Түркістанда спорттың 9 түрін қамтыған халықаралық жарыс өтті
ТҮРКІСТАН. ҚазАқпарат – Түркістан облысында ересектер арасында спорттың 9 түрін қамтыған спартакиада жоғары деңгейде ұйымдастырылып, өз мәресіне жетті, деп хабарлайды ҚазАқпарат тілшісі.
Дәстүрлі сайыста жасыл алаңға шыққан Түркістан облысының командасы бас жүлдені иеленсе, күміс жүлдені Шардара ауданының құрамасы жеңіп алды. Ал, қола жүлдені Созақ ауданына келген команда қанағат етті.
Жеңімпаздар мен жүлдегерлерді Түркістан облыстық спорт басқармасының басшысы Полат Қырықбаев құттықтап, арнайы тағайындалған алғыс хаттар мен кубок медальдар табыстады. Енді Тәуелсіздік күніне орай, спартакиаданың командалық жеңімпаздары анықталып, үздік деп танылған спорт аймағы жоғары деңгейде марапатталатын болады.
Бұл күні Түркістанда сондай-ақ, баскетболдан халықаралық турнир өтті. Биыл осымен екінші рет жалауы желбіреген бәсеке көне қаланың «Құрметті азаматы» Алик Валиевтің құрметіне арналды. Халықаралық турнирге еліміз бен Қырғызстан, Өзбекстаннан бас-аяғы 22 команда қатысып, өзара бақ сынады.
