Ауа райы
Астана -10 °С
Алматы 3 °С
валюта бағамы
USD 378.17
EUR 429.11
RUB 5.88
CNY 56.48

Арал теңізінің құрғап кеткен аумағында орман пайда болды

2019 жылдың 21 ақпан 2019 14:11 6543

АСТАНА. ҚазАқпарат - Арал теңізінің тартылып қалған аумағында 300 мың гектарлық орман өсіп шықты. Бұл туралы Парламент Мәжілісінде «Арал өңірінің экономикалық, экологиялық және әлеуметтік мәселелерін заңнамалық реттеу» тақырыбында өткен дөңгелек үстел барысында ҚР Парламенті Мәжілісінің Экология мәселелері және табиғат пайдалану комитетінің төрағасы Глеб Щегельский мәлім етті, деп хабарлайды ҚазАқпарат тілшісі.  

Мәжілісменнің айтуына қарағанда, Арал өңірінде осы уақытқа дейін 50 мың гектарлық жайылым жер қалпына келтірілген.

«Теңіздің тартылып қалған бөлігінде қолдан отырғызылған орманның аумағы 300 мың гектарға жетті. Осының бәрі әлеуметтік-экономикалық тиімділікті көрсетеді», - дейді Глеб Щегельский.

Алайда депутаттың айтуына қарағанда, аймақтың тұрақтылығы үшін әлі де біршама жұмыс жүргізу керек.

«Иә, біз Кіші Аралды сақтап қала алдық. Бірақ, алдағы уақытта осы аймақтың су ресурсын сақтап қалуды, салалардың тұрақты дамуын, соның ішінде балық шаруашылығының өркендеуін ойластыру керек», - дейді депутат.

Келтірілген мәліметтерге құлақ ассақ, қазіргі таңда аймақтағы балық зауыттарының жартысы ғана толық қуатта жұмыс жүргізіп отыр.

«Бүкіл өндірістік қуатты қалай іске қосуды, теңіздің биоресурсын сақтай отырып, кәсіби балық шаруашылығын өркендетуді, балық өндірісінің толық циклын қалай құруды ойластыруымыз керек», - дейді депутат.

Еске сала кетсек, бұған дейін депутат Глеб Щегельский Қазақстан Арал теңізінің солтүстік бөлігін қалай сақтап қалғанын айтып берген болатын.  

 

 

Жоғары қарай