KSRO-dan keıingi kezeńde batys jáne shyǵys elderimen jaqsy qarym-qatynastar ornatqan jáne proaktıv saıasat ustanǵan az ǵana elderdiń biri bolyp tabylady. Q. Toqaev kezeńinde  Qazaqstan halyqaralyq arenadaǵy teń dárejeli jáne ulttyq múddelerge sáıkes belsendi saıasatyn jalǵastyrady», - dedi Abzal Saparbekuly.

Suhbat barysynda Elshi Táýelsizdik jyldaryndaǵy Qazaqstannyń  ekonomıkalyq, áleýmettik, saıası, ákimshilik jáne mádenı turǵyda damyǵanyn atap ótti.

«Kúrdeli kezeńderde áleýmettik turaqtylyq synaǵy men túrli qıyndyqtar týyndaıtyny belgili. 90-shy jyldarda Qazaqstan alýan mádenıetti el retinde qalyptasqan bolatyn. Túrli etnıkalyq toptardyń bir ýaqytta bir jerde beıbitshilik pen yntymaqtastyqta ómir súrýi biz úshin ekonomıkadan da mańyzdy edi. Bul máselelerdiń barlyǵy Tuńǵysh Prezıdent N. Nazarbaevtyń kóregen saıasaty arqasynda sheshimin tapty. Elbasy N. Nazarbaevtyń eń mańyzdy qyzmetteriniń biri - Qazaqstan halqyna memleket bolýdy, jeke tulǵa bolýdy jáne halyqaralyq qoǵamdastyqtyń qurmetti múshesi bolýdy úıretti. Bolashaqqa degen senimin qalyptastyrdy jáne buny naqty árekettermen kórsetti», - dedi Abzal Saparbekuly. 

 

 

Joǵary qaraı