Aýa raıy
Astana 16 °S
Almaty 11 °S
valıýta baǵamy
USD 386.82
EUR 428.67
RUB 5.86
CNY 54.95

Ábdiqalyqova otbasy jáne jastar máseleleri jóninde otyrys ótkizdi

2019 jyldyń 20 maýsym 2019 22:24 869

NUR-SULTAN. QazAqparat - QR Premer-Mınıstriniń orynbasary Gúlshara Ábdiqalyqovanyń tóraǵalyǵymen QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń otyrysy ótti, dep habarlaıdy QazAqparat.

«Otyrysty ashqan Ulttyq komıssııanyń tóraıymy G. Ábdiqalyqova Memleket basshysy Q.Toqaevtyń bıylǵy 12 maýsymda Qazaqstan Respýblıkasynyń saılanǵan Prezıdenti qyzmetine resmı kirisý rásiminde qoıǵan mindettemelerine basa nazar aýdardy. Ulttyq komıssııada Prezıdent belgilegen 10 mańyzdy baǵyttyń qataryna engen - jastardy jumyspen qamtý, jańa jumys oryndaryn ashý, «Rýhanı jańǵyrý» baǵdarlamasy aıasynda otbasylyq qundylyqtardy ilgeriletý máseleleri qaraldy», - delingen baspasóz baıanynda.

Búgingi kúni elde 14-28 jas aralyǵyndaǵy 3,9 mln jastar bar. Olardy jumyspen qamtý maqsatynda «Jasyl el», «Dıplommen aýylǵa», «Serpin», «Jastar praktıkasy» baǵdarlamalary iske asyrylýda. Ónimdi jumyspen qamtý jáne jappaı kásipkerlikti damytý baǵdarlamasy 2018 jyly 253 myńnan astam jasty jumysqa turǵyzýǵa múmkindik berdi. Ol osy baǵdarlamaǵa qatysýshylardyń jalpy sanynyń 37% quraıdy.

«Bastaý bıznes» jobasy aıasynda kásipkerliktiń negizderi boıynsha 8,5 myń jas oqytylyp, 2 myńnan astamy shaǵyn nesıe aldy. Kásibi boıynsha alǵashqy tájirıbe alý úshin 28,4 myńnan astamy jastar praktıkasyna jiberildi. Áleýmettik jumys oryndaryna jáne qoǵamdyq jumystarǵa jastar arasynan 34,8 myń adam jiberildi. Jastardy qoldaý boıynsha «Jastar - el tiregi» Ulttyq jobasy bastaldy. Onymen 1 mln jas úsh jyl ishinde qamtylatyn bolady.

Tuńǵysh Prezıdent - Elbasy N.Nazarbaevtyń tapsyrmasy boıynsha qabyldanǵan «Rýhanı jańǵyrý» baǵdarlamasy jáne «Uly dalanyń jeti qyry» maqalasynyń basymdyqtary rýhanı-adamgershilik qundylyqtardy qaıta jańǵyrtýǵa baǵyttalǵan. Bul úrdiste otbasy rýhanı, mádenı qundylyqtardy, ulttyq kodty saqtaý men kóbeıtýde úlken ról atqarady. Sondyqtan osy tapsyrmany iske asyrýda otbasylyq qundylyqtardy jyljytýǵa asa mán berilgen. Bul maqsattarǵa ÚEU úshin memlekettik áleýmettik tapsyrys aıasynda 2019 jyly 607 mln tengege  167 áleýmettik-mańyzdy joba kózdelgen.

Jazǵy demalys kezinde oqýshylardyń respýblıkalyq mýzeılerge, tabıǵat qoryǵy-múzeılerine jáne teatrlarǵa tegin kirý praktıkasy engizilgen. Balalar men jastardy shyǵarmashylyq jáne kreatıvtik jobalarǵa belsendi tartý úshin óńirlerde 208 kovorkıng-ortalyqtary quryldy. Olardyń deni Almaty qalasynda jáne Almaty, Shyǵys Qazaqstan, Pavlodar, Qaraǵandy oblystarynda ashyldy. 

Otyrysta sonymen qatar Qazaqstan Respýblıkasyndaǵy 2030 jylǵa deıingi otbasylyq jáne genderlik saıasat tujyrymdamasyn iske asyrý boıynsha 2017-2019 jyldarǵa arnalǵan is-sharalar josparynyń Mańǵystaý oblysynda oryndalý barysy týraly másele qaraldy. Turǵyndardyń áleýmettik osal toptaryn qoldaý maqsatynda óńirde iske asyrylyp otyrǵan «Bıznes 3 kúnde» jobasynyń ońdy tájirıbesi ataldy. Basty mindet - tómengi kiristeri bar otbasylarǵa óz isin ashýǵa kómek kórsetý. 2019 j. naýryzdan bastap jobaǵa 120-dan astam qatysýshy - 61 kirister mólsheri tómengi adam, 37 kóp balaly otbasylar, 2 kóp balaly-jalǵyz basty áke, 7 jalǵyzbasty ana jáne múgedektigi bar adamdarǵa kútim jasaıtyn 13 adam óz bıznesin ashty. Nátıjesinde 37 tigin tsehy, 11 qolóner jáne 4 toqyma sheberhanasy, 21 taǵam óndiretin obektiler, 25 kondıterlik, 12 sút taǵamdary men sýsyndar óndiretin mını-tsehtar, 2 qyzmet kórsetetin bıznes ashyldy.  

Otyrys sońynda QR Premer-Mınıstriniń orynbasary, Ulttyq komıssııanyń tóraıymy G.Ábdiqalyqova memlekettik organdarǵa birqatar naqty tapsyrmalar berdi.

 

 

Joǵary qaraı