Ауа райы
Нұр-Сұлтан 20 °С
Алматы 27 °С
валюта бағамы
USD 383.69
EUR 429.08
RUB 5.97
CNY 55.39

Қостанайдағы қуыршақтар театры тұңғыш рет қазақ тілінде ертегі қойды

2019 жылдың 25 сәуір 2019 22:05 1105

 ҚОСТАНАЙ. ҚазАқпарат - Бүгін облыстық  қуыршақтар театры «Кукареку» атты мемлекеттік тілдегі ертегіні сахналады, деп хабарлайды ҚазАқпарат.

«Кукареку» - аталған мекемеде мемлекеттік тілде көрсетіліп отырған тұңғыш қойылым. Қуыршақтар театрында қазақ тілінде ертегі қою туралы алғаш бастама көтерген Қостанай облыстық мәдениет басқармасының басшысы Ерлан Қалмақов болатын. Идея ұжым директоры Николай Михерскийден де қолдау тапты.

«Мемлекеттік тілдегі шығармаларды сахналау біз үшін тиімді. Көрермендеріміз көбейеді. Дегенмен өз күшімізбен шығара алмасымыз белгілі. Себебі, тіл мәселесі кедергі. Сондықтан, І.Омаров атындағы облыстық қазақ драма театрымен байланыс орнаттық. Театрдың көркемдік жетекшісі Әлия Баймахан ұсынысымызды қуана қабылдап, көмегін аяп қалмады. Әйтсе де, көңілімізде қобалжудың болғаны рас. Бұған дейін 2013 жылы бір рет екі тілде қойғанымыз болмаса, тәжірибеміз жоқ. Тұсаукесерді балғындардың жылы қабылдағанына қарап, бірлескен жобамыз сәтті шықты деуге негіз бар», - дейді қуыршақ театрының директоры.

 Ал облыстық  қазақ драма театрының бас режиссері Әлия Баймаханның сөзінше, бұл тәжірибе алмасу екі тарап үшін де тиімді.

«Қуыршақ театрының өзіндік ерекшелігі бар. Жансыз бейнелерді «тірілту», кішкентай көрермендерді иландыру оңай емес. Драма театрының әртістері осы жауапты міндетті ойдағыдай алып шыққанына қуаныштымын. Бұл олар үшін шыңдалу сабағы болды. Жекелеген кемшіліктер жүре түзеледі. Ең бастысы, арада тығыз шығармашылық байланыс орнады. Оны одан әрі дамытуға бәріміз мүдделі болуымыз керек», - деп ойын түйіндеді Әлия Баймахан.

 Облыстық мәдениет басқармасы басшысының орынбасары Роза Олжабаева қуыршақтардың қазақ тілінде ертегі қойып отырғанына қуанышты екенін жеткізіп, жобаның болашақта жалғасын табуына тілектестік білдірді. Балғын көрермендерді қуанышқа бөлеп, қойылымға «тіл бітірген» театрдың әртістері - Нұрлан Байшин мен Мөлдір Құбаш.


null 

Ертегі желісі төбет Шарик пен қораз, жалқау мысық, айлакер түлкі арасында өрбиді. Кейіпкерлер достықты, адалдықты дәріптеп, жаманшылықпен күресуге үндейді. Салауатты өмір салтын ұстануға шақырады. Оқиға барысында балалар белсенді араласып, қайырымды кейіпкерлерге жақтасып отырды. Бұл ертегінің оларды сендіре алғанын, көңілінен шыққанын көрсетсе керек.

«Кукареку» атты ертегінің авторы - Г.Ландау. Оны қазақ тіліне тәржімалаған - қуыршақтар театрының қызметкері Ботагөз Баймағанбетова. Қоюшы-режиссер - Юлия Семенова.



null 

 

Жоғары қарай