Aýa raıy
Astana 12 °S
Almaty 20 °S
valıýta baǵamy
USD 389.59
EUR 429.06
RUB 6.05
CNY 55.07

23 mamyr. QazAqparat kúntizbesi

2019 jyldyń 23 mamyr 2019 07:00

NUR-SULTAN. QazAqparat - QazAqparat óz oqyrmandaryna 2019 jylǵy 23 mamyrǵa arnalǵan kúntizbeni usynady.

ESTE QALAR OQIǴALAR

1996 jyly Qazaqstan Prezıdenti Nursultan Nazarbaevtyń «L.Gýmılev atyndaǵy Eýrazııa ýnıversıteti týraly» Jarlyǵy shyqty. Jarylqqa sáıkes, qaladaǵy eki joǵary oqý orny biriktirilip, L.N.Gýmılev atyndaǵy Eýrazııa ýnıversıteti quryldy.

1996 jyly QR Prezıdenti N. Nazarbaevtyń Qaýlysymen «Qazaqstan Respýblıkasynyń Memlekettik sáıkestigin qalyptastyrý tujyrymdamasy» maquldandy.

2005 jyly ultymyzdyń birtýar azamaty, aǵartýshy-ǵalym Ahmet Baıtursynulynyń jetekshilik etýimen 1913 jyldan bastap Orynbor qalasynda shyǵyp kelgen «Qazaq» gazetiniń elektrondy nusqasy jasaldy. «Mádenı mura» memlekettik baǵdarlamasy aıasynda qolǵa alynǵan joba Ortalyq Azııa aýmaǵyndaǵy alǵashqy tsıfrlyq qujat bolyp esepteledi. Onda zertteýshiler men ǵalymdar elektrondyq júıe arqyly tól gazetimizdiń 247 nómirimen tanysa alady.

2012 jyly Aqordada Qazaqstan Respýblıkasynyń Prezıdenti Nursultan Nazarbaevtyń Túrkııa Respýblıkasynyń Premer-mınıstri Redjep Erdoǵanmen kezdesýiniń aıasynda taraptar eki el arasyndaǵy birlesken ekonomıkalyq baǵdarlamasy - «Jańa sınergııaǵa» qol qoıdy.

Qujat memleketterdiń saýda-ekonomıkalyq jáne ınvestıtsııalyq salalaryndaǵy yntymaqtastyǵyn atalmysh ózara árekettestikke jańa baǵdarlamalyq mártebe berý esebinen jańa deńgeıge shyǵarýdy kózdeıdi.

2012 jyly Almaty metropolıteni kólik ındýstrııasynyń «Altyn dóńgelek» halyqaralyq qoǵamdyq marapatynyń laýreaty atandy. Metropolıten «Qazaqstan Respýblıkasynyń kóliktik ındýstrııasynyń jobasy» nomınatsııasynda jeńiske jetti.

2013 jyly Vengrııa elshisiniń rezıdentsııasynda qazaqstandyq dıplomat Rymtaı Káribjanovty «Rytsar kresti» vengr ordenimen marapattaý rásimi ótti.
Marapatty Vengrııanyń halyq sharýashylyǵy mınıstri Mıhaı Varga tapsyrdy, ol dıplomatııalyq qatynastar ornatylǵannan beri Rymtaı Káribjanov eki el arasyndaǵy ekijaqty yntymaqtastyqty damytýǵa jáne keńeıtýge baǵyttalǵan dıplomatııalyq salada jemisti jáne tıimdi jumys júrgizgenin atap ótti.

2014 jyly Taldyqorǵanda 22 jastaǵy múgedek Eldos Baıalyshbaev múmkindigi shekteýli jandarǵa arnalǵan fıtnes-klýb ashty.

Birneshe jyl buryn jol apaty saldarynan ol tósek tartyp jatyp qalǵan. Alaıda, massajdyń arqasynda Eldos ózi otyrýǵa qabiletti boldy. Eldostyń ákesi men aǵasy qolaıly jattyǵý jabdyqtaryn jasap, úsh jyl boıy aýyr jattyǵý jalǵasty. Nátıje úmitti aqtap, Eldos aıaqqa turdy. Baldaqtyń kómegimen ol ózdiginen qozǵalatyn dárejege jetti.

Eldos óz jetistigin basqalarmen bólisýge bel baılap, «Bıznestiń jol kartasy-2020» baǵdarlamasy boıynsha úsh mıllıon teńge grant utyp aldy. Balanyń ata-anasy men dostary jattyǵý quraldaryn jasap, Taldyqorǵan ákimdigi qolaıly ǵımarat berdi. Ǵımaratqa jóndeý jumystary júrgizilip, múgedekterge arnalǵan fıtnes-klýb kelýshilerge óz esigin ashty.

2016 jyly Atameken businesschannel alǵashqy qazaqstandyq bıznes jańalyqtar mýltımedııalyq arnasy jumysyn bastady.

www.abctv.kz telearnasy - LiveStream rejıminde jumys isteıtin ınternettegi alǵashqy TV-arna. Aqparatpen qamtý aımaǵy - Qazaqstan, EAEO, TMD jáne álem. Taldaý baǵdarlamalary, naryqtaǵy ahýal, mamandar pikirleri, saraptamalyq baǵalaý jáne t.b. usynylady.

2016 jyly óziniń ádebı-qoǵamdyq qyzmetinde Ázerbaıjan eliniń jetistikterin kópshilikke tanytýda eleýli úles qosqany úshin qazaqtyń kórnekti aqyny, qoǵam qaıratkeri Oljas Súleımenov Ázerbaıjan Respýblıkasy Prezıdentiniń Qurmet dıplomymen marapattaldy. Qazaqstannyń halyq jazýshysyna marapatty QR-daǵy Ázerbaıjan Elshisi Rashad Mamedov «Uly dala» gýmanıtarlyq ǵylymdarynyń 1-shi forýmy barysynda tabys etti.

2017 jyly AQSh-tyń Sent-Pıtersberg qalasynda ótken Halyqaralyq boks federatsııasynyń (International Boxing Federation - IBF) 34-shi jyl saıynǵy konventsııasy kezinde IBF / WBA / WBC / IBO orta salmaq dárejesinde álem chempıony qazaqstandyq Gennadıı Golovkınge sportta jetken jetistikteri úshin Djersı Djo Ýolkott atyndaǵy arnaıy syılyq berildi.

2018 jyly Almaty oblysynyń Uzynaǵash aýylynda «Rýhanı jańǵyrý» baǵdarlamasy aıasynda qazaq halqynyń ańyzǵa aınalǵan aqyny Jambyl Jabaevqa eskertkish ashyldy. Eskertkishtiń avtory - sáýletshi Qazbek Jarylǵapov. Eskertkish «Týǵan jerge taǵzym» qoǵamdyq qorynyń qarajaty esebinen salynǵan bolatyn.

2018 jyly elimizdiń mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan úlesi úshin ıtalıandyq Etsıo Frıdjerıo II dárejeli «Dostyq» ordenimen marapattaldy. «Astana Opera» teatrynda kóptegen tanymal opera jáne balet spektaklderi úshin stsenografııa jasaǵan Etsıo Frıdjerıo bizdiń zamanymyzdyń eń kórnekti dızaınerleriniń biri. Áıeli, kıim dızaıneri, «Oskar» syılyǵynyń laýreaty Frank Skýarchapınomen birge olar Qazaqstan mýzykalyq teatrynyń damýyna aıtarlyqtaı úles qosty.

2018 jyly Bakýde«Uly dala murasy: zergerlik ónerdiń kórnekti týyndylary» atty Qazaqstan Ulttyq murajaıy men Ázerbaıjan Ulttyq murajaıynyń birlesken kórmesi ashyldy. Kórme «Altyn adamnyń álem mýzeılerin aralaýy» atty halyqaralyq kórme jobasyn júzege asyrý maqsatynda uıymdastyryldy.

Kórmeniń basty eksponaty - Esikte tabylǵan Qazaqstannyń sımvoly retinde belgili «Altyn adam».

2018 jyly Astana qalasynda jańartylatyn energııa kózderi jobalarynyń alǵashqy aýktsıony ótti. Birinshi aýktsıon jalpy qýaty 20 MVt bolatyn jel elektr stantsııalaryn tańdaý úshin Soltústik aımaq (Aqmola, Aqtóbe, Shyǵys Qazaqstan, Qaraǵandy, Qostanaı, Pavlodar jáne Soltústik Qazaqstan oblystary) úshin ótkizildi.

Basty sózder: Kúntizbe,
Joǵary qaraı