Ауа райы
Астана -3 °С
Алматы -1 °С
валюта бағамы
USD 389.75
EUR 434.26
RUB 6.12
CNY 55.05

Дариға Назарбаева әлемдік діндер лидерлерінің өкілдерімен кездесті

2019 жылдың 19 қыркүйек 2019 12:21

НҰР-СҰЛТАН. ҚазАқпарат - Әлемдік және дәстүрлі діндер лидерлері съезі Хатшылығының XVIII отырысы аясында Парламент Сенатының төрағасы, съезд Хатшылығының басшысы Дариға Назарбаева Орыс православ шіркеуі Мәскеу Патриархатының Сыртқы шіркеу байланыс бөлімінің дінаралық байланыс хатшысы, дін қызметшісі Димитрий Сафоновпен кездесті, деп хабарлайды ҚазАқпарат.

Сенаттың баспасөз қызметінен мәлім еткендей, палата басшысы съезд Хатшылығының жұмысына белсенді қатысқаны және көп жылдан бергі қолдауы үшін алғыс айтты.

Өз кезегінде Д.Сафонов Қазақстанға православ тұрғындарды қолдағаны үшін ризашылығын білдірді.

«Ресейдің дінаралық кеңесі Қазақстанға зор құрметпен қарайды, диалог алаңының барлық ұсыныстарын қолдап келеді және бұдан былайғы ынтымақтастыққа үміт артады. Біз дінаралық форумды шақырудағы Қазақстанның тәжірибесін зерделеу үшін алдыңғы съездерге қатысушылардың материалдары мен сөйлеген сөздерін алғымыз келеді», - деп атап өтті Д.Сафонов.

Сондай-ақ Мәскеу Патриархатының өкілі Патриарх Кириллдің Қазақстанға сапары 2021 жылға жоспарланғанын айтты.

Дариға Назарбаева «Әл-Азһар» ислам зерттеулері академиясының бас хатшысы Назир Мұхаммед Мұхаммед әл-Назир Аядпен әңгіме барысында бүкіл әлемдегі исламның рөлін нығайтуға, төзімділік пен барлық халықты ынтымаққа шақыратын діннің шынайы, бейбітсүйгіш мән-мағынасын насихаттауға бағытталған әл-Азхардың күш-жігерін жоғары бағалады.

«Исламның ірі орталығында қазақстандық студенттер жақсы білім алуда, оларды оқытудағы көмектеріңіз үшін ризамыз», - деп атап өтті Сенат Төрағасы.

Съезд Хатшылығының басшысы, сондай-ақ Дүниежүзілік ислам лигасы Бас хатшысының өкілі, Көмек көрсету, күтімге алу және даму мәселелері жөніндегі халықаралық ұйымының Бас хатшысы Әбдулазиз Ахмад Сарханмен кездесті. Тараптар съездің қызметін дамыту, оның жаңа сапалық деңгейге шығуы жөніндегі бірлескен ынтымақтастықты талқылады.

Әбдулазиз бен Ахмад Сархан көптеген әлемдік діндер қажет ететін шынайы бейбіт алаң құрғаны үшін Қазақстан басшылығына алғысын білдірді.

«Сіз басшылық ететін диалог алаңы ұлтаралық келісім мен ішкі тұрақтылықтың үлгісін көрсетіп отыр», - деді Дүниежүзілік көмек көрсету және даму мәселелері жөніндегі ұйымның Бас хатшысы.








Жоғары қарай