Ауа райы
Астана -18 °С
Алматы -6 °С
валюта бағамы
USD 380.84
EUR 419.50
RUB 6.05
CNY 54.90

Қазақстандық Дәулет Төлеубаев АҚШ Президентінде қонақта болды

2019 жылдың 24 қараша 2019 16:31

ВАШИНГТОН. ҚазАқпарат – Спорттың гольф түрінде АҚШ-та ерекше жетістіктерге жеткен қазақстандық Дәулет Төлеубаев Президент Дональд Трампта қонақта болды, деп хабарлайды ҚазАқпарат «Хабар 24» арнасына сілтеме жасап.

Стэнфорд университетінің гольфшылар командасында өнер көрсететін отандасымыз NCAA (АҚШ пен Канаданың ЖОО-лары мен колледждері енген Ұлттық университеттік спорт қауымдастығы) чемпионы болды.

Дональд Трамптың гольф алаңдарында өткізетін уақыты жөнінде америкалық баспасөзде жиі талқыланады. Журналистердің есебіне сәйкес, оның АҚШ Президенті лауазымындағы күндердің 23 проценті гольф ойнаумен өткен. Трамп аталмыш спорт түріне арналған беделді жарыстардың нәтижесін мұқият бақылап отырады. Бұл жолы оны өздерінің мүлтіксіз жеңісімен Стэнфорд университетінің командасы тәнті еткен.




«Құрамына қазақстандық Дәулет Төлеубаев енген команда соңғы 12 жылда Ұлттық университеттік спорт қауымдастығының қайта чемпионы болды. Америкалық танымал телеарналар Д.Төлеубаевтың тамаша ойынын әлі де көрсетіп жатыр», - деп хабарлайды «Хабар 24».

Дәулеттің айтуынша, бұл – барлық команда мүшелерінің жеңісі.

«Бұл – Америка колледждері арасындағы турнир болды. Мен командамыздағы 5 гольфшының бірімін. Төрт күндік ойыннан кейін «бірге бір» матчына көшеміз. Жартылай финалда менің ойыным соңғы матч болды. Есепті 2:2-ге теңестіре алдық. Және соңғы шұңқырда өз матчымда жеңіске жеттім. Осылайша, финалда командама жеңіс әкелдім. Бұл, жалғыз менің ғана нәтижем емес, әрқайсымыз өз матчтарымызда үздік болдық. Иә, мен тек оған көмектестім», - дейді ол.

Оның спорттағы және оқудағы тамаша жетістіктеріне әлемнің үздік университеттері назар аударып, Гарвард, Пристон, Дьюк және Американың өзге де беделді университеттері өздерінде білім алуға шақырған. Бірақ оның таңдауы Стэнфордқа түскен.

«Қазақстанды танытып жүргеніме қуаныштымын. Қазір қазақстанда спорттың бұл түрі дамып келеді. Еліміз жас. Ал АҚШ-та гольфтің пайда болғанына көптеген жылдар болды. Бізде алаңдар жақсартылуда, көптеген юниор гольфшылар бар», - дейді ол.

Ал Дәулеттің бапкері Конрад Рэй оның ерекше мінезін атап өтіп, бірнеше рет ойынның шешуші сәтінде команданы жеңіске жеткізгенін айтты.

«Дәулет Стэнфорд сынды әлемдік деңгейдегі университетте жақсы білім ала отырып, студент-спортшының үздік бейнесін қалыптастыруда. Әлемнің өзге бөлігін таныстырып жүрген оны біздің қатарымыздан көруге қуаныштымыз...Президент Д.Трамп шамадан тыс саяси қызметіне қарамастан, спортқа көңіл бөліп, командалар мен жеңімпаздарға қошемет білдірді. Ол өзі гольфшы және бұл – бізді біріктіреді. Біз онымен әңгімелесіп қана қоймай, Ақ үйді де аралап шықтық», - дейді Конрад Рэй.

Автор Мира Төлендіқызы
Басты сөздер: Әлем, Спорт, АҚШ,
Жоғары қарай