Ауа райы
Астана -11 °С
Алматы -6 °С
валюта бағамы
USD 371.56
EUR 422.43
RUB 5.56
CNY 53.51

Еркебұлан Сейдахмет жаттығу кезінде жарақат алып қалды

2018 жылдың 14 қараша 2018 20:55 357

АСТАНА. ҚазАқпарат - Қазақстан Ұлттық құрамасының бас бапкері Станимир Стоилов Латвиямен өтетін ойын алдында ұйымдастырылған баспасөз мәслихатында журналистердің сауалына жауап берді, деп хабарлайды ҚазАқпарат ҚФФ баспасөз қызметіне сілтеме жасап.

- Сырт алаңда Латвиямен (1:1) өткен ойыннан кейін қарсыластың әлсіз тұстарын анықтадыңыз ба? Біздің командада қандай тактикалық өзгерістер болады?

- Ең алдымен футболшылар туралы айтайын. Өкінішке қарай, жарақатына байланысты Евгений Постников пен Ян Вороговский көмектесе алмайды. Дмитрий Шомко жиынға шақырылды. Алайда, жасыл алаңға шығуы екіталай. Кеше жаттығуда Еркебұлан Сейдахмет жарақат алып қалды. Өкінішті. Өйткені, жарақатын емдеу үшін шамамен үш ай қажет.  Ертең ота жасау үшін Германияға жол тартады. Негізгі құрамның 4-5 ойыншысын ауыстыруға тура келеді. Резервтен Юрий Перцух, Оралхан Өміртаев және Иван Антипов шақырылды.

Қарсылас туралы айтатын болсақ, алғашқы ойынды талдайтын уақыт болды. Алғашқы кездесуде Латвия құрамасы ойынды жақсы ұйымдастырып, қысым көрсете алды. Жаңа бапкердің келуі де құрамаға жаңа леп әкелді. Нәтижелері жоқ болғанымен жақсы футбол ойнайды. Мен үшін біздің команданың қалай ойнайтыны маңызды. Андоррамен өткен матчтан кейін Ловгиненко, Щеткин және Шомко ойнамады. Жағдайдың қалай өзгергенін қараймын. Бірінші нөмірмен ойнағымыз келеді. Яғни, допты жиі ұстау арқылы бірнеше шабуыл ұйымдастыру. Соңғы кездесулерде көрсеткен ойын үлгісін дамытуға ұмтыламыз.

- Дмитрий Шомконың алаңға шықпайтынын ескерсек, оның орнын Бактиер Зайнутдинов баса ма?

- Бәрі де мүмкін. Зайнутдинов алғаш рет «Астана» қатарында «Спартакпен» (Мәскеу) өткен жолдастық ойында қапталдағы қорғаушы міндетін атқарды. Мен оның мүмкіндігін жақсы білем. Ол әртүрлі позицияда ойнай алатынын дәлелдеді. Жылдам шешім қабылдай алады. Сонымен қатар, бұл позицияда Ғафуржан Сүйімбаев бар.

- Қазақстан құрамасында жас футболшылар ойнаған уақыт болды. Алайда, ол үрдіс жалғасын таппады. Ал, қазіргі жастардың болашағы қандай?

- Тізімге 23 футболшы енеді. Бір ойынға 14 футболшы қатысады. Алдағы екі матчта бірнеше футболшыны ауыстырамын. Жаңа ойыншылардың мүмкіндіктерін көру керек. Қақпашылардың арасында бәсекені арттырған жөн. Жас футболшылардың ішінде Сейдахмет, Зайнутдинов және Федин берілген мүмкіндіктерді пайдалана алды.

- Бауыржан Исламхан алаңнның орталық бөлігінде ойнай ма? Әлде қапталға қоясыз ба?  

- Ұлттық құрамада әртүрлі позицияда ойнай алатын футболышлар бар. Ең бастысы - футболшылардың сол позицияда өз әлеуетін көрсете алуы. Андоррамен өткен ойында Бауыржан Исламханды сол қапталға қойдық. Пайдасы болды. Ертеңге дейін ойланамыз.

- Қазақстан құрамасының қақпасын кім қорғайды?

- Алғашқы ойында Ненад Эрич тұрады. Екінші ойын туралы шешімді әлі қабылдаған жоқпыз.

- Ресейлік футболшы Андрей Аршавин «Қайсарда» ойнайтын Думан Нәрзілдаевтың болашағы зор деп санайды. Ол ұлттық құрамаға шақырылғанмен, әлі алаңға шыққан жоқ...

- Думан Нәрзілдаев алғаш шақырылған кезде жанкүйерлердің 90 пайызы ол туралы білмеді. Ол клубтың негізгі құрамында енді ойнай бастады. «Қайсардың» жаттықтырушыларымен көп сөйлесеміз. Бұл - оның алғашқы маусымы. Оның уақыты алда.

- Қазақстан Ұлттық құрамасы жарты жылдың ішінде қаншалықты күшейді?

- Ұлттық құрама үлкен қадам жасады деп айта алмаймын. Алайда, нәтижелер әртүрлі. Алғашқы күннен бастап еуропалық футболдың деңгейіне жету үшін жұмыс істей бастадық. Шабуыл мен қорғаныста үйлесімді ойын көрсетіп келеміз. Ең басты мәселе - футболшылардың клубтарындағы ойын тәжірибесінің жоқтығы. Әр футболшы өз орны үшін таласуы тиіс.

 

 

 

Басты сөздер: Спорт,
Жоғары қарай