Ауа райы
Астана -1 °С
Алматы 0 °С
валюта бағамы
USD 386.30
EUR 428.14
RUB 6.08
CNY 54.87

KAZ Minerals Орлов шахтасында қайтыс болған жігіт туралы ақпарат берді

2019 жылдың 14 шілде 2019 14:10

ӨСКЕМЕН. ҚазАқпарат - KAZ Minerals компаниялар тобының баспасөз қызметі Шығысы Қазақстандағы Орлов кенішінің аумағында жазым болған жігіт туралы ақпарат берді, деп хабарлайды ҚазАқпарат тілшісі.

Компанияның Шығыс Қазақстан облысы бойынша бұқарамен байланыс менеджері Ермек Дүзкеновтің айтуынша, опырылған тау жынысының астында қалған бекітуші Абай ауданының тумасы болған.

«Қайтыс болған жігіт 1985 жылы Абай ауданында дүниеге келген. Артында 2 баласы қалды. Бекітуші болып жұмыс істеп жүрген. Төбедегі тас кесегі құлағанда қасындағы жігіт қашып үлгерген. Ал марқұм кесектің тура астында тұрғандықтан, қашып кете алмаған», - дейді Ермек Дүзкенов.

Оқиғаның анық-қанығын арнайы құрылған тергеу комиссисясы анықтап жатыр. KAZ Minerals компаниясы жазым болған кеншінің отбасына қанша өтемақы төлеу керектігін де осы комиссия анықтайды.

«Кәсіпорынның ұжымдық келісімшарты бойынша, қайтыс болған бекітушіні жерлеу шығындарына жұмыс беруші қаржылай атсалысатын болады. Оның сыртында кәсіподақ та көмектесіп жатыр. Ал қайғылы оқиғаға байланысты қанша өтемақы төленетінін тергеу комиссиясы шешеді. Жалпы мұндай жағдайларда көбінесе жазым болған жұмысшының бір жылдық еңбекақысының 10 есесі төленіп жатады. Дегенмен, бұл нақты деп айтуға әзір ерте. Нақты сома комиссия жұмысы аяқталған кезде ғана белгілі болады», - дейді менеджер.

Еске салсақ 13 шілде күнгі сағат 3.00-де Шығыс Қазақстандағы Орлов шахтасының аумағында кеніш опырылып, соның салдарынан бір адам мерт болып, бір адам ауруханаға түскен болатын.

Жоғары қарай