Ауа райы
Астана -6 °С
Алматы -3 °С
валюта бағамы
USD 388.81
EUR 429.01
RUB 6.08
CNY 55.49

ТүркПА: Астанада түркі әлеміне ортақ құндылықтарды сақтау мәселелері талқыланды

2019 жылдың 2 наурыз 2019 21:41

АСТАНА. ҚазАқпарат - Қазақстан Республикасының Парламенті Мәжілісінде ТүркПА-ға қатысушы елдердің ұлттық заңнамасын үйлестіру бойынша үшінші семинары өтті. Іс-шараны Құқықтық мәселелер мен халықаралық қатынастар жөніндегі комиссиясының төрағасы Исмет Учма жүргізді, деп хабарлайды ҚазАқпарат Мәжілістің сайтына сілтеме жасап.

«Жиында ТүркПА-ға мүше елдердегі жоғары білім беру саласындағы эквиваленттік процестер, түркі әлеміне ортақ құндылықтар мен тарихи-мәдени мұраларын сақтау және қорғау, басқа да мәселелер қаралды. 1 наурызда өткен отырысқа Мәжіліс депутаттары, Әзербайжан, Қырғызстан, Түркия елдерінің парламентшілері, ТүркПА Құқықтық мәселелер және халықаралық қатынастар жөніндегі комиссия мүшелері, мүше-парламенттердің заң департаменттерінің өкілдері, түркі ынтымақтастық ұйымдарының өкілдері қатысты», - делінген хабарламада.

2014 жылғы 18 наурызда Ыстанбұлда өткен бірінші семинарда тараптар Еуропалық одақ пен Тәуелсіз Мемлекеттер Достастығы Парламентаралық ассамблеясы контекстінде өз тәжірибелерімен бөлісті.

Ал 2016 жылғы 18 наурызда Анкарада өткен екінші семинарда, тараптар өз елдеріндегі отырыстың атауына қатысты қолданыстағы құқықтық базамен, яғни мәдени байлықты сақтау және дамыту бойынша бірлескен заңнамалық күш-жігермен бөлісіп, мәдениет және туризм саласындағы нақты тақырыптар бойынша жұмысты жалғастыруды шешті.

Ал, бүгінгі өткен шараның мақсаты - заңнаманы үйлестіру үдерісін жақсарту үшін нақты тақырыптары мен күнтізбелік жоспары бар жол картасын анықтау. Отырыс барысында Түркия Республикасы Ұлттық жиналысының сарапшысы Эрджан Дурдулар түркі әлемінің материалдық емес мәдени мұрасын қорғау туралы модельдік заңмен таныстырды. Әзербайжан Республикасы Милли Меджлисінің Мемлекеттік құрылыс заңнамасының дирекциясы басшысының орынбасары Фуад Маммадов, Түркі Академиясының президенті Дархан Қыдырәлі тақырып бойынша баяндады. Сонымен қатар, осы күні парламентшілер ТүркПА Құқықтық мәселелер және халықаралық қатынастар жөніндегі комиссиясының жетінші отырысының жұмысына қатысты. Онда ТүркПА-ға қатысушы-елдердегі жоғары білім берудегі баламалылық үдерістерінің мәселелері талқыланды. Баяндамашылар жоғары білімнің тұрақты экономикалық және әлеуметтік дамудағы рөліне ерекше тоқталды.

«Осы орайда ТүркПА-ға қатысушы елдердің сапалы да, сандық жағынан жоғары білім берудің жақсы дамыған және озық жүйелері бар екендігі айтылды. ТүркПА-ға қатысушы елдер құқықтық және институционалдық шеңберлерін нығайта отырып, өздерінің жеке оқу жүйелерін әрі қарай дамытып, жоғары білімді жақсартуға үлкен үлес қоса алатыны атап өтілді. Талқылау қорытындысы бойынша тиісті ұсынымдар қабылданды», - делінген хабарламада.

Жоғары қарай