Ауа райы
Астана 6 °С
Алматы 8 °С
валюта бағамы
USD 389.94
EUR 433.50
RUB 6.10
CNY 55.13

Аударыспақтан Қазақстан чемпиондары анықталды

2019 жылдың 27 маусым 2019 14:34

НҰР-СҰЛТАН. ҚазАқпарат - Алматы қаласында ұлттық спорт түрлерінен өтіп жатқан Жасөспірімдер арасындағы ел біріншігінде аударыспақтан жеңімпаздар мен жүлдегерлер анықталды, деп хабарлайды ҚазАқпарат.

ҚР Ұлттық спорт қауымдастығынан мәлім еткендей, турнир «Байсерке» ипподромында өтуде. Аударыспақтан 2001-2003 жылы дүниеге келген жасөспірімдер арасында өткен ҚР біріншілігінде 40, 50, 60, 70 және 70 келіден жоғары салмақтардағы шеберлер сынға түсті.

Нәтижесінде, 40 келі салмақта Ақтөбе облысының тумасы Мейірман Әріпов чемпион атанды. Екінші орынды түркістандық Азамат Жұмабек иеленсе, үздік үшінші орынды Жамбыл облысынан келген Айбек Жапаров жеңіп алды.

50 келі салмақта бас жүлдені түркістандық Бекзат Қамбар қанжығасына байлады. Екінші орынға ақтөбелік Абай Тұрсынбаев, үшінші орынға жетісулық Сұңқар Тәукебаев ие болды.

60 келі салмақта батысқазақстандық Мирас Берікбаевқа тең келер ешкім болмады. Екінші орынды Алматы облысының спортшысы Еділ Ерболатұлы, үшінші орынды ақтөбелік Әлішер Сәлімжанов жеңіп алды.

70 келі салмақта чемпиондық атаққа түркістандық Расул Құрайыш ие болса, күміс жүлдені қарағандылық Төлеген Мадияр қанжығасына байлады. Қола медаль жамбылдық Ағаділ Ахатбекке бұйырды.

70 келіден жоғары салмақта сынға түскен аударыспақшылар арасында Ақтөбе облысының тумасы Аслан Есенғарин бас жүлдені жеңіп алса, жамбылдық Асланбек Сүндетов екінші, Алматы облысынан келген Айдар Ділдәбек үштікті қорытындылады.

Айта кетейік, кеше көкпардан топтық кезең мәресіне жетті. Чемпионат бағдарламасына сәйкес, 29 маусым күні теңге ілу мен жамбы ату бәсекелері өтсе, көкпардың финалдық ойындары мен жарыстың жабылу салтанатты 30 маусымға жоспарланған.

Автор Күнсұлтан Отарбай
Басты сөздер: Спорт, Алматы, Аймақ,
Жоғары қарай