Ауа райы
Астана 14 °С
Алматы 23 °С
валюта бағамы
USD 386.70
EUR 427.15
RUB 6.06
CNY 54.57

Құмар Ақсақалов: Біздің міндетіміз оқушылардың сапалы білім алуына жағдай жасау

2019 жылдың 23 тамыз 2019 22:28

ПЕТРОПАВЛ. ҚазАқпарат – Петропавлда өткен оқу жылын қорытындылап, болашаққа бағдар берген ұстаздардың дәстүрлі тамыз конференциясы өтті, деп хабарлайды ҚазАқпарат тілшісі.

СҚО әкімі баспасөз қызметінің хабарлауынша, мұғалімдердің тамыз конференциясына өңір басшысы Құмар Ақсақалов қатысты. Жыл санап білім саласына бөлінген қаржы өсіп келеді. Соңғы 3 жылда қаржы көлемі 29% ұлғайды. Биыл білім саласына 30% жұмсалды. Бұның барлығы жаңа мектептер салып, күрделі жөндеу жүргізуге, инфрақұрылымды жаңғыртып, ғылымды дамытуға көмектеседі. Биыл «Жас өркен» және «Береке» ықшам аудандарында жаңа екі мектеп пайдалануға берілмек. Облыстың 296 білім ордасы жөнделді. Бұл былтыр жөндеу жұмыстарына бөлінген қаражатпен салыстырғанда 12 есе артық.

«Биыл елімізде 323 мектеп күрделі жөндеуден өтті, оның ішінде 130 мектеп СҚО-да орналасқан. Бұл - барлық мектептердің 40%. Біздің басты міндеттеріміздің бірі – оқушылардың сапалы білім алуына қолайлы жағдай жасау», - деді Құмар Ақсақалов.

Өңір басшысы басқа да басым бағыттарға тоқталды. Оның ішінде жас мамандардың ауылдарда орнығуы, мемлекеттік-жекеменшік әріптестік аясында жобаларды жүзеге асыру, үш ауысымдық мектептерді жою, педагог статусын жоғарылату бар.

Облыс әкімі жуырда Петропавлда жаңа аутизм орталығының ашылатынын айтты. Сондай-ақ, әр ауданда инклюзивті орталықтарды ашуға тапсырма берді.

«Петропавлда «Аутизм. Әлем бәріне бір» атты орталық ашылады. Ол жерде үш инклюзия кабинеті жұмыс істейді. Қазір облыстың аудандарында бірде-бір инклюзия кабинеті жоқ. Әр ауданда осындай ресурстық кластар ашуды тапсырамын. Бұл жұмысқа меценаттарды тартқан дұрыс», - деді өңір басшысы.

Жоғары қарай