Ауа райы
Астана -4 °С
Алматы 2 °С
валюта бағамы
USD 387.14
EUR 428.18
RUB 6.06
CNY 55.23

Қарағандыда балалар реаниматологын көлік қағып кетті

2019 жылдың 16 тамыз 2019 16:30

ҚАРАҒАНДЫ. ҚазАқпарат – Қарағандыда жас жүргізуші жұмысына кетіп бара жатқан дәрігерді қағып кетті, деп хабарлайды ҚазАқпарат тілшісі.

Операцияға асығып бара жатқан балалар реаниматологының жағдайы ауыр деп бағалануда.

15 тамызда «Мazda» көлігінің 18 жастағы жүргізушісі Ержанов көшесімен Газалиев көшесіне қарай келе жатқанда, реттелмейтін жаяу жүргіншілер жолағында 55 жастағы қала тұрғынын қағып кетті.

Жол-көлік оқиғасы салдарынан түрлі дене жарақатын алған зардап шегуші медициналық мекемеге жеткізілді. Белгілі болғандай, ол ота жасауға асығып бара жатқан реаниматолог дәрігер болып шықты.

«Қазір ол Мақажанов атындағы травматология орталығының жансақтау бөлімінде жатыр. Төтенше жағдай операцияға шақырған аурухананың маңында болған. Ер адамның қолы мен аяғы сынып, басы жарақаттанған. Жағдайы ауыр деп бағаланып отыр», - деп хабарлады Қарағанды облыстық Денсаулық сақтау басқармасының баспасөз қызметі.

Аталған факті бойынша, ҚР ҚК 345-бабы 2-бөлігі бойынша сотқа дейінгі тергеу жұмыстары басталып, қажетті сараптамалар тағайындалды.

Басты сөздер: Көлік, Оқиға, Қарағанды облысы,
Жоғары қарай