Ауа райы
Астана 9 °С
Алматы 3 °С
валюта бағамы
USD 389.59
EUR 429.06
RUB 6.05
CNY 55.07

Футболдан Қазақстан кубогі: «Астана» жарыс жолынан шығып қалды

2019 жылдың 10 сәуір 2019 22:25

НҰР-СҰЛТАН. ҚазАқпарат - Бүгін еліміздің сегіз қаласында футболдан Қазақстан кубогі 1/8 финалдық кезеңі ойындары өтті, деп хабарлайды ҚазАқпарат тілшісі.

Елордалық «Астана» жарыс жолынан шығып қалды. Олар сырт алаңда Семейдің «Алтай» командасына жол берді. Айта кетерлігі, бұл кездесуде елордалық клуб сапында негізінен жастар ойын көрсетті. Кездесудің негізгі кезеңі 1:1 есебімен тең аяқталды. «Астана» сапынан 25-минутта Серікжан Мужиков есеп ашқан еді. Оған 66-минутта «Алтай» ойыншысы Әнуар Омашев бір голмен жауап қайырды. Ойын қосымша кезеңге ұласты. Мұнда да жеңімпаз анықталған жоқ. Пенальти тебуде «Алтай» 15:14 есебімен жеңіске жетті.

Алматының «Қайраты» да осындай қарсылыққа тап болды. Оларға бірінші лигада ойын көрсететін Ақтаудың «Каспий» командасы қарсылас атанған еді. «Қайрат» сапынан 18-минутта Сұлтанбек Астанов гол соқса, «Каспий» ойыншысы Ринат Хайруллин 58-минутта таразы басын теңестірді. Ойын соңындаы пенальти тебуде 6:5 есебімен алматылық команданың жолы болды.

Қостанайдың «Тобылы» сырт алаңда Павлодардың «Ақсу» клубын 3:0 есебімен жеңіп қайтты. Бұл ойында қостанайлықтар қатарынан 49 және 66-минуттарда Бауыржан Тұрысбек, 68-минутта Азат Нұрғалиев гол соқты.

«Ақтөбе» командасы Павлодардың «Ертіс» клубын Қостанайда қабылдады. Ақтөбедегі стадионның дайын болмауына байланысты олар өз алаңындағы ойындарын аталмыш қалада өткізіп жүр. Бүгін кездесуде негізгі кезең 2:2 есебімен тең аяқталды. «Ақтөбеден» Абат Айымбетов 27, 64-минуттарда гол соқса, «Ертістен» Рохер Каньяс 17, Станислав Лунин 51-минуттарда көзге түсті. Қосымша кезеңде павлоларлық Каспарс Дубра «Ертісті» алға шығарды. Дегенмен «Ақтөбе» командасынан 111-минутта Хрвое Милишевич қайтадан таразы басын теңестірді. Пенальти тебуде «Ертістің» жолы болды.

Қызылорданың «Қайсары» бірінші лигада ойын көрсететін Шымкенттің «Оңтүстік академия» клубын әрең жеңді. «Оңтүстік академия» клубынан 26-минутта Жандос Қуандықов есеп ашқанымен, оған «Қайсар» сапынан 31-минутта Иван Садовничий жауап қайырды. Ойынның негізгі кезеңі 1:1 есебімен тең аяқталды. Қосымша кезеңнің 106-минутта қызылордалық шабуылшы Бранислав Пуношевац соққан гол «Қайсарды» жарыстың келесі кезеңіне алып шықты.

Көкшетаудың «Оқжетпесі» мен Шымкенттің «Ордабасы» арасындағы кездесу тағдырын бір ғана гол шешті. Шымкенттік Темірлан Ерлановтың 75-минутта соққан жалғыз голы өз командасын ширек финал ойындарына алып шықты.

«Атырау» командасы Нұр-Сұлтан қаласында Талдықорғанның «Жетісуын» 1:0 есебімен жеңді. Кездесу тағдырын шешкен голды 78-минутта атыраулық Алексей Родионов соқты.

«Тараз» өз алаңында Қарағандының «Шахтерін» 2:0 есебімен жеңді. Аталмыш команда сапынан 8-минутта Гаврил Кан мен 91-минутта Серж Ньюадзи көзге түсті.

Қазақстан кубогының ширек финал ойындары 8 мамырда өткізіледі. Жарыстың бұл кезеңі де бір ғана кездесуден тұрады.

Автор Әділжан Үмбет
Басты сөздер: Қоғам, Спорт,
Жоғары қарай